3 Jesusta allinta riqsiy

“Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa.” (Juan 3:16.)

¿IMARAYKUTAQ MANA ATIKULLANCHU? Imaraykuchus kunan tiempopi runasqa, Jesusmanta mana kikintachu yuyanku. Wakinkunaqa, Jesús ni jaykʼaq kawsasqanta ninku. Wakinkunataq mayqin runajinalla kasqanta, ni jaykʼaq kawsarimusqanta ima ninku.

¿IMAYNAMANTÁ JESUSTA ALLINTA RIQSISUNMAN? Natanaeljina ruwasunman. * Amigon Felipeqa, “Josejpa churin Jesús nazarenota tariyku”, nispa payman nirqa. Natanaeltaq, nisqanta mana creespa kutichirqa: “Atinmanchu Nazaretmanta ima allimpis rikhurimuyta?”, nispa. Felipetaq kutichirqa: “Jamuy ari, chanta rikunki”, nispa. Jinamanta Natanaelqa, pay kikinmanta pichus Jesús kasqanta yachayta maskʼarqa (Juan 1:43-51). Ñuqanchikpis, jinallatataq ruwananchik tiyan.

Unay tiempomanta qillqaqkunaqa, Jesús runajinapuni kawsasqanta ninku. Josefowan Tacitowanqa, ñawpa tiempopi may riqsisqa qillqaqkuna karqanku, Jesucristo kawsasqanmantataq parlarqanku. Sutʼinchanapaq, 64 watapi Roma llaqta lawraykusqanmanta cristianosta Nerón juchachasqanmanta qillqachkaspa, Tácito qillqarqa: “Neronqa Roma lawraykusqanmanta cristianosta juchacharqa, imaraykuchus chay tiempopi paykunaqa, pisipaq qhawasqas karqanku Cristop yachachisqanmanjina kawsasqankurayku. Cristotaqa, Romata Tiberio kamachichkaptin, Poncio Pilato wañuchichirqa”.

Chantá juk libro nisqanmanjina, ñawpa siglomanta, iskay kaq siglomanta ima qillqakusqanqa, “ñawpa tiempopi cristianosta qhatiykachaqkunapis, Jesús runajinapuni kawsasqanmanta mana iskaychakusqankuta rikuchin. Chunka pusaqniyuq siglop tukukuyninmantapachallaraq, iskay chunka siglop qallariyninkama, Jesús runajinapuni kawsasqanta runas iskaychachiyta qallarirqanku” (Encyclopædia Britannica, edición de 2002). Estados Unidosmanta juk periódico nin: “Yaqha tukuynin yachayniyuq runasqa, Jesús runajinapuni kawsasqanmanta manaña iskaychakunkuchu”.

Jesús kawsarimusqanmanta. Jesusta presochasqatajina japʼichkaptinku, discipulosninqa saqirparqanku, munasqa discipulon Pedropis presochachikuyta manchachikusqanrayku Jesusta mana riqsisqanta nirqa (Mateo 26:55, 56, 69-75; Mateo 26:31). Chaywanpis Jesús wañupusqanmanta pisi tiempoman, Jesuspa discipulosninqa, mana manchachikuspa Jesusmanta parlayta qallarirqanku. Sutʼincharinapaq,  Pedrowan Juanwanqa, mana manchachikuspa Jesusta wañuchichiqkunap ñawpaqinkupi, Jesusmanta willarqanku. Arí, Jesusmanta willayta mayta munasqankurayku, discipulosninqa Roma llaqtaman chay willaywan juntʼachirqanku. Creeyninkurayku wañunankupaqtaq, wakichisqas kachkarqanku.

¿Imaraykutaq mana manchachikuspa willayta qallarirqanku? Imaraykuchus paykunaqa, kawsarimuq Jesusta rikurqanku. Apóstol Pablo nisqanmanjina Jesusqa, kawsarimuytawan “rikhurerqa Pedroman, chaymantataj chunka iskayniyoj apostolesman. Chay qhepata waj hermanosmampis rikhurillarqataj, phishqa pachaj kuraj tantasqa kashajtinku”. Kay pʼitita Pablo qillqachkaptinqa, kawsarimuq Jesusta rikuqkunaqa kawsachkallarqankuraq (1 Corintios 15:3-7). Iskay runaslla kawsarimuq Jesusta rikunkuman karqa chayqa, achkha cristianos Jesús kawsarimusqanta mana creeyta atillankumanchu karqa (Lucas 24:1-11). Chaywanpis mana iskay discipulosnillanchu Jesusta rikurqanku, manaqa phichqa pachak discipulosnin payta rikullarqankutaq.

JESUSTA ALLINTA RIQSIY, ¿IMAYNATÁ YANAPAWANCHIK? Pikunachus Jesuspi creeqkuna, kamachiykunasnintataq kasukuqkunaqa, juchasninkumanta perdonta tarinku, llimphu concienciayuqtaq kanku (Marcos 2:5-12; 1 Timoteo 1:19; 1 Pedro 3:16-22). Chantá wañupuspapis wañuymanta kawsarimunankuta suyakunku, imaraykuchus Jesús “qhepa kaj pʼunchaypi” wañusqasta kawsarichimunanta nirqa (Juan 6:40).

Astawan yachakunaykipaq ¿Imatapunitaq Biblia yachachin?, libromanta 4, 5 yachaqanasta, “¿Pitaq Jesucristori?” chantá “Dios rantiwasqanchik, Diospa astawan jatun regalon”, sutichasqasta ñawiriy. *

[Sutʼinchaykunasnin]

[7 paginapi dibujo/foto]

Jesusta astawan allinta riqsinanchikpaqqa, Natanaeljina ñuqanchik kikinchikmanta pichus Jesús kasqanta ukhunchananchik tiyan