JULIAN nin: “Kuraj waway qotuchakuymanta qharqochikusqanta qotuchakuypi willakojtin, ni imanayta aterqanichu. Iskayniykutaj imatapis ruwaj kayku. Payqa kʼacha karqa, jinallapitaj sajra imasta ruwayta qallarerqa. Warmeyqa mayta waqaj, manataj sonqochayta atejchu kani. Tapukojtaj kayku, imapichus tatas jina pantasqaykuta”, nispa.

Uj hermanota qotuchakuymanta qharqokojtin may llakiy kajtinpis, ¿imaraykutaj chayta ruwakusqan Jehovaj munakuyninta rikuchin? ¿Imaraykutaj Biblia chayta kamachin? ¿Imaraykutaj uj hermano qharqosqa kanman?

Uj hermanoqa, jatun juchata ruwasqanrayku, chay juchanmanta mana pesachikusqanrayku ima qotuchakuymanta qharqochikunman.

Jehová Diosqa, mana juntʼa runas kananchejtachu suyan, chaywanpis kamachiykunasninta kasukunanchejta suyan. Sutʼincharinapaj, Payqa niwanchej mana khuchichakunata, mana lantita yupaychanata, mana suwakunata, mana runata wañuchinata, mana layqa kanata, mana chʼaukiyanata ima (1 Cor. 6:9, 10; Apo. 21:8).

Jehovaj kamachiykunasnenqa, juntʼayta atinapaj jinalla, allinninchejpajtaj kanku. Tukuypis mana chʼajwata maskʼaj runaswan, atienekunapaj jina runaswan tiyakuyta munanchej. Ajina runastataj qotuchakuyllapi tariyta atinchej, imaraykuchus Diosman qokushaspa Palabranpi nisqanman jina kausakunanchejta nerqanchej.

Chantá, ¿imataj kanman uj bautizasqa cristiano jatun juchata ruwajtin? Ñaupa tiempomanta Diospa cheqa sonqo kamachisninpis jatun juchata ruwallarqankutaj, jinapis Diosqa mana wiñaypajchu paykunata qhesacharqa. Rey Davidpi tʼukurina. Payqa qhenchachakorqa, runata wañucherqa, chaywanpis profeta Natán nerqa: “Diosqa chay juchaykita pampachan”, nispa (2 Sam. 12:13).

Diosqa Davidta perdonarqa juchanmanta tukuy sonqo pesachikusqanrayku (Sal. 32:1-5). Kunanpis jatun juchata ruwaj hermano pesachikun, sajra ruwayninta saqen ima chayqa qotuchakuymanta mana qharqochikunchu (Hech. 3:19, 20; 26:20). Chaywanpis mana pesachikunchu chayqa, juzganapaj comisionpi kaj ancianos chay hermanota qotuchakuymanta qharqonanku tiyan.

Ajinata ancianos qharqosqankurayku ichá qallariypi yuyasunman mana munakuyta rikuchisqankuta, astawanraj chay qharqochikoj familianchej kajtin chayri amigonchej kajtin. Chaywanpis Diospa Palabranqa rikuchiwanchej chayta munakuyrayku ruwasqankuta.

Jesusqa runaj “yachaynenqa ruwasqasnimpi rejsichikun”, nerqa (Mat. 11:19). Juchanmanta  mana pesachikojta qharqoyqa, may sumaj, imaraykuchus chayqa juchallikojta yanapan. Kunantaj kinsa imasta qhawarinachej:

Juchallikojta qharqoyqa, Diospa sutinta jatunchan. Diospa sutinwan rejsisqa kasqanchejmantapacha, ruwayninchej Jehovata jatunchanman chayri pisipaj qhawachinman (Isa. 43:10). Imaynatachus wawaspa ruwayninku tatasninta jatunchanman chayri pisipaj qhawachinman, ajinallatataj Diospa llajtan ruwayninwan Diosta jatunchanman chayri pisipaj qhawachinman. Diospa sutinwan rejsichikojkuna kamachiykunasninman jina kausakunku chayqa, Diospa sutinta jatunchanku. Ezequielpa tiemponpipis ajinallataj karqa, runasqa judiosmanta parlajta uyarispa Diospa sutinmanta parlakushasqanta yuyaj kanku (Eze. 36:19-23).

Khuchichakusunman chayqa, Diospa sutinta chʼichichasunman. Apóstol Pedro yuyaycharqa: “Kasukoj wawas jina kaychej, amataj sajra munayniykichejman jinachu kawsaychej, mayqenchus qankunapi karqa manaraj Diosta rejsishajtiykichej, chayman jinaqa. Qankunata wajyaj Diosqa may santomin; ajinallatataj qankunapis juchamanta tʼaqasqa santos kaychej tukuy kawsakuyniykichejpi. Diosmanta Qhelqasqapi Diosqa nin: Juchamanta tʼaqasqa santos kaychej, imaraykuchus noqa may santomin kani”, nispa (1 Ped. 1:14-16). Llimphu kausayninchejqa, Diospa sutinta jatunchan.

Sichus Jehovaj ujnin testigon sajra kajta ruwallanpuni chayqa, ichapis amigosnin chayri rejsisqasnin reparanqanku. Juchallikojta qotuchakuymanta qharqokusqanqa, Jehová llimphu llajtayoj kasqanta rikuchin, mayqenchus llimphu kanallanpajpuni leyesninta kasukun. Uj kuti mana rejsisqa runa Suiza suyupi Tantakuna Wasiman jamorqa, Diospa llajtanmanta kayta munasqantataj nerqa. Chay runaj hermananqa khuchichakuy juchapi urmasqanrayku qotuchakuymanta qharqochikusqa. Chay runa nerqa sajra ruwaykunata qhesachaj llajtapi kayta munasqanta.

Qotuchakuymanta qharqokusqanqa, qotuchakuy llimphu kananpaj yanapan. Apóstol Pabloqa Corintopi kaj hermanosman yuyaycharqa, juchankumanta mana pesachikojkunata qotuchakuypi mana qhawanallankuta. Imaraykuchus wajkunatapis kikinta ruwanankupaj tanqanman, chayrayku chayta uj levadurawan kikincharqa, nerqataj “pisi levaduralla tukuy masata poqochi[sqanta]”. Chayrayku hermanosman nerqa: “Qankunaqa chay juchallikojta chawpiykichejmanta qharqoychej”, nispa (1 Cor. 5:6, 11-13).

Pablo nisqanman jinaqa, chay “juchallikoj[...]” khuchichakusharqa. Qotuchakuymanta wajkunapis paykuna ukhupi kajta saqellarqanku (1 Cor. 5:1, 2). Chay khuchichakoj runata qotuchakuymanta mana qharqonkumanchu karqa chayqa, wajkunapis chay llajtamanta khuchichakoj runas jina ruwayta munankuman karqa. Chay jina kausayta qhawallayqa mana Jehovaj kamachiykunasninman jinachu (Ecl. 8:11). Juchankumanta mana pesachikojkunaqa “yacupi pacaska rumis [jina] cancu”, mana reparayllata wajkunaj creeyninkuta pantachinku (Jud. 4, 12, Mosoj Testamento, 1956).

Qotuchakuymanta qharqokusqanqa juchallikojta yanapanman yuyayninman churakunanpaj, pesachikunanpaj ima. Uj kuti Jesusqa, uj waynamanta parlarqa, chay waynaqa wasinmanta ripuspa tukuy herencianta tukucherqa “mana allinta kausaspa”. Chay waynaqa ñakʼarisparaj yachakorqa wasinmanta ripusqan mana allinchu kasqanta. Yuyayninman churakuspa, pesachikuspa ima, wasinman kutiporqa (Luc. 15:11-24). Jesusqa uj kʼacha tata wawan pesachikuspa kutinpusqanrayku kusikusqanmanta parlarqa, chaytaj yanapawanchej imaynachus Jehová kasqanta yachanapaj. Astawanpis Jehová nin: “Mana munanichu juchasapa runa wañunanta, astawanqa munani sajra ruwanasninmanta kutirikamuspa kawsananta”, nispa (Eze. 33:11).

Ajinallataj qharqochikojkunaqa, manaña qotuchakuymantachu kasqankurayku imastachus chinkachisqankuta reparayta atinkuman. Juchallikusqankurayku ñakʼarisqanku, Dioswan, llajtanwan ima allinpi kashaspa kusikusqankuta yuyarisqanku imaqa, yuyayninkuman churakunankupaj yanapanman.

 Juchallikoj pesachikunanpajqa munakuyta rikuchina, ancianos qharqoyta ajllasqankutataj jatunpaj qhawana. David nerqa: “Cheqan runaj jasutʼiwasqanqa allimpaj kanqa; kʼamiwasqanqa kʼacha qʼapaj jampi jina kanqa”, nispa (Sal. 141:5).Chayta astawan entiendenapajqa, uj runa uj onqoyrayku operachikunan kasqanpi tʼukuriy. Chay runaqa nanaywan mana samaytapis, ni parlaytapis atishanñachu. Mana operachikojtenqa ichá wañunman. Chayrayku uj doctor mana wañunanpaj operan. Operachikusqan nanajtinpis doctorqa mana wañunanpaj yanapan. Ajinallatataj Davidqa cheqan runaj jasutʼisqan nanachejtinpis allinninpaj kasqanta repararqa.

Wakin kutis juchallikojqa qotuchakuymanta qharqosqa kayta necesitan. Julianpa wawanqa chunka watamanta jina kausayninta Bibliaj nisqanman jina allincharqa, qotuchakuymantaj kutinporqa, kunantaj anciano jina llankʼashan. Pay nin: “Qotuchakuymanta qharqochikusparaj, sajra imasta ruwasqayta repararqani, qharqonawankutapuni necesitarqani”, nispa (Heb. 12:7-11).

Uj runata qotuchakuymanta qharqokusqan llakichiwajtinchejpis, mana yuyananchejchu tiyan tukuy imapis chaypi tukukapusqanta. Chantapis tukuy yanapakuyta atinchej, juchallikoj pesachikunanpaj.

Ancianosqa Jehová jina munakuyta rikuchinankupaj kallpachakunku, juchanmanta mana pesachikojman qotuchakuymanta qharqosqa kananta willanankupaj. Juchallikojman qharqosqa kananta willashaspa, kʼachallamanta sutʼita sutʼinchanku imatachus qotuchakuyman kutinpunanpaj ruwanan kasqanta. Ancianosqa, qharqochikojkuna kausayninkuta tijrachishasqankuta rikuspa, Jehovaman kutirikunankupaj imatachus ruwananku kasqanta yuyarichej sapa kuti rinkuman. *

Familiamanta kajkuna qotuchakuymanta kajkunata, qharqochikojta ima munakusqankuta rikuchinkuman ancianospa nisqankuta kasukuspa. Julian nin: “Wawayta munakuspapis, sajra imasta ruwasqanrayku mana ñaupajta jinachu paywan kaj kani”, nispa.

Qotuchakuymanta tukuyninchej qharqochikojman munakuyta rikuchisunman paywan mana parlaspa (1 Cor. 5:11; 2 Juan 10, 11). Ajinamanta Jehová ancianosnejta juchallikojta qotuchakuymanta qharqosqanta jatunpaj qhawanchej. Chantapis qharqochikojpa familiaresninman ñakʼarishasqankurayku astawan munakuyta rikuchisunman, yanapasunman ima. Nitaj noqanchejmanta karunchakunanku kasqanta yuyachinachu (Rom. 12:13, 15).

Julian nin: “Juchallikojta qotuchakuymanta qharqoyqa, Jehovaj leyesninman jina kausakunapaj yanapawanchej. Imaraykuchus qotuchakuymanta qharqochikuy llakiy kajtinpis, tiempo pasasqanman jina uj sumaj yanapa. Chayrayku wawayta sajra imasta ruwajta saqellayman karqa chayqa, ni jaykʼaj Jehovaman kutirikunmanchu karqa”, nispa.