2 Diosta allinta riqsiy

“Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis.” (Juan 17:3.)

¿IMARAYKUTAQ MANA ATIKULLANCHU? Imaraykuchus kay tiempopi runasqa, Diosmanta mana kikintachu yuyanku. Wakinkunaqa, pay mana kasqantachu ninku. Wakinkunataq juk kallpalla kasqanta ninku. Wakinkunataqrí, Dios may yachayniyuq kasqanta nispapis, pichus, chantá imaynachus kasqanmanta, mana kikintachu yuyanku.

¿IMAYNAMANTÁ DIOSTA ALLINTA RIQSISUNMAN? Apóstol Pablo nirqa: “Diospa mana rikukoj imasnenqa sutʼita rikuchikunku paypa ruwasqasninnejta, kay pacha ruwakusqanmantapacha. Chaykunaqa kanku: Wiñay atiynin, Dios kasqan ima”, nispa (Romanos 1:20). Kay pʼiti nisqanmanjina Diospa ruwasqasninpi tʼukurispaqa, payta astawan allinta riqsisunman. Arí, Diospa ruwasqasninta rikuspaqa, Pay may yachayniyuq, may atiyniyuq kasqanta ima reparasunman (Salmo 104:24; Isaías 40:26).

Chantá Diosta astawan riqsinanchikpaq, Bibliata ñawirinanchikpuni tiyan. Wakkuna yuyasqankumanjinalla yuyananchikmantaqa, Diosmanta  imatachus Biblia nisqanta ukhunchananchikqa aswan allin. Biblia nin: “Ama kay pacha runaspa yuyasqankuman jina kausayman yachakuychejchu; astawampis sonqoykichejpi, yuyayniykichejpi ima mosojyachisqa kaychej. Ajinapi yachankichej imaynachus Diospa munaynin kasqanta kʼacha, Diosta kusichej, juntʼasqataj”, nispa. (Romanos 12:2). Chayrayku kunan imatachus Biblia nisqanta qhawarisunchik.

Diosqa sutiyuq. Biblia qillqakuchkaptin Diospa sutinqa, waranqa kutis rikhurirqa, kunan tiempopipis achkha Bibliaspiqa Diospa sutin achkha kutista rikhurillantaq, kay Quechua de Cuzce Bibliapijina, maypichus kay Salmo 83:18 pʼitipi nin: “Yachachuncu kan, Jehová sutiyoj, Kanlla Altísimo caskayquita tucuy caypacha patapi”.

Jehovata mana kasukuspaqa Paypa sunqunta nanachisunman. Ajinatataq israelitas ruwarqanku. Jehová paykunata Egipto llaqtamanta kacharichiptinpis, achkha kutispi Payta mana kasukurqankuchu. Chay ruwasqanku, ¿Jehovap sunqunta nanachirqachu? Arí, Biblia nin: “Mashkha kutista Diospa contrampi sayaykorqanku [...]. Israelpa santo Diosnimpa sonqonta nanacherqanku”, nispa (Salmo 78:40, 41).

Jehovaqa, sapa jukninchikmanta dakun. Chaytataq Jesús discipulosninman sutʼincharqa, nirqataq: “Manachu iskay pʼisqetustapis vendenku phatallapi? Chaywampis, Dios Tataykichej mana munajtenqa, ni uj pʼisqetullapis jallpʼaman urmanchu. Ajinallatataj, umaykichejpi chujchasniykichejpis tukuyninku yupasqa kashanku. Chayrayku ama manchachikuychejchu. Qankunaqa pʼisqetusmanta nisqaqa aswan valorniyoj kankichej”, nispa (Mateo 10:29-31).

Diosqa mana wakin runasllatachu allinpaq qhawan. Apóstol Pablo nirqa: “Payqa uj runallamanta tukuy runasta miracherqa, paykuna kay pachaman juntʼanankupaj”, nispa. Chantapis “Diosqa mana karupichu kashan sapa ujninchejmanta”, chayrayku payman qayllaykuyta atinchik (Hechos 17:26, 27). Apóstol Pedropis nillarqataq: “Cheqamanta reparani, Diosqa mana wakillantachu allimpaj qhawan, manachayqa mayqen nacionllamantapis picha Diosta manchachikoj, cheqa kajtataj ruwaj runatamin Diosqa allin ñawiwan qhawan”, nispa (Hechos 10:34, 35).

DIOSTA RIQSIY, ¿IMAYNATÁ YANAPAWANCHIK? Diosta astawan riqsispaqa, Payta “tukuy sonqo” ‘chiqa yachaymanjina’ yupaychasunchik (Romanos 10:2). Chantapis Jehovamanta imatachus Biblia nisqanta yachaptinchikqa, ni pi chʼawkiyayta atiwasunchu. Ajinallamanta ‘Diosman astawan qayllaykuyta atisunchik’ (Santiago 4:8).

Astawan yachakunaykipaq ¿Imatapunitaq Biblia yachachin?, libromanta 1 yachaqanata, “Mayqinkunataq Diosmanta chiqa yachachiykuna kanku”, sutichasqata ñawiriy. *

[Sutʼinchaynin]

[6 paginapi dibujo/foto]

Diospa ruwasqasninpi tʼukurispaqa, Payta astawan riqsisunchik