Diosqa wakcha wawaspa tatanku
Diosman qayllaykuy
Diosqa wakcha wawaspa tatanku
“DIOSQA santo wasimpi tiyakun; payqa wajcha wawaspa Tatanku.” (Salmo 68:5.) Kay pʼitiqa, Jehová Dios wakcha wawasmanta mayta llakikusqanta rikuchiwanchik. Ajinata llakikusqantaq israelitasman Leyta qusqanpi sutʼita rikukun. Chayrayku imatachus chay Leyniqta kamachisqanta kay Éxodo 22:22-24 pʼitispi ñawirinachik, maypichus ‘wakcha wawa’ rimayqa ñawpaq kutillataraq rikhurin. *
Dios nirqa: ‘Ama wakcha wawata llakichinkichikchu’, nispa. Jinata israelitasman nispaqa, mana wakcha wawasmanta khuyakunallankutachu mañakuchkarqa, manaqa juk kamachiyta paykunaman quchkarqa. Imaraykuchus tatankumanta wakchas kaqkunaqa, mana piniyuq, mana qhawaqniyuq, mana wasiman mikhunata apamuqniyuq ima, qhipakunku. Chayrayku Diosqa, ‘ama wakchasta llakichinkichikchu’ nispa nirqa. Kunanqa imaraykuchus kay kamachiyta kasukunanchik kasqanta qhawarinachik.
Jehová nillarqataq: “Sichus qankunaqa paykunata llakichinkichej, noqamantaj qhaparikamuwanku chayqa, paykunata uyarisaj”, nispa. Hebreo simipi kay pʼiti qillqakuchkaptinqa, kay pʼitipi Jehová mana nirqachu “sichus qankunaqa paykunata llakichinkichej” nispaqa, manaqa “sichus qam paykunata llakichinki” nispa nirqa. Kaytaq tukuy Israel llaqta, sapa juk israelita ima, Dios kamachisqanta kasukunan kasqanta rikuchiwanchik. Imaraykuchus Jehová Diosqa, wakchaspa mañakuyninkuta uyarin, paykunata yanapananpaqtaq wakichisqa kachkan (Salmo 10:14; Proverbios 23:10, 11).
Chayrayku israelitas juk wakcha wawata ñakʼarichiptinku, chay wawataq Jehovamanta yanapata mañakuptin, ¿imatá Jehová ruwanman karqa? Payllataq nin: “Phiñakuyneyqa qankunaj contraykichejta kʼajarenqa, espadawantaj wañurachisqaykichej”, nispa. Kay ‘phiñakuy’ rimaymanta parlaspa juk libroqa, ‘sinchi phiñakuy’ kasqanta nin. Chantapis, wakchata ñakʼarichiq runataqa, mana Israelmanta juk juezchu juzganan karqa, manaqa Dios (Deuteronomio 10:17, 18).
Unaymantapacha Jehová Diosqa kikillanpuni (Malaquías 3:6). Chayrayku kunan tiempopipis wakchas payman qhaparikusqankutaqa uyarillanpuni (Santiago 1:27). Chayrayku pikunachus wakcha wawata llakichiqkunaqa, wakcha wawaspa Tatankuta phiñachinku, manataq ‘Diospa kʼajaq phiñakuyninpa pʼunchayninmanta’ ayqiyta atinqankuchu (Sofonías 2:1, 2). Chantapis, “kawsaj Diospa makisninman urmayqa manchariywan kharkatitinapaj” kasqanta yachanqanku (Hebreos 10:31).
[Sutʼinchaynin]
^ párr. 1 Bibliapiqa, ‘wakcha wawa’ rimay, tawa chunka kutisjina rikhurin. Hebreo qallupi kay rimay qhari wawasllamanta parlanapaq uqharikuptinpis, israelitasman Dios Ley qusqanqa, wakcha warmi wawastapis jarkʼallarqataq (Números 27:1-8).