Ima regalochus sapa uj runaman gustasqanta yachayqa mana atikullanchu. Regalasqanchej uj sumaj regalo kananqa regalonchejta japʼikojmanta kashan, imaraykuchus wakenqa regalasqanchejta allinpaj qhawanqanku wakintaj mana.

Uj jovencitopajqa kunallanraj llojsimoj aparato aswan sumaj regalo kanman. Kuraj runapajtaj imatachus familianmanta japʼisqan uj sumaj regalo kanman. Wakin lugarespeqa jóvenes, kuraj runaspis qolqellata regalanankuta munanku, munasqankuta rantikunankupaj.

Imayna kajtinpis ashkha runas uj sumaj regalota mayta maskʼanku, munasqa amigonkuman chayri familiarninkuman regalanankupaj. Chayta tariy mana atikullajtinpis allin kanman wakin imaspi tʼukurina, ajinamanta kusikunankupaj jina uj regalota qonapaj. Chayta ruwanapaj tawa yuyaychaykunata qhawarina.

Imachus gustasqan. Irlanda del Norte nisqaj Belfast llajtanpi uj runaman 10 chayri 11 watitasniyoj jina kashajtin uj sumaj bicicletata regalarqanku. Chay regalasqankumanta pay nerqa: “Uj bicicletayoj kayta mayta munarqani”, nispa. Chay runaj nisqanqa rikuchiwanchej pimanpis imatachus munasqanta regalayqa may sumaj kasqanta. Tʼukuriy pimanchus uj regalota qonayki kashan chaypi. Imastachus astawan munasqantataj yachay, imaraykuchus runasqa imatachus munasqankuta astawan suyakunku. Awelituspi tʼukurina. Paykunaqa familiasninkuwan khuska kayta jatunpaj qhawanku. Ichapis wawasninkuwan, allchhisninkuwan ima sapa kuti kayta munankuman. Paykunaqa may jatunpaj qhawanku wawasninku, allchhisninku ima vacacionesninkupi paseaj rinankupaj wajyarejtinku.

Pillamanpis imatachus munasqanta regalanapajqa, uyariyta yachana tiyan. Chaypajtaj Biblia yuyaychawanchej allinta uyariyta yachananchejta, manataj usqhayllata parlanatachu (Santiago 1:19). Amigosniykiwan chantá familiaresniykiwan  parlashaspaqa, sumajta uyariy imachus paykunaman gustasqanta yachanaykipaj. Ajinamanta imachus regalanaykita yachanki.

Imatachus necesitasqan. Imatachus necesitasqanta regalajtinchejqa, japʼikoj may sumajpaj chay regalota qhawanqa pisi qolqellawan rantejtinchejpis. ¿Imaynatá yachasunman imatachus necesitasqanta?

Ichapis allin kanman imatachus necesitasqanta tapurinanchej. Jinapis wakenqa mana chayta tapuriyta yachankuchu, manaqa chʼinmanta regalallankuña. Wakenqa imaschus gustasqanmanta, imastajchus mana gustasqanmanta willariyta yachanku, imatachus necesitasqankumantataj mana.

Chayrayku niraj imatapis regalashaspa, imatachus necesitasqankuta sumajta qhawarina. Ichapis kanman uj joven, kuraj runa, soltero, casado, divorciasqa, viudo, trabajoyoj chayri jubilasqa. Allinta tʼukurina regalasqanchej imaynatachus regalota japʼikojta yanapananpi.

Regalayta munashanki chay runa imatachus necesitasqanta yachanaykipajqa, parlariy kikin imaspi rikukoj runaswan. Ichapis paykunaqa yanapasonqanku imastachus necesitasqanta reparanaykipaj, chayta yachaspaqa necesitasqan imata regalayta atillanki.

Maychus tiemponpi. Biblia nin: “Pipis tiempompi parlarejtin[qa], ancha sumajpuni”, nispa (Proverbios 15:23). Pillawanpis tiemponpi parlarejtinchejqa, kusisqa kananpaj yanaparinchej. Jinallataj kanman pillamanpis necesitashajtinpuni imatapis jaywarejtinchejqa, chay runaqa mayta kusikonqa.

Ichá amigonchejmanqa casarakojtin uj regalota jaywanchej, uj jovenmantaj graduakojtin, uj qhariwarmimantaj wawitanku nacekojtin. Wakenqa uj listata jina ruwakunku watantinpi ima kutispichus regalanankupaj. Ajinamanta ñaupajmantaña yachanku pillamanpis imatachus regalanankuta. *

Pillamanpis uj regalotaqa maykʼajllapis qoyta atillasunman, nitaj uj fechapipunichu. Jinapis pimanchus, ima yuyaywanchus qosqanchejta qhawarikunanchej tiyan. Uj runa imallatapis uj warmiman regalajtin, ichapis chay warmeqa yuyanman payta astawan rejsiyta munaspa regalasqanta. Chay mana ajinachu kajtintaj, runaj ruwasqanqa mana allinchu. Chayrayku sumajta qhawarikunanchej tiyan, ima yuyaywanchus imatapis regalayta munashasqanchejta.

Ima yuyaywanchus regalasqanchej. Rikunchej jina sumajta qhawarikuna tiyan pillamanpis imatapis regalashaspa. Chantapis qhawarikunallanchejtaj tiyan ima yuyaywanchus regalayta munasqanchejta. Ichá ashkhas yuyanchej kusichinapaj jina regalasqanchejta, jinapis ashkha runasqa wakin fiestasllapi obligasqa jina imatapis regalanku. Wakintaj imatapis japʼiyta munaspalla chayri allinpaj qhawachikuyta munaspalla regalanku.

¿Imaynatá yachasunman imaraykuchus regalashasqanchejta? Biblia nin: “Tukuy ruwanasniykichejta munakuywan ruwaychej”, nispa (1 Corintios 16:14). Pillamanpis munakusqanchejrayku imatapis regalasun chayqa chay runaqa kusiywan japʼikuwasun. Chayta ruwaspaqa noqanchejpis aswan kusisqa kasunchej, Diosninchej Jehovatapis kusichillasuntaj. Apóstol Pablo Corintomanta hermanosta allinta ruwasqankuta nerqa, Judeamanta hermanosninkuta kusiywan  khuyarisqankumanta. Pay nerqa: “Diosqa kusiywan qojta munakun”, nispa (2 Corintios 9:7).

Kay yachaqanapi yachakusqanchejman jina ruwaspaqa kusichinanpaj jina pimanpis regalasunchej. Jehová Diosninchejpis kusichinawanchejpaj jina uj sumaj regalota qowarqanchej, chaymantataj qhepan yachaqanapi yachakusunchej.