JEHOVAP kamachisninpataqa, Diosta yupaychaymanta achkha imas unaymantapacha kapuwanchik. Chaykunataq mana publicacionesllapichu waqaychasqa kan manaqa, fotospi, cartaspi, hermanos kawsayninkumanta willarisqankupi, wak imas kaqpi ima. Chaykunataq Diosta yupaychayninchikmanta, willasqanchikmanta, imastachus unaymantapacha ruwakusqanmanta ima kanku. Chaykunata jallchʼay, riqsiytaq, ¿imapí yanapawanchik? Unay tiempoqa, israelita tatas wawasninkuman leyesta, Jehovap tʼukuna ruwaykunasninta ima yachachinanku karqa, paykunapis “Diospi atieneku[nankupaq]” (Sal. 78:1-7).

Waqaychasqa imasmanta yachayqa, unaymantapacha Jehovap munaynin juntʼakunanpaq yanapan. Sutʼincharinapaq, Diospa llaqtanpa enemigosnin Jerusalén templo ruwakuchkasqanta sayachiyta munaptinku, Mediap capitalnin Ecbátana llaqtap waqaychasqa qillqasninta maskʼakurqa. Chaypitaq rey Cirop documentonta tarirqanku, maypichus templota watiqmanta ruwanankuta kamachirqa (Esd. 6:1-4, 12). Dios munasqanmanjinataq templo ruwakullarqapuni. Evangelista Lucaspis tiemponmanta waqaychasqa qillqaspi maskʼallarqataq “tukuy imasta allinta entiende[nanpaq] imaschus qallariymantapacha kasqanta” (Luc. 1:1-4).

Diospa Llaqtanta Kamachiqkunaqa, Diospa llaqtan imaynachus qallarisqanmanta mayta yachayta munanku. Juknin hermano, Diosta yupaychaymanta imasta  jallchʼaymanta, riqsichiymanta ima parlaspa nirqa: “Maymanchus richkasqanchikta yachanapaqqa, maymantachus jamusqanchiktaraq yachana”. Chayrayku Jehovamanta sutʼinchaqkunap centralnin, mayqinchus Nueva Yorkmanta Brooklynpi kachkan, Qillqaqkunap Waqaychasqasnin nisqa departamentota kunallanraq rikhurichin. Chaytataq Qillqaqkunapaq Comisión kamachin.

“FOTO JALLCHʼANA”, UNAYMANTA IMASPIWAN

Juk tiempopi imatachus ruwasqanchikqa qunqayman ripun, chayrayku familianchikmanta yuyarikunapaq imatapis jallchʼakuyta munanchik. Qillqaqkunap Waqaychasqasnin nisqa departamentopis Diosta yupaychaymanta imaschus kasqanta, documentosta ima waqaychanankupaq mayta llamkʼachkanku. Chaypi fotosta sumaqta waqaychasqankuqa, familianchikpa “foto jallchʼanan” kasqanta nisunman. Chantapis Qillqaqkunap Waqaychasqasninpiqa, ñawpaq kaq publicacionesta, hermanos kawsayninkumanta qillqasqankuta, wak imastapis jallchʼakullantaq. Tukuy chaykunaqa, Diosta yupaychayninchikpi imaschus kasqanta riqsinapaq, imatachus qhipapaq suyakusqanchikpi atienekunapaq ima yanapawanchik.

Torremanta Qhawaq revistapi, “Waqaychakusqanmanta” yachaqana lluqsimunqa chayniqta, Qillqaqkunap Waqaychasqasninta riqsinaykichikta munayku. Sutʼincharinapaq, juk revistap yachaqananpi kay tapuykunaman kutichikunqa: ¿Imataq “libro carrito” karqa? ¿Pikuná apaykachaq kanku? ¿Maykʼaqmantapachataq apaykachakurqa, imapaqtaq?

Familianchikmanta yuyarikunapaq imallatapis jallchʼakunchik jinallataq, Qillqaqkunap Waqaychasqasninpipis jallchʼakun. Chaypiqa, ñuqanchikmanta, unay tiempopi hermanosninchikmanta ima sutʼinchawanchik. Creeyninkuta, mana manchachikuq kasqankuta, munakuyniyuq Tatanchikta yupaychaspa kusiyta tarisqankuta, imaspichus rikukusqankuta, Dios llaqtanta yanapasqanta, kallpachasqanta ima yuyarichiwanchik (Deu. 33:27). Diosta yupaychaymanta imasta jallchʼanapaq, mayta llamkʼakuchkasqanta Jehová bendecinanpi atienekunchik. Chayqa jukchawanchik, munayninta ruwananpaqtaq yanapawanchik.

[31 paginapi recuadro, dibujo/foto]

¿Imastataq ruwakunqa?

Publicacionesta, DVD nisqasta, Bibliamanta wak yachachiykunata ima wakichikuchkaptinqa, qillqaqkuna, imatapis sumaqta ruwaqkuna, ukhunchaqkuna, wak yanapaqkuna ima, qillqasqasta waqaychakun chaypi maskʼanku. Chayrayku Qillqaqkunap Waqaychasqasninpi, unay tiempomanta tukuy laya imasta tantakun, jallchʼakun ima. Chaytataq sucursales, Betelpa departamentosnin, qutuchakuykuna, instituciones, wak lugares ima apachimurqanku. Imastachus ruwasqankuta qhawarina.

Maymantachus tarikusqan, sumaqta qhawarikusqan ima. Sapa kuti wak yachaqanas yapakullanpuni. Chaykunamanta achkhastataq familianku unayña Jehovata yupaychachkanku chaykuna, regalanku chayri mañarinku. Chay yachaqanasta sumaqta qhawarispa, kikincharispa ima, imaschus unaymantapacha ruwakusqanta, chaykunata rikuqkunata ima astawan riqsinchik.

Sukʼakusqan. Achkha imasta tantakun, wakintaq pachakmanta aswan watasniyuqjinaña kanku. Chay imas tukuy laya, jatuchaq, juchʼuysitus, kasqanrayku sumaqta sukʼakunan tiyan, qhipaman chaykunata qhawakunanpaq.

Allinchakusqan, waqaychakusqan ima. Librosta, chantá imanarpakunanpaqjina imasta, allinchakun, sumaqtataq waqaychakun. Documentosta, fotosta, periódico kʼutusqasta, peliculasta, uyarinapaq grabasqasta ima, computadoraman churakun. Ajinamanta waqaychasqa kaqkunata mana kuyuchispalla, computadoraniqta qhawayta atikun.

Jallchʼakusqan, mana chinkachikusqan ima. Waqaychasqasninchikpi imastaqa, mana chaqrutachu jallchʼakun, mana chinkananpaqjinataq waqaychakun, ajinamanta kʼanchay mana imanananpaq, nitaq ismunanpaq. Chaykunata usqhayllata tarikunanpaq, ñawpa imasninchikta mana chinkachikunanpaq ima, imaschus, maypichus kasqanta ima allinta anotakuchkan.

[32 paginapi dibujos/fotos]

1. “Foto-Drama de la Creación” nisqapaq willay. 2. Waqaychakusqanmanta documentos. 3. Parlanteyuq auto. 4. Watch Tower 15 abril 1912 revistap tapan. 5. J. F. Rutherford carcelpi kasqanmanta willay. 6. WBBR radiomanta micrófono. 7. Fonógrafo nisqa. 8. Libro maleta. 9. Jukpa qillqasqan. 10. J. F. Rutherfordpaq telegrama.