1, 2. 1) ¿Imastaj Colosaspi kaj qotuchakuyta tʼaqanachisharqa? 2) ¿Imatataj Pablo yuyaycharqa Colosasmanta cristianosman?

ÑAUPA cristianospa tiemponkupi, Colosas llajtapi kaj qotuchakuymanta wakin hermanosqa, Moisespa Leyninta kasukunapuni kasqanta nerqanku. Wakinkunataj ni imawan sonqota kusirichinachu kasqanta nerqanku. Chay yachachiykuna qotuchakuyta tʼaqanachishasqanrayku, Pablo nerqa: “Allinta qhawakuychej: Pajtataj pipis pantachisunkichejman llulla yachachiykunawan, qhasi manakaj parlaykunawan ima. Yachachiyninkoqa mana Cristomantachu jamun, manachayqa ñawpa runaspa yachachiynillankumanta, kay pachapi atiyniyoj kamachejkuna sajra espiritusmantapis”, nispa (Col. 2:8).

² Colosasmanta ajllasqa cristianos ‘kay pacha imasllapi’ yuyaspaqa, imatachus Dios paykunata salvananpaj ruwasqanta qhesachashankuman karqa (Col. 2:20-23). Diosmanta mana karunchakunankupajtaj, Pablo paykunaman “janaj pacha imaspi yuyaychej, ama kay pacha imaspeqa”, nispa yuyaycharqa (Col. 3:2, 3). Arí, ajllasqa cristianosqa, “may sumaj imas janaj pachapi [paykunapaj] waqaychasqa” kasqanpi yuyananku karqa (Col. 1:4, 5).

3. 1) ¿Imatataj ajllasqa cristianos suyakushanku? 2) ¿Imastataj kay yachaqanapi yachakusunchej?

 ³ Kay tiempopipis ajllasqa cristianosqa, janaj pacha imaspi, “Cristowan khuska herenciata” japʼiyta suyakuypi ima yuyanku (Rom. 8:14-17). ¿Kay Jallpʼapi wiñaypaj kausakuyta suyakojkunarí? ¿Ima ninayantaj paykunapaj Pabloj yuyaychasqan? ¿Imaynatá paykuna janaj pacha imaspi yuyankuman? (Juan 10:16.) Abrahamwan Moiseswan chʼampaykunapi rikukuspapis, janaj pacha imaspi yuyarqanku. ¿Imatá paykunamanta yachakusunman?

4. ¿Imaynatá kay Jallpʼapi kausakuyta suyakojkuna janaj pacha imaspi yuyasunman?

⁴ Kay Jallpʼapi kausakuyta suyakojkunapis janaj pacha imaspi yuyayta atinku. ¿Imaynatá chayta ruwankuman? Jehovata, Reinonta ima ñaupajman churaspa (Luc. 10:25-27). Jesuspis chayta ruwarqa, noqanchejpis chayllatataj ruwananchej tiyan (1 Ped. 2:21). Ñaupa tiempomanta hermanosninchej jina llulla yachachiykunata, kapuyniyoj kayta munapayayta, Satanaspa pachanpa yuyayninta ima atipananchej tiyan (2 Corintios 10:5 leey). Chayrayku Jesús jina ruwanachej, Dioswan allinpi kasqanchejtapis tukuy imamanta jarkʼanachej.

5. ¿Imatataj tapurikusunman kay pachamanta runas jina mana yuyanapaj?

⁵ ¿Kay pachamanta runas jinachu qolqeta, kapuyniyoj kayta ima qhawashanchej? ¿Imaynatá yachasunman imatachus astawan ñaupajman churashasqanchejta? Imapichus yuyashasqanchejta, imatachus ruwashasqanchejta ima sumajta qhawarikuspa. Jesús nerqa: “Maypichá kapuyniykichej kashan, chayllapitaj sonqoykichejpis kanqa”, nispa (Mat. 6:21). Maypichus sonqonchej kashasqanta yachanapajqa, sapa kuti qhawarikunanchej tiyan. Chaypajtaj tapurikusunman: “¿Imapitaj astawan yuyashani? ¿Qolqellapichu? ¿Sumaj llankʼayta tariyllapichu? ¿Negociosta ruwayllapichu? ¿Kapuyniyoj runa jina kausakullaypichu? Chayrí Dioswan allinpi kanaypaj, ¿kallpachakunichu kapuwasqallaywan kausakunaypaj?”, nispa (Mat. 6:22). Jesús nerqa jina, kay pachapi kapuyninchejta tantaspaqa Diosmanta karunchakuyta atisunman (Mat. 6:19, 20, 24).

6. ¿Imatá ruwasunman sajra munayninchejwan mana atipachikunapaj?

⁶ Tukuypis pantaj runas kasqanchejrayku usqhayllata juchaman urmayta atisunman (Romanos 7:21-25 leey). Jehovaj espiritun mana yanapawasunmanchu chayqa, “laqhayaypa ruwanasninta” ruwayman urmasunman. Chaykunataj kanku “imaymana millay machaykuna[...], imaymana willay kausay[...]” ima (Rom. 13:12, 13). Sajra munayninchejwan mana atipachikunapajqa, janaj pacha imaspi yuyananchej tiyan. Chayrayku apóstol Pablo nerqa: “Cuerpoyta ni imarayku saqenichu munayninta ruwajta, manachayqa tukuy imapi kasuchikuni”, nispa (1 Cor. 9:27). Sutʼita reparanchej Dioswan allinpi kanapajqa, sajra munayninchejwan mana atipachikunapaj kallpachakunanchej kasqanta. Kunantaj qhawarinachej imatachus Moiseswan, Abrahamwan Diosman cheqa sonqosllapuni kanankupaj ruwasqankuta (Heb. 11:6).

7, 8. 1) ¿Imaspitaj Abrahamwan Sarawan rikukorqanku llajtankumanta llojsipuytawan? 2) ¿Imapitaj Abraham yuyarqa?

⁷ Abrahamqa, Jehová Canaán llajtaman tukuy familianwan ripunanta nejtin  tukuy sonqo kasukorqa. Jehovaqa, Abraham creeyniyoj, kasukoj kasqanta rikuspa, paywan uj tratota ruwarqa. Nerqataj: “Mirayniykimanta ruwasaj uj jatun nacionta. Bendecisqayki”, nispa (Gén. 12:2). Watas pasasqanman jinataj Abrahamwan Sarawanqa manapuni wawasniyojchu karqanku. Paykunaqa ichapis yuyarqanku Dios nisqanta qonqakapusqanta. Chantapis nichá qhapaj Ur llajtapi familiaresninkuta, wasinkuta ima saqerpariyta atillarqankuchu. Canaán llajtaman chayanankupajtaj 1.600 kilometrosta rerqanku, toldospi tiyakorqanku, yarqhaypi rikukorqanku, suwaswanpis tinkorqanku (Gén. 12:5, 10; 13:18; 14:10-16). Ajinapis paykunaqa Ur llajtaman kutiyta mana yuyallarqankupischu (Hebreos 11:8-12, 15 leey).

⁸ Abrahamqa kay pacha imaspi yuyananmantaqa, Jehovapi creerqa (Gén. 15:6). Janaj pacha imaspitaj yuyarqa, nisunman Diospa nisqasninpi. Jehovataj creeyninrayku bendicerqa. Abrahamman rikhurispataj nerqa: “Qhawariy allinta cielota; ichapis atiwaj yupayta chʼaskasta. Ajina kanqa qampa mirayniyki, mana yupay atina”, nispa (Gén. 15:5). Abraham, Jehová nisqanta uyarispa repararqa paymanta mana qonqakapusqanta. Sapa kuti tutasninpi cielota qhawarispa, imatachus Dios nisqanta yuyarikunman karqa. Tiemponmantaj Jehová nisqanman jina Abrahamqa wawayoj karqa (Gén. 21:1, 2).

9. ¿Imaynatá Abraham jina ruwasunman?

⁹ Noqanchejpis Abraham jinallataj Jehová Diospa nisqasnin juntʼakunanta suyashanchej (2 Ped. 3:13). Chayta suyaspa mana saykʼunapaj, sonqo kʼajaywan Diosta yupaychanapaj ima, janaj pacha imaspi yuyana. Ichapis unay, precursor jina llankʼanaykipaj, chayri imallatapis astawan Diospaj ruwanaykipaj mayta kallpachakorqanki. Chayta ruwasqaykeqa may sumaj. Kunanrí, ¿jinallatapunichu kallpachakushanki? Kayta yuyarikuna: Abrahamqa Diosta sirvillarqapuni “sumaj cimientosniyoj llajta[pi]”, aswan qhepaman bendicionesta japʼinanpi ima yuyaspa (Heb. 11:10). Diospi “creesqanraykutaj Diosqa cheqan runapaj Abrahamta qhawarqa” (Rom. 4:3).

10. ¿Imaynataj Moisespa kausaynin Egiptopi karqa?

¹⁰ Moisespis janaj pacha imasllapitaj yuyarqa. Payqa Egiptota kamachejpa familianmanta karqa. Chay kutipi Egiptoqa pachantinmanta may atiyniyoj suyu karqa. Biblia nisqanman jinataj Moisesqa, “yachachisqa karqa Egipto runaspa tukuy yachachiyninkupi”. Chayrayku Moisesqa “may sumaj atiyniyoj karqa parlanapaj, ruwanapaj ima” (Hech. 7:22). Moisesqa, ajina yachachisqa kasqanrayku, Egiptopi may rejsisqa runaman tukunman karqa. Chaywanpis payqa chayta mana ruwarqachu, astawanpis Diospa munayninta ruwaypi yuyayninta churarqa.

11, 12. ¿Ima yachachiytaj Moisespaj aswan sumaj karqa, imaynatataj chayta rikucherqa?

¹¹ Moisesmanqa, wawallaraj kashajtin maman Jocabed Jehovamanta yachacherqa. Chayrayku Moisespaj, Jehovamanta yachakusqan aswan sumaj karqa imamanta nisqapis. Chayraykutaj qhapaj kayta, atiyniyoj kamachej kayta ima qhesacharqa (Hebreos 11:24-27 leey). Wawamantapacha yachakusqan, Jehovapi creesqan ima, janaj pacha imaspi yuyananpaj yanaparqa.

 ¹² Moisesqa, Egiptopi yachakusqanta mana may rejsisqa, atiyniyoj, kapuyniyoj kananpaj imachu apaykacharqa. Biblia nin jina, payqa “mana munarqachu Faraonpa ususimpa churin nisqa kayta. Astawanqa, Diospa ayllunwan khuska ñakʼarichisqa kayta ajllakorqa, manataj munarqachu pisi pʼunchaykunapaj kusikuspa jucha kawsaypi puriyta”. Aswan qhepamantaj imatachus Jehovamanta yachakusqan Israel llajtata pusananpaj yanaparqa.

13, 14. 1) ¿Imatataj Moisés ruwanan karqa niraj israelitasta kacharichishaspa? 2) ¿Imatataj noqanchejpis Moisés jina ruwananchej tiyan?

¹³ Moisesqa Jehovata, Egiptoj atiyninpi kaj Israel llajtata ima munakorqa. Tawa chunka watasniyoj kashaspataj israelitasta Egiptoj atiyninmanta kacharichinanpaj wakichisqa kasqanta yuyarqa (Hech. 7:23-25). Chaywanpis Jehovaqa sumajta yacharqa Moisés manaraj wakichisqachu kasqanta. Imaraykuchus Moisesqa kʼumuykukuyniyoj, pacienciayoj, llampʼu sonqoyoj kayta, sajra munayninwan mana atipachikoj kayta ima yachakunanraj karqa (Pro. 15:33). Aswan qhepaman chʼampaykunapi, llakiykunapi rikukojtintaj chay kʼacha kaykunaqa mayta yanapanman karqa. Chaykunata rikuchinanpajtaj tawa chunka watasta ovejasta michiy yanaparqa.

¹⁴ Arí, michej jina llankʼayqa Moisesta maytapuni yanaparqa. Biblia nin jinataj, “Moisesqa aswan llampʼu sonqoyoj karqa, kay pachapi tukuy runasmanta nisqaqa” (Núm. 12:3). Llampʼu sonqoyoj kasqantaj israelitaswan pacienciakunanpaj yanaparqa, imaraykuchus israelitasqa sapa uj imaymana chʼampaykunasniyoj karqanku (Éxo. 18:26). Noqanchejpis “jatun ñakʼariy” tiempopi mana wañunapaj, mosoj pachaman yaykunapaj ima, Moisés jina kʼacha kaykunata rikuchinanchej tiyan (Apo. 7:14). ¿Tukuy runaswanchu allinta kausakunchej? ¿Allintachu kausakunchej usqhayllata phiñakuspa jinanku chaykunawanpis? Apóstol Pedro nerqa: “Tukuy runasta sumajpaj qhawaychej. Hermanosta munakuychej”, nispa (1 Ped. 2:17).

15, 16. 1) ¿Imaraykutaj patapi kaj imaspi yuyananchej tiyan? 2)  ¿Imaraykutaj allin kausayniyoj kananchej may sumaj?

¹⁵ “Manchay sajra pʼunchaykuna[pi]” kausakushanchej (2 Tim. 3:1). Chayraykutaj Diospa qayllallanpipuni kanapaj, patapi kaj imaspi yuyananchej tiyan (1 Tes. 5:6-9). Imaynatachus chayta ruwananchejtataj kinsanejmanta qhawarina.

¹⁶ Kausayninchej: ¿Imaraykutaj allin kausayniyoj kananchej may sumaj? Pedro nerqa: “Allinta kawsakuychej mana creejkuna ukhupi. [Ajinamanta paykuna, Diosta] jatunchanqanku, allin ruwasqasniykichejta rikuspa”, nispa (1 Ped. 2:12). Wasipi kashaspa, llankʼaypi kashaspa, escuelapi kashaspa, sonqonchejta kusirichishaspa, willashaspa ima, Diosta jatunchanapaj jina kausakunanchej tiyan. Chaywanpis pantaj runas kasqanchejrayku pantanchejpuni (Rom. 3:23). Jinapis “creeyrayku, chay sumaj tinkuypi kallpaku[llasunpuni]” chayqa, sajra munayninchejta atipasunchej (1 Tim. 6:12).

17. ¿Imaynatataj Jesús jina ruwasunman? (28 paginapi dibujota qhawariy.)

¹⁷ Yuyayninchej: Allinta kausakunanchejqa imaynachus yuyayninchej kasqanmanta kashan. Apóstol Pablo nerqa: “Imayna yuyaywanchus Cristo Jesús kawsarqa, kikillantataj qankunapis kawsaychej”, nispa (Fili. 2:5). ¿Imaynataj Cristo karqa? Llampʼu sonqo. Chayraykutaj  Jehovapaj tukuy atisqanta llankʼarqa. Sumaj willaykunatapis mayllapipis willarajpuni (Mar. 1:38; 13:10). Diospa Palabranta jatunpaj qhawasqanraykutaj chayllamanta yachachej (Juan 7:16; 8:28). Diosmanta Qhelqasqasta ukhunchasqanraykutaj, imatachus nisqanta oqharej, wajkunaman rikuchej, sutʼinchaj ima. Cristo jina yuyanapajqa, llampʼu sonqowan, sonqo kʼajaywan ima Diosmanta willamuna, sapallanchejpitaj Bibliata ukhunchana.

18. ¿Ima ruwaypitaj yanapakusunman?

¹⁸ Yanapakusqanchej: Diosqa munan “Jesuspa sutimpi qonqorik[unankuta] janaj pachapi tukuy kajkuna, kay pachapi kajkuna” ima (Fili. 2:9-11). Jesusqa janaj pachapi jatun kayniyoj kaspapis, llampʼu sonqowan Tatanpa makinman churakun. Noqanchejpis Jesús jina kananchej tiyan (1 Cor. 15:28). ¿Imaynatá chayta ruwasunman? Jehovaj munayninman jina tukuy laya runasta Jesuspa yachachisqasninman tukuchiypi yanapakuspa (Mat. 28:19, 20). Chantapis allin imasta tukuy runaspaj ruwaspa, hermanosninchejpaj ima (Gál. 6:10).

19. ¿Imata ruwanapajtaj kay yachaqana yanapawanchej?

¹⁹ Jehovaman mayta agradecekuna janaj pacha imaspi yuyayninchejta churana kasqanta yuyarichiwasqanchejmanta. Chaykunapi yuyaspallapuni tukukuykama “ñawpajllamampuni tʼijunachej” (Heb. 12:1). Tukuy sonqo allinta ruwanachej Jehovapaj jina. Chayta ruwajtinchejtaj, Jehová bendeciwasunchej (Col. 3:23, 24).