Diosta yupaychaq familiasqa Jesusjina ruwanku
Diosta yupaychaq familiasqa Jesusjina ruwanku
“Cristopis qankunarayku ñakʼarerqa, chayta yachaspa qankunapis kikillantataj ruwanaykichejpaj.” (1 PED. 2:21.)
1. a) Diospa Churin, ¿imaynatá tukuy ima ruwakunanpaq yanapaysikurqa? b) ¿Imatataq Jesús runasmanta nin?
DIOSNINCHIK Jallpʼatawan, janaqpachatawan ruwachkaptinqa, kuraq Churin paywan “yanapaq maestrojina, [NM]” llamkʼachkarqa. Kay Churinqa, Tatan Jallpʼapi tukuy imata ruwachkaptin yanapaysikurqa, chantapis, juk kʼacha huertata wakichichkaptin yanaparqa, chaypi Diosman rikchʼakuq ruwasqa runas kawsanankupaq. Diospa Churin Jesusqa, ajinata runasmanta nirqa: “Kusikorqani, runasraykutaj sonqoy tʼikarerqa”, nispa (Pro. 8:27-31; Gén. 1:26, 27).
2. a) ¿Imatataq Jehová tukuy runasman quwanchik? b) Imapichus Bibliap yuyaychasqan yanapawasqanchikmanta parlariy.
2 Adanwan Evawan juchallikusqankumantapacha, Jehovap munaynin juntʼakunanpaqqa, pillapis runasta juchamanta kacharichinanpuni karqa. Chayrayku, Jehovaqa, Churinta runasrayku kawsayninta qunanpaq kachamurqa (Rom. 5:8). Chantapis, Jehovaqa, kusisqa kawsananchikpaq Palabranta quwanchik (Sal. 119:105). Sutʼincharinapaq, Bibliap yuyaychasqanqa, familianchikwan kusisqa, jukchasqataq kawsanapaq yanapawanchik. Chayrayku, Génesis libropi qhari “warminwan ujchakonqa” nispa nin, “uj runa jinalla” kanankupaq (Gén. 2:24).
3. a) ¿Imatataq Jesús qhariwarmi kawsaymanta yachachirqa? b) ¿Imatá kay yachaqanapi ukhuncharisunchik?
3 Jesús Jallpʼapi kachkaspaqa, qhariwarmi wañunankukama khuska kawsanankuta nirqa. Chantapis, imayna parlaykunachus, imayna ruwaykunachus, qhariwarmi kawsayta chayri familiata kusisqa kawsananpaq yanapananta yachachirqa (Mat. 5:27-37; 7:12). Kay yachaqanapiqa, Jesús imastachus familiaspaq yachachisqanta ukhuncharisun. Chantá, imaynatachus paypa ruwasqan, qusasta, warmista, wawasta, tatasta ima, kusisqa kanankupaq yanapasqanta ukhunchallasuntaq.
Cristianoqa, warminta allinpaq qhawan
4. Jesuspa ruwasqan qusaspa ruwasqankuwan, ¿imapitaq kikinchakun?
4 Diosqa, qusata familiamanta umajina kananpaq churan, imaynatachus Jesusta, qutuchakuymanta umatajina churarqa ajinata. Apóstol Pablo nirqa: ‘Qusaqa, warminpa umanmin, imaynachus Cristopis qutuchakuypa uman, ajina. Ajinallataq qutuchakuyqa paypa cuerpon, Cristotaq salvaqnin. Qusas, sapa jukpis warmiykichikta munakuychik imaynatachus Cristo qutuchakuyta munakurqa, ajinata, qutuchakuyraykutaq kawsayninta qurqa’, nispa (Efe. 5:22, 23, 25). Jesusqa, discipulosninta allinpaq qhawaq, chaytaq imaynatachus cristiano qusas, warminkuta qhawanankuta yachachin. Kunanqa, Jesús imaynatachus Dios atiyta qusqanta apaykachasqanta qhawarina.
5. ¿Imaynatataq Jesús discipulosninta qhawaq?
5 Jesusqa, “kʼacha, llampʼu sonqotaj” karqa (Mat. 11:29). Payqa, imatachus ruwananta mana tanqasqajinachu juntʼaq (Mar. 6:34; Juan 2:14-17). Chantapis, discipulosnin necesitasqankumanjina kʼachamanta yuyaycharqa (Mat. 20:21-28; Mar. 9:33-37; Luc. 22:24-27). Chaywanpis, ni jaykʼaq, paykunata kʼumuykachachinanpaqjina rimaqchu. Nillataq, mana munakusqanta chayri kamachisqanta mana kasukusqankuta nirqachu. Astawanpis, kʼacha kaykunasninkuta astawan uqhariq, sunquchariq ima (Luc. 10:17-21). Jesusqa, kʼacha, khuyakuyniyuqtaq karqa, chayraykuchá discipulosninqa, payta jatunpaq qhawarqanku.
6. a) ¿Imatá qusas Jesusmanta yachakunkuman? b) ¿Imaynatá apóstol Pedro qusasta yuyaycharqa?
6 Jesuspa ruwasqanqa, cristiano qusasta mana saqra capatazjina kanankuta yachachin. Astawanpis, qusaqa, warminta munakunan tiyan, allinpaq qhawaspa, allinnintataq maskʼaspa. Pedroqa, qusasta, Jesusjina ruwanankuta, warminkuta allinpaq qhawanankuta ima, yuyaycharqa (1 Pedro 3:7, ñawiriy). Cristiano qusa, ¿imaynatá warminta allinpaq qhawaspa, familianpaq umajina kayta atinman?
7. ¿Imaynatá qusa warminta allinpaq qhawasqanta rikuchinman? Sutʼinchariy.
7 Qusaqa, imatapis familianpa allinninrayku ruwanan kaptinqa, warminpa yuyasqanta, nisqanta ima, mana qunqananchu tiyan. Sutʼincharinapaq, qusaqa, ichapis wak llamkʼayta maskʼayta munan, chayri familian wak llaqtaman chayri wak wasiman ripunankuta yuyanman. Mana chayrí, vacacionespi maymanchus rinankupi, imastachus qullqinkuwan rantinankupi tʼukurinman. Kay ruwaykunaqa, ichá wakin kuti familianta llakiyman chayachinman, chayrayku allin kanman warminwan chay ruwaypi tʼukurinanku. Ajinamanta, imatachus ruwananta sumaqta yachanqa, chantapis warminqa, chay ruwayta tukuy sunqu juntʼaysikunqa (Pro. 15:22). Cristiano qusa warminta allinpaq qhawaptinqa, warmin payta munakunqa, jatunpaq qhawanqa ima, chantapis Jehovap ñawpaqinpi allinpaq qhawasqa kanqa, chaytaq imamantapis aswan sumaq (Efe. 5:28, 29).
Cristiana warmiqa, qusanta jatunpaq qhawan
8. ¿Imaraykutaq ni mayqin warmipis, Evap ruwasqanta ruwananchu tiyan?
8 Jesusqa, Tatanpa nisqanta jatunpaq qhawaq, cristiana warmiqa, qusanta kikillantataq qhawanan tiyan. Evaqa, mana jinatachu ruwarqa. Chayrayku, ni mayqin warmipis payjina ruwananchu tiyan. Jehovaqa, Adanta familiamanta umatajina churarqa, payniqtataq familiaman kamachiykunata qurqa. Chaywanpis, Evaqa, mana Adanpa nisqanta kasukurqachu (Gén. 2:16, 17; 3:3; 1 Cor. 11:3). Evaqa, katariwan chʼawkiyachikurqa, chaywanpis niraq chʼawkiyachikuchkaspa, chay katari Diospa nisqanta riqsisqanta niptin, qusanta ñawpaqta tapuriyta atinman karqa. Chayta ruwananmantaqa, payraq Adanta imatachus ruwananta kamachirqa (Gén. 3:5, 6; 1 Tim. 2:14).
9. ¿Imaraykutaq Jesús kʼumuykuq sunqu kasqan, payjina ruwanapaqjina?
9 Jesusqa, Tatanta Kamachiq Umatajina jatunpaq qhawarqa, payjinataq ruwananchik tiyan. Jesusqa, “Diosman igual caytaka mana paipaj japʼicapunanpaj jinatachu kahuarka”, chaytataq ruwasqanwan, kawsayninwan ima, rikuchirqa. Astawanpis, “pai quiquinta despojacurqa, camachi formata japʼispa” (Fili. 2:5-7, Mosoj Testamento, 1922). Kunan tiempopi Reyña kaspapis, Tatanpa nisqanta kʼumuykukuq sunqullawanpuni kasukun (Mat. 20:23; Juan 5:30; 1 Cor. 15:28).
10. ¿Imaynatá cristiana warmi, qusanpa nisqanta jatunpaq qhawasqanta rikuchinman?
10 Cristiana warmiqa, qusanpa kamachisqanta tukuy sunqu kasukunan tiyan, imaynatachus Jesús ruwarqa ajinata (1 Pedro 2:21; 3:1, 2, ñawiriy). Sutʼincharina: Juk waynuchuqa, juk imata ruwananpaq, tatamamanta parlapayanan tiyan, chaywanpis mamallanta parlapayan. Mamataq, qusanwan niraq imatapis parlarinchu, ¿allinchu kanman wawanman sapallanmanta permisota qunan? Mana. Astawanpis, allin kanman wawanta tapurinan, tatanwan parlarisqantañachus manachus. Manaraq tapuriptintaq, pay qusanta tapurinan tiyan. Tatamama mana juk yuyayllaman chayayta atiptinkuqa, mana wawanpa ñawpaqinpi parlanankuchu tiyan. Imaraykuchus warmi, qusanpa nisqanwan mana sunqu juntʼasqa kasqanta wawanpa ñawpaqinpi ninman chayqa, mana allinchu kanman (Efe. 6:4).
Tatasqa, Jesusjina ruwananku tiyan
11. ¿Imaraykutaq tatas Jesusmanta yachakuyta atinkuman?
11 Jesusqa, mana casarakurqachu nitaq wawasniyuqchu karqa, chaywanpis tatasqa, mayta paymanta yachakunkuman. ¿Imarayku? Imaraykuchus payqa, discipulosninman munakuywan, pacienciawan ima, yachachirqa, mana simillamantachu manaqa ruwayninwanpis. Kamachiyta quspaqa, imaynatachus chay kamachiyta juntʼanankuta yachachirqa (Luc. 8:1-3). Chantapis, imaynatachus Jesús discipulosninta qhawasqanqa, payjina ruwanankupaq yachachirqa (Juan 13:14-17, ñawiriy).
12, 13. ¿Imatá tatamama ruwananku tiyan, wawasninkup sunqunkupi Diospa kamachiykunasninta churanankupaq?
12 Wawasqa, tantasninkumanta allin ruwasqankuta, jinallataq mana allin ruwasqankuta yachaqanku. Chayrayku, tatamamaqa, tapurikunanku tiyan: “¿Imatá wawasninchikman yachachichkanchik? ¿Machkha unaytataq teleta qhawaypi chayri sunqu kusichiypi tiemponchikta churanchik? ¿Tiempochakunchikchu Bibliata ukhunchanapaq, willayman rinapaq ima? ¿Imatataq kawsayninchikpi aswan ñawpaqman churachkanchik? Diosta yupaychay, ¿aswan ñawpaqpichu kachkan? ¿Chaytachu ruwasqasninchik rikuchichkan?”, nispa. Tatamama, wawasninkup sunqunkupi Diospa kamachiykunasninta churayta munanku chayqa, paykunaraq chaymanjina ruwananku tiyan (Deu. 6:6).
13 Tatamama tukuy ima ruwasqankupi, Diospa yuyaychasqanmanjina ruwaptinkuqa, wawaspis chayta reparanqanku, kamachisqankutataq tukuy sunqu kasukunqanku. Chaywanpis, tatamama yachachisqankumanjina mana ruwaptinkuqa, wawasqa chayta reparallanqankutaq, chantapis mana jatunpaqchu Bibliap nisqanta qhawanqanku. Wawas, jinata yuyankuman chaytaq, kay saqra pachap ruwayninpi urmankuman.
14, 15. ¿Imatá tatas wawasninkup sunqunkupi churananku tiyan? ¿Imaynatá chayta ruwankuman?
14 Cristiano tatasqa, wawasninku pʼachallisqa kanankupaq mikhunamanta mana usunankupaq ima, mayta llamkʼanku, chaywanpis wawasninku mana chayllawanchu kawsasqankuta sumaqta yachanku. Chayrayku, wawasninkuta qhapaqyayta maskʼayman tanqanankuqa, mana allinchu kanman (Ecl. 7:12). Jesusqa, discipulosninman Diospa Reinonta ñawpata maskʼanankuta yachachirqa (Mat. 6:33). Jesusjina, tataspis wawasninkuta Diosta yupaychaypi imatapis ruwayta munanankupaq yachachinanku tiyan.
15 Chaypaqtaq, pikunachus Diospaq astawan llamkʼaqkunata riqsichiyta atinkuman. Waynuchus chayri sipaskuna, precursoreswan, qutuchakuykunata waturiq hermanowan chayri warminwan parlariptinkuqa, paykunajina ruwayta munankuman. Misioneros, betelitas, Tantakunapaq Wasista ruwaqkunapis, Jehová Diospaq llamkʼaspa may kusisqa kasqankuta willariyta atinkuman. Paykunaqa, maytachá ruwasqankumanta parlankuman. Diospaq ajinata llamkʼasqankuqa, achkha waynuchusta, sipaskunata ima, paykunajina ruwanankupaq yanapanman.
Wawasqa, Jesusjina ruwananku tiyan
16. Jesús, ¿imaynatá Tatanta, Jallpʼapi tatamamanta ima, jatunpaq qhawasqanta rikuchirqa?
16 Wawaspis, Jesusmanta mayta yachakuyta atinkuman. Payqa, Josetawan Mariatawan, kasukurqapuni (Lucas 2:51, ñawiriy). Chantapis, juchasapa kaptinkupis, payta uywanankupaq Dios kamachisqanta yacharqa, chayraykutaq tatasninta jatunpaq qhawarqa (Deu. 5:16; Mat. 15:4). Jesús jatunyaspañaqa, Tatanta tukuy imapi kasukurqa, chantapis juchaman urmananpaq tanqasqa kaspapis mana urmarqachu (Mat. 4:1-10). Qamrí, ¿tatasniykita kasukunkipunichu? ¿Imaynatá Jesusjina ruwawaq?
17, 18. a) ¿Imaynatá waynasta chayri sipaskunata compañerosninku juchaman urmachiyta munanku? b) ¿Imataq juchaman mana urmanankupaq yanapanqa?
17 Ichapis yachaywasimanta compañerosniyki, Bibliap nisqanta mana yachayta munankuchu. Paykunaqa, ichá mana allin kaqta ruwanaykita nisunkuman, mana kasuptiykitaq asipayasunkuman. ¿Imatá ruwanki paykunata mana kasukusqaykirayku imastapis nirparisuptinku? Mana imatapis nichikuyta munasqaykirayku paykunata kasunki chayqa, tatamamaykita, Jehovata ima, llakichinki. Chantapis, ¿imatá tariwaq compañerosniykita kasuspa? Ichapis, precursor, betelita chayri siervo ministerial kayta munanki, chayri maypichus mana achkha willaqkuna tiyan, chayman Diosmanta willamuq riyta munanki. Yachaywasimanta compañerosniykiwan masichakuptiyki, ¿Diospaq astawan llamkʼayta munallawaqpunichu?
18 Wayna chayri sipas, iñiyniyki pisiyananpaqjina imallapis rikhuriptinqa, Jesusmanta yuyarikuy. Payqa, juchaman urmananpaq tanqasqa kaspapis, mana urmarqachu, imatachus yachakusqanpitaq, sinchita sayarqa. Paymanta yachakuspaqa, compañerosniyki mana allin ruwayman tanqasuptinkupis mana urmankichu. Qampis, Jesusjina Jehová Diosta wiñaypaq kasukuspa kusisqa kanaykipi tʼukuriy (Heb. 12:2).
¿Imaynatá familianchikwan kusisqa kawsakusunman?
19. ¿Imataq kusisqa kawsakunapaq yanapawasun?
19 Jehová Dioswan Jesuswanqa, allinninchikta munanku. Chayrayku, juchasapas kaptinchikpis, kusisqa kawsayta atisunman (Isa. 48:17, 18; Mat. 5:3). Jesusqa, discipulosninman kusisqa kawsanankupaq imachus yanapasqanta yachachirqa, imaynatachus allin kawsayta tarinankutapis. Payqa, kusisqa kawsanapaq imatachus ruwanata, imaynatachus yuyanata ima, sumaqta rikuchirqa. Jesuspa ruwasqanmanta, tukuy yachakuyta atisuman. Chayrayku, qusas, warmis, tatas, wawas ima, ¡Jesusmanta yachakuna! Paymanta yachakuptinchik, ruwasqanta ruwaptinchik ima, familianchikwan kusisqa kawsakuyta atisunchik.
¿Kutichiykunata yachankichu?
• Qusas, ¿imaynatá umajina kayninkuta allinta apaykachankuman?
• ¿Imaynatá warmis, Jesusjina ruwankuman?
• Jesús imaynatachus discipulosninta qhawasqanmanta, ¿imatá tatas yachakunkuman?
• ¿Imatataq waynas, sipaskuna ima, Jesusmanta yachakunkuman?
[Tapuykuna]
[8 paginapi dibujo/foto]
Qusa imatapis familianpaq ruwayta munachkaspa, ¿imatá ñawpaqta ruwanan tiyan?
[9 paginapi dibujo/foto]
Cristiana warmiqa, qusanpa nisqanta jatunpaq qhawasqanta tukuy imaymanamanta rikuchiyta atin
[10 paginapi dibujo/foto]
Wawasqa, tatasninkup allin ruwasqankuta ruwanku