1, 2. a) ¿Imayna Diostaj Jehová Israel llajtapaj karqa? b) ¿Imatá kay yachaqanapi ukhunchasun?

NEHEMIASPA tiemponpeqa, uj qotu levitas tukuypa uyarinanta Diosmanta mañakorqanku, nerqankutaj ñaupa tatasninku kutin kutita Diospa kamachiykunasninta mana “kasuyta” munasqankuta. Chaywanpis, Jehovaqa kutin kutita rikucherqa “khuyakuyniyoj, kʼacha sonqoyoj, llampʼu sonqo, imamantapis mana usqhayta phiñarparikojlla, manachayqa khuyakuypeqa jatun” kasqanta. Aswan qhepamanpis, wata runa kasqankumanta kutimojkunaman, qhasilla kʼacha yanapayninta rikuchillarqapuni (Neh. 9:16, 17).

² Sapa ujninchej kayta tapurikuna: “¿Jehová perdonayta yachasqanwan imaynatá yanapachikuyman?”, nispa. Chay tapuyman kutichinapaj, iskay reyesman imaynatachus Dios khuyakuyninta rikuchisqanta qhawarina. Ujqa David karqa, ujnintaj Manasés.

3-5. ¿Imaynamantá David mayta juchallikorqa?

³ Davidqa Diosta manchachikuspapis, jatun juchaspi urmarqa. Iskay juchaspi urmasqantaj, Uriasta wañuchichisqan chantá Betsabewan puñuykusqan karqa. Chaytaj kinsantinkupaj llakiyta apamorqa. Chaywanpis, imaynachus David cheqanchasqa kasqanqa, Diospa perdonninmanta mayta yachachiwanchej. Chayta astawan ukhuncharina.

⁴ Davidqa israelita soldadosta, wañuchinaku maqanakuman Rabá llajtaman kacharqa. Chay llajtataj Ammón llajtaj capitalnin karqa, Jerusalenpa inti llojsimuyninmantataj 80 kilometrospi jina kasharqa, Jordán mayumanta aswan jaqaynejpi. Chaykamataj, Davidqa kamachinan wasi altos patapi puriykachashaspa,  Betsabeta mayllakushajta rikuykorqa, qosantaj maqanakupi kasharqa. Chay warmiwan puñuykuyta munaspataj pusamunankuta kamacherqa, ajinamanta Betsabewan qhenchachakorqa (2 Sam. 11:1-4).

⁵ Chantataj Betsabé wijsallisqa kasqanta yachaspa, qosan Uriasta wajyacherqa Jerusalenman kutimunanpaj, warminwan puñuykunanta yuyaspa. Uriastaj, David wasinman ripunanta nejtinpis, mana wasinman yaykullasqapischu. Chayrayku, Davidqa pakayllamanta uj cartanejta soldadosta kamachejman nerqa Uriasta “ñawpaj puntapi sinchʼi maqanaku kashan, chayman” churananta, chantapis sapanta saqerparinankuta nerqa chaypi enemigosqa payta wañuchinankupaj. Uriasqa David munasqanman jina, maqanaku patapi wañorqa (2 Sam. 11:12-17). Ajinamanta, mana khuchichakullarqachu manaqa mana juchayoj runata wañuchicherqa.

6. a) ¿Imatataj Dios ruwarqa David mayta juchallikojtin? b) Chayta ruwasqan, ¿imatá Jehovamanta yachachiwanchej?

⁶ Jehovaqa tukuy imata rikusqanrayku, imatachus David ruwasqanta yacharqa (Pro. 15:3). David aswan qhepaman Betsabewan casarakojtinpis, “chay jinata ruwasqanqa Tata Diospaj mana allinchu karqa” (2 Sam. 11:27). ¿Imatá Dios ruwarqa David chay jinata juchallikojtin? Profetan Natanta kacharqa, “perdonaj Diosmin kasqanrayku”, khuyakunanpaj imallatapis paypi tariyta munaspa. Chayta ruwasqan, ¿manachu mayta sonqochawanchej? Diosqa mana Davidta juchanta rimarinanpaj tanqarqachu, astawanqa Natanta kacharqa, David mayta juchallikusqanta reparakunanpaj jina parlajta (2 Samuel 12:1-4 leey). Chayta ruwaspaqa imaynachus Davidpa sonqon kashasqanta yacharqa.

7. ¿Imatá David nerqa Natanpa cuentasqanta uyariytawan?

⁷ Davidqa Natanpa cuentasqanta uyarispa, cheqan kajta ruwayta munarqa. Payqa Natán parlasqan qhapaj runapaj mayta phiñakuspa nerqa: “Diospa sutinrayku jurani: Chayta ruwajqa wañuchisqapuni kanan tiyan”, nispa. Chantapis, chay wajcha runaman pagakunan kasqanta nerqa. Chaywanpis Natán nerqa: “Qanmin chay runaqa kanki”, nispa. Chayta uyarispa Davidqa ni imanakuyta aterqachu. Natantaj David juchallikusqanrayku, wasinpi “wañuchinakus” mana chinkananta, familianpi uj jatun llakiy kananta ima willarqa. Chantapis, juchasninrayku tukuypa rikunanta pʼenqaypi rikhurinan karqa. Davidtaj mayta juchallikusqanta reparakuspa, llakiywan nerqa: “Tata Diospa contrampi juchallikuni”, nispa (2 Sam. 12:5-14).

8, 9. ¿Imaynatataj 51 Salmo imaynachus David kashasqanta rikuchin, imatataj Jehovamanta yachachiwanchej?

⁸ David sonqomantapacha pesachikusqanqa 51 Salmota qhelqasqanpi rikukun. Chaypi Jehovamanta mayta mañakusqantaj, juchasninta rimarisqanta, mayta pesachikusqanta ima rikuchin. Payqa Jehovawan allinpi kaymanta astawan llakikorqa. Chayrayku nerqa: “Contraykipi juchallikorqani, qampa contrallaykipi”, nispa. Chantá jinata mañakorqa: “Diosníy, llimphu sonqota qoway. Ukhuypi mosoj cheqan espirituta churay [...] Watejmanta kutichimpuway salvacionniykimanta kusikuyta. Kʼacha sonqoyojta sayachiway”, nispa (Sal. 51:1-4, 7-13). ¿David jinachu noqanchejpis pantasqanchejmanta Jehovaman willakunchej?

⁹ Jehovaqa Davidta mana jarkʼarqachu juchallikusqanrayku ñakʼariykunapi rikukunanmanta, chay ñakʼariykunatataj wañupunankama muchunan karqa. Chaywanpis,  “llakiywan pʼakisqa sonqota”, mayta pesachikusqanta ima rikuspa Davidta perdonarqa (Salmo 32:5 leey; Sal. 51:17). Rikunchej jina, tukuy atiyniyoj Diosqa imatachus yuyasqanchejta, imaraykuchus juchaman urmasqanchejtapis yachan. Chayrayku, mana saqerqachu Davidta Betsabetawan runaslla juzganankuta. Runasqa Moisespa Leyninman jina juzgaspa, qhenchachakusqankumanta wañunankuta ninkuman karqa. Chayrayku Jehová kikin juzgaspa paykunamanta khuyakorqa (Lev. 20:10). Chantapis, wawanku Salomón Israelpi kamachinanta nerqa (1 Cró. 22:9, 10).

10. a) ¿Imaraykutaj Jehová Davidta perdonanman karqa? b) ¿Imatataj ruwananchej tiyan Jehová juchanchejta pampachananpaj?

¹⁰ Chantapis, ichá Jehová Davidta perdonarqa Davidpis Saulmanta khuyakusqanrayku (1 Sam. 24:4-7). Jesusqa, runa masinchejta perdonasqanchejman jina Jehová perdonawasqanchejmanta jinata nerqa: “Ama wajkunata juchachaychejchu, ama qankunapis juchachasqa kanaykichejpaj. Imaynatachus wajkunata juchachankichej, ajinallatataj qankunapis juchachasqa kankichej. Ima chimpuwanchá wajkunaman midinkichej, chayllawantaj qankunaman midisonqachej”, nispa (Mat. 7:1, 2). Qhenchachakuyman chayri runata wañuchiy juchaman urmajtinchejpis, Jehová juchasninchejta pampachasqanta yachayqa, ¡mayta sonqochawanchej! Chaywanpis, wajkunata perdonajtinchej, juchanchejta rimarejtinchej, yuyayninchejta tijrachejtinchej imalla juchanchejta pampachanqa. Sonqomantapacha pesachikoj runapajqa, Jehovamanta kallpa jamojtin “allin kawsay” tiyan (Hechos 3:19, 20 leey).

11. ¿Ima sajra ruwaykunatataj Jehovaj ñaupaqenpi Manasés ruwarqa?

¹¹ Manasesmantañataj parlarina. Kausaynenqa Jehová jatun juchastapis perdonasqanta rikuchin. Manasesqa Judapi kamachiyta qallarerqa David kamachiyta qallarisqanmanta 360 watasninman jina. Manasés 55 watasta kamachisqanpeqa sajra imasllata ruwarqa, Jehovataj chay ruwasqasninmanta juchacharqa. Imajtinchus, Baal lantispaj altaresta jataricherqa, “cielopi tukuy chʼaskas[ta]” yupaycharqa, churisninta uywa wañuchisqata jina qʼolacherqa, layqa ruwaykunatataj ruwacherqa. Arí, “Tata Diospa ñawpaqempi sinchʼi sajrapuni ruwasqasnenqa karqa” (2 Cró. 33:1-6).

12. ¿Imaynatataj Manasés Jehovaman kutirikorqa?

¹² Aswan qhepaman, Manasesqa Babiloniapi presochasqa karqa, llajtanmanta may karupi. Ichapis chaypi kashaspa, Moisés  israelitasman nisqanta yuyarikunman karqa, pichus nerqa: “Tukuy kay llakiy phutiykunapis chayamusojtiykichej, [...] qankuna Tata Diosman kutirikuspa payta kasunkichej”, nispa (Deu. 4:30, 31). Arí, Manasesqa Jehovaman kutirikorqa. ¿Imatá ruwarqa? “Mayta kʼumuykukuspa” qhaparikorqa, mañakullarqapunitaj (21 paginata qhawariy) (2 Cró. 33:12, 13). Manasés imatapunichus chay kutipi nisqantaqa mana yachanchejchu. Chaywanpis, David 51 Salmopi nisqanmanchá rijchʼakorqa. Arí, Manasesqa yuyayninta tijracherqa.

13. ¿Imaraykutaj Jehová Manasesta perdonarqa?

¹³ ¿Imatá Jehová Manasés mañakojtin ruwarqa? “Chay mañakusqanta” uyarerqa. Manasesqa David jinallataj jatun juchaspi urmasqanta reparakorqa, sonqomantapachataj pesachikorqa. Chayrayku, Jehovaqa perdonaspa “Jerusalenman kutichimporqa, rey jina kamachinallampajpuni”. Ajinamanta “Manasesqa yacharqa Tata Diosqa Diospuni kasqanta” (2 Cró. 33:13). Khuyakuyniyoj Diosninchej pesachikojkunata perdonasqanta yachayqa, ¡mayta sonqochawanchej!

14. ¿Imatataj Jehová qhawan juchanchejta perdonananpaj?

¹⁴ Kay tiempopeqa, Jehovaj kamachisninmanta wakillan, David jina chayri Manasés jina jatun juchaspi urmanku, Jehovamantataj perdonta mañakunanku tiyan. Jinapis, chay iskay reyespa kausayninkoqa Jehová jatun juchastapis perdonananpaj wakichisqa kasqanta rikuchin. Chaypajtaj, sonqomantapacha pesachikunanchej tiyan.

15. ¿Imataj Jehová mana tukuy juchastachu perdonasqanta rikuchin?

¹⁵ Chaywanpis mana nisunmanchu, Jehová tukuy runaspa juchasninkuta perdonasqanta. Sutʼincharinapaj, Davidwan Manaseswan imaynatachus yuyasqankuta, Israelmanta Judamanta kʼullu runaspa yuyasqankutawan kikincharina. David juchallikojtin, Diosqa Natanta kacharqa paywan sutʼimanta parlamunanpaj, yuyayninta  tijrachinanta suyaspa; Davidtaj chaymanta mayta agradecekorqa. Manasespis llakiypi rikukuspa, sonqomantapacha pesachikorqa. Israelpi Judapi tiyakojkunatajrí, juchasninkumanta mana pesachikuspa juchallikullarqankupuni. Chayrayku, Jehová mana paykunata perdonarqachu. Astawanqa, chay sajra ruwayninkumanta imatachus yuyasqanta kutin kutita profetasninnejta willacherqa (Nehemías 9:30 leey). Babiloniamanta llajtankuman kutinpusqankutawanpis, willajkunata kachallarqapuni. Chaykunamanta iskaytaj, sacerdote Esdras, profeta Malaquías ima karqanku. Israelitas Diosta kasukojtinkoqa, kusisqa kausakoj kanku (Neh. 12:43-47).

16. a) ¿Imataj Israel llajtawan karqa mana pesachikusqankurayku? b) ¿Imatataj ñaupa Israel llajtaj mirayninmanta sapa uj tariyta atinku?

¹⁶ Jehovaqa Jesusta Jallpʼaman kachamorqa, Jesustaj runasta juchamanta kacharichinanpaj kausayninta qorqa; chaymantapacha Jehovaqa uywa wañuchisqa jaywanasta niña allinpajchu qhawan (1 Juan 4:9, 10). Jesusqa imatachus Jehová Jerusalenmanta yuyasqanmanta nerqa: “Jerusalén, Jerusalén, profetasta wañuchej, qanman kachamusqastapis rumiswan chʼanqaj llajta. Mashkha kutitachus wawasniykita tantayta munarqani, imaynatachus wallpa chillwisninta lijrasnin uraman tantaykun, ajinata, qantajrí mana munarqankichu. Qhawaychej: Wasiykichejqa chʼusajpacha qhepakonqa”, nispa (Mat. 23:37, 38). Chay juchasapa llajtaj cuentanmantaqa, Diospa nacionnin mosoj Israel rikhurerqa (Mat. 21:43; Gál. 6:16). Ñaupa Israel llajtaj mirayninmantarí, ¿imatá nisunman? Sapa ujninku Jehovaj perdonninta, khuyakuyninta ima tariyta atinku, chaypajtaj Diospi, Jesucristoj wañuyninpi ima creenanku tiyan. Juchasninkumanta mana pesachikuspa wañojkunapis, sumaj Jallpʼaman kausarimojtinku Jehovaj perdonninta tariyta atenqanku (Juan 5:28, 29; Hech. 24:15).

17, 18. ¿Imatataj Jehovaj perdonninta tarinapaj ruwananchej tiyan?

¹⁷ Jehová juchasta pampachananpaj wakichisqa kasqanrayku, ¿imatá ruwananchej tiyan? David jina chantá Manasés jina kananchej tiyan. Arí, juchallikusqanchejta reparakuna, pesachikuna, Jehovamantataj perdonta, llimphu sonqotawan mañakuna (Sal. 51:10). Jatun juchapi urmanchej chaytaj, ancianosmanta yanapata mañakunanchej tiyan (Sant. 5:14, 15). Chantá, ima juchapi urmajtinchejpis, Jehovaqa Moisespa tiemponpi jinallapuni kakushasqanta yuyarikuna. Arí, payqa “wiñaypaj Dios, khuyakuyniyoj, kʼacha sonqoyoj, llampʼu sonqo, imamantapis mana usqhayta phiñarparikojlla, manachayqa khuyakuypeqa jatun, jinallataj cheqa kaypipis. Khuyakuynenqa waranqa waranqa runaspaj, pampachallantaj tukuy sajra kayninkuta, contrampi oqharikusqankuta, juchasninkuta ima” (Éxo. 34:6, 7).

¹⁸ Jehovaqa pesachikoj israelitasman juchasninkuta perdonananta nishaspa, kayta nerqa: “Juchasniykichejqa may jina pukapis kachunku, ritʼi jina yuraj kanqanku”, nispa (Isaías 1:18 leey). Jina kajtin, ¿maykamataj Jehová perdonawanchej? Agradecekusqanchejta, pesachikusqanchejta ima rikuchejtinchejqa, juchasninchejta, pantasqasninchejtapis qʼalata pampachan.

19. ¿Imatataj qhepan yachaqanapi yachakusun?

¹⁹ Jehová juchasninchejta pampachajtin, ¿imatá noqanchej runa masinchej pantajtin ruwananchej tiyan? ¿Imataj yanapawasun jatun juchapi urmajkunata pesachikojtinku perdonanapaj? Qhepan yachaqanaqa, imachus sonqonchejpi kasqanta reparakunapaj yanapawasun. Ajinamanta Tatanchej Jehovaman astawan rijchʼakusun, pimantachus uj salmista nerqa: “Qanqa kʼacha kanki, perdonanapaj wakichisqa”, nispa (Sal. 86:5).