ASHKHA jóvenes Jehovata astawan sirvinankupaj kausayninkuta tijrachisqankuta rikoyqa mayta kusichiwanchej (Mat. 6:22). ¿Imastá tijrachinanku karqa, ima chʼampaykunapitaj rikukunku? Chayta yachanapajqa wakin hermanosmanta parlarina, pikunachus Mexicopi sirvishanku.

Dustinwan Jassawanqa Estados Unidosmanta kanku, 2007 watapitaj casarakorqanku. Pisi tiemponmantaj watata tiyakunankupaj uj barcota rantikorqanku, chaytapunitaj munasharqanku. Chay barcoqa Estados Unidospi tarikoj Astoria nisqa kʼacha llajtitapi, océano Pacífico qayllapi sayasqa kasharqa, mayqenchus monte lomasniyoj, ritʼi orqosniyojtaj. Dustin nin: “Chay llajtitaqa kʼachitupuni karqa”, nispa. Paykunaqa Jehovapi atienekushasqankuta, kapusqallankuwan kausashasqankuta ima yuyarqanku. Imajtinchus pusaj metrosniyoj jina barcollapi tiyakorqanku, kausakunankupajtaj semanapi wakin horasllata llankʼakoj kanku. Chantapis waj qalluta parlaj qotuchakuyman risharqanku, wakin kutitaj precursores auxiliares ima kaj kanku. Chaywanpis, mana allintachu ruwashasqankuta reparakorqanku. Dustin nin: “Qotuchakuypi llankʼanaykumantaqa barcoykuta allinchaspalla kaj kayku. Chayrayku, Jehovata yupaychayta  ñaupajman churanaykupaj kausayniykuta tijrachinayku kasqanta reparakorqayku”, nispa.

Jassa nillantaj: “Niraj casarakushajteyqa Mexicopi karqani, inglés qotuchakuymantaj rej kani. Chaypi sirveyqa kusa karqa, kutiytapunitaj munarqani”, nispa. Dustinwan Jassawanqa sonqonku aysakunanpaj, pisi willajkunalla tiyan chayman ripoj hermanospa kausayninkumanta familiapi Diosta yupaychayninkupi leeyta qallarerqanku (Juan 4:35). Dustin nin: “Noqaykupis paykuna jinallataj kusisqa kayta munarqayku”, nispa. Mexicopi tiyakoj amigosninku chay kutillaraj rikhurej qotu yanapata necesitasqanta nejtinku, paywan warminwanqa chayman ripunankuta nerqanku. Chaypajtaj llankʼayninkuta saqeporqanku, barconkutapis venderparqanku.

Dustinwan Jassawanqa Tecomán nisqa llajtaman riporqanku. Chay llajtaqa océano Pacífico nisqa qayllallapitaj tarikun, chaywanpis Astoriaj uranejninmanta 4.300 kilometrospi jina. Dustin nin: “Karqayku chaypeqa kʼacha wayrita kaj, kʼachitu lugartaj karqa, chaywanpis qʼoñi lugarman riporqayku maypichus limón sachʼas juntʼa tiyan”, nispa. Qallariypeqa mana llankʼayta tariyta aterqankuchu, pisi qolqeyoj kasqankuraykutaj sapa semana arroztawan chuwillatawan pʼunchaypi iskay kutita mikhukoj kanku. Jassa nin: “Kikillanta mikhuspa amichikushajtiykuña Bibliamanta yachachishasqayku runas mangosta, platanosta, papayasta, bolsa juntʼa limonesta ima qoriwaj kayku”, nispa. Pisi tiemponmanqa Taiwanpi tarikoj escuelapaj Internetnejta waj qallusta yachachispa llankʼayta qallarerqanku. Ganakusqankuwantaj kausakuyta atillanku.

Chaywanpis, ¿kusisqachu kausakunku? Paykuna ninku: “Kayman jampusqaykoqa ni imawan kikinchakunchu. Jehovaman astawan qayllaykuyku, qhariwarmi jinataj yuyasqaykumantapis aswan sumajta kausakuyku. Sapa pʼunchay imatapis khuskapuni ruwayku: willaj llojsiyku, tantakuykunapaj wakichikuyku, Bibliamanta yachachishayku chay runasta imaynatachus yanapanaykumantataj parlarikuyku. Chantapis niña ñaupajta jinachu llakikuyku”, nispa. Chantá nillankutaj: “Kunanraj Salmo 34:8 nisqan ajinapuni kasqanta sutʼita rikuyku. Chaypi nin: ‘Qhawaychej, yachaychejtaj Tata Diosqa kʼacha kasqanta’”, nispa.

Mexicopi pisi willajkunalla tiyan chay llajtitasmanqa ashkha soltero hermanos, hermanas, casarasqas ima ripunku. Tukuyninkutaj 2.900 kuraj kanku, 20 watasniyojmantapacha 40 watasniyojkama. ¿Imaraykutaj chay chhika hermanos chayta  ruwashanku? Paykunamanta wakinta tapukusqanman jinaqa kinsa imasrayku chayta ruwashanku.

Jehovata, runa masinkuta ima munakusqankurayku. Leticiaqa, pichus 18 watasniyoj kashaspa bautizakorqa, nin: “Jehovaman qokuspaqa tukuy sonqoywan, tukuy almaywan sirvinay kasqanta yacharqani. Chayrayku, astawan tiempochakuyta, kallpachakuyta ima munarqani, ajinamanta mayta munakusqayta rikuchinaypaj”, nispa (Mar. 12:30). Hermilotaj, pichus kunan Leticiaj qosan, 20 kuraj watasniyoj jina kashaspa pisi willajkunalla karqa chayman riporqa. Pay nin: “Runa masiyta munakusqayta rikuchinaypajqa paykunaman Diosmanta yachachinay kasqanta repararqani”, nispa (Mar. 12:31). Chayraykutaj Monterrey nisqa jatun llajtamanta, maypichus uj bancopi llankʼaj, tukuy ima patapitaj kausakoj, uj juchʼuy llajtitaman riporqa.

Cheqamanta wiñaypaj kusisqa kausakuyta munasqankurayku. Leticiaqa bautizakusqanmanta pisi tiemponman, unayña kaj precursorawan uj juchʼuy llajtitaman willaj rerqa, maypichus killata kamorqanku. Leticia nin: “Tʼukunapaj jinapuni kasqa. Runas sumajta uyariwasqaykuta rikuspa mayta kusikorqani. Killa tukukuytataj, ‘kaytapuni ruwayta munani’ nispa nikorqani”. Esslypis ajinallapitaj rikukorqa, payqa 20 kuraj watasniyoj jina soltera hermana. Payqa waj hermanosta kusisqata rikuspa pisi willajkunalla tiyan chayman ripuyta munarqa. Colegiopiraj kashaspa chayta ruwaj ashkha hermanosta rejserqa. Pay nin: “May kusisqa kasqankuta rikuspa, noqapis paykuna jina kayta munarqani”, nispa. Ashkha hermanaspis Essly jinallataj ruwanku. Mexicopeqa pisi willajkunalla tiyan chay lugarespi 680 soltera hermanasmanta astawan sirvishanku. Paykunamantaqa joven kaspapis chayri kuraj kaspapis, ¡mayta yachakusunman!

Sonqo juntʼasqa kausakuyta munasqankurayku. Esslymanqa colegiota tukuchasqantawan universidadpaj uj becata qoyta munarqanku. Waj jovenesqa japʼikunallanta, tukuy runas jinataj kausakunanta nerqanku: nisunman universidadman rinanta, profesionniyoj kananta, autota rantikuspataj tukuynejta rejsinanta. Chaywanpis Esslyqa mana chaytachu ruwarqa. Pay nin: “Qotuchakuymanta ashkha amigosneyqa chayta ruwarqanku, niñataj Diosta yupaychayta ñaupajmanchu churarqanku. Chantapis, kay pachaj imasninwan apachikusqankuman jina aswan qʼasa sonqos, saykʼusqataj qhepakorqanku. Noqaqa sipas kashaspa Jehovata astawan sirviyta munarqani”, nispa.

Esslyqa kausakunanpaj, precursorataj kananpaj uj oficiota yachakorqa. Chaymantataj pisi willajkunalla  tiyan chayman riporqa. Chantapis iskay qallusta yachakorqa, otomí chantá tapanco nisqa qallusta. Kinsa watataña karu lugarespi willasqanpi tʼukurispa Essly nin: “Pisi willajkunalla tiyan chaypi willaspaqa sonqo juntʼasqa, kusisqataj kani, Jehovamanpis astawan qayllaykuni”, nispa. Phillipwan Racquelwantaj, pikunachus 30 kuraj watasniyoj jina kanku, kikillantataj yuyanku. Chay qhariwarmeqa Estados Unidosmanta, ninkutaj: “Kay pacha astawan sajrayashasqanrayku runasqa manchachikunku. Chaywanpis noqaykoqa Bibliamanta yachachisqaykuta ashkha lugarespi runas uyarisqankutaraj rikuspa, sonqo juntʼasqa kayku. Ruwashasqaykoqa mana qhasipajchu”, nispa.

Pisi willajkunalla tiyan chay lugarespi willayqa mana atikullanchu. Sutʼincharinapaj, imawanchus kausakunapi tʼukurina tiyan, chaypajtaj uj llajtitapi imaynatachus kausakusqankuman yachakunapaj kallpachakuna. Veronicaqa, pichus unayña precursora, nin: “Uj llajtitapeqa mikhunata baratollapi vendej kani, waj llajtitapitaj pʼachata vendej kani, chujchatataj kʼutoj kani. Kunanqa uj wasita llimphuchaspa llankʼani, chantapis mosoj tatasman imaynatachus wawasninkuwan parlanankuta yachachini”, nispa.

Imaynatachus uj llajtitapi kausakusqankumanqa ichapis mana yachakuyta atillasunmanchu, astawanraj karuman ripuspaqa. Ajinapi rikukorqanku Phillipwan Racquelwan, pikunachus náhuatl nisqa qalluta parlaj karu llajtitaman riporqanku. Phillip nin: “Imaynatachus kausakusqankoqa waj jina karqa”, nispa. ¿Imaynatataj chayman yachakorqanku? Pay nin: “Chay llajtitamanta runas kʼachas kasqankupi astawan yuyaj kayku: familiasninku ujchasqa kasqankupi, mana puraj uyachu kasqankupi, astawanpis qorikoj runas kasqankupi”, nispa. Racquel nin: “Chaypi kausakuspa, chay lugarmanta hermanoswan khuska Jehovata yupaychaspa ima, ashkha imasta yachakorqayku”, nispa.

Ichapis karu llajtitaman ripuypi yuyashanki. Chaywanpis, ¿imaynatá chaypaj wakichikushawajña? Karu llajtitaman ripoj hermanosqa manaraj ripushaspa kausayninchejta tijrachinata, kapuwasqallanchejwan kausakunata ima ninku (Fili. 4:11, 12). ¿Imastawantaj ruwawaj? Leticia nin: “Uj llajtallapi unayta qhepakunaypaj jina llankʼaytaqa mana japʼikojchu kani. Ima ratollapis wajnejman ripunaypaj ni ima japʼinawanta munarqanichu”, nispa. Hermilo nin: “Pʼachata tʼajsayta, planchayta, waykʼuyta ima yachakorqani”, nispa. Veronicapis nin: “Familiaywan tiyakushaspaqa llimphuchaypi yanapakoj kani chantá sumajta waykʼuyta, qolqesituta jallchʼakuyta ima yachakorqani”, nispa.

Leviwan Ameliawanqa Estados Unidosmanta kanku, pusaj watañataj casarasqa kashanku. Paykunaqa Diosmanta sutʼita mañakusqanku Mexicopi sirvinankupaj yanapasqanta ninku. Levi nin: “Uj watata waj suyupi sirvinaykupaj mashkhatachus necesitasqaykuta allinta qhawarikorqayku. Chantataj chay qolqesituta tantarikunaykupaj Jehovaj yanapayninta mañakorqayku”, nispa. Mashkha killasninmantaj chay qolqesituta tantarikusqankuña, chayrayku waj suyuman riporqankupacha. Levi nin: “Jehovaqa mañakusqaykuman kutichispa nisqanta juntʼarqa, kunanqa noqaykuñataj nisqaykuta juntʼanayku karqa”, nispa. Ameliataj nin: “Watallata qhepakunaykuta yuyaspapis qanchis watataña kaypi kashayku, nitaj ripuypi yuyashaykuchu. Kaypeqa Jehovaj yanapayninta, kʼacha kasqanta ima aswan sutʼita rikuyku”, nispa.

Adamtawan Jennifertawanpis Diosmanta mañakuy mayta yanapallarqataj. Chay qhariwarmeqa Estados Unidosmanta, Mexicopitaj inglés qotuchakuypi kashanku. Paykuna kayta yuyaycharinku: “Ama suyaychu kausayniyki allinraj kanantaqa. Karu llajtapi sirviyta munashasqaykita Jehovaman willay, mañakusqaykiman jinataj ruway. Kausayniykita tijrachiy, ima suyupichus sirviyta munanki chay sucursalmantaj qhelqay. Mashkhatachus necesitasqaykita qhawarikuytawantaj nisqaykiman jina ruwaypacha”, nispa. * Jinata ruwanki chayqa kusisqa kanki, Jehovata yupaychaypitaj may sumaj risonqa.