“[Jehová] sonqota qhawan”
Diosman qayllaykuy
“[Jehová] sonqota qhawan”
JUK runaqa kʼacha runaman rikchʼakuspapis, saqra runa kanman. Arí, runaqa ñawisninpa rikusqallanta qhawan, Jehová Diostaqrí, runap sunquta qhawan. Chaytataq 1 Samuel 16:1-12 pʼitikunapi sutʼita rikunchik.
Chay pʼitikuna nisqanmanjina Jehovaqa, Israel llaqtapaq wak reyta akllarqa. Chayrayku profeta Samuelman jinata nirqa: “Riy Isaipa wasinman, Belén llajtaman, imaraykuchus ujnin kaj churinta rey kanampaj ajllaniña”, nispa (1 pʼiti). Jehovaqa mana Samuelman willarqachu Isaipa churisninmanta mayqintachus akllasqanta. Chayrayku ichá Samuelqa, Belenman richkaspa jinata tapurikurqa: “¿Imaynatá yachasaq Isaip wawasninmanta mayqintachus Jehová akllakusqantarí?”, nispa.
Samuelqa, Belenman chayaytawan, Isaita, churisnintawan Diospaq qʼulachinaman waqyarirqa. Chantá Samuelqa, Isaipa kuraq churin Eliabta, allin rikchʼayninta qhawaspa sunqunpi nirqa: “Kaychá kanqa Tata Diospa ajllasqan reyqa”, nispa (6 pʼiti).
Chaywanpis Jehová Samuelta nirqa: “Ama allin rijchʼayninta qhawaychu, nitaj sayaynintapis; paytaqa noqa qhesachani”, nispa (7 pʼiti). Arí, Jehovaqa mana Eliabpa allin rikchʼaynillantachu qhawarqa, imaraykuchus Jehovaqa, ima kʼacha kaykunasniyuqchus pi runapis kasqanta astawan qhawan.
¿Imaraykutaq chayta ninchik? Jehovallataq Samuelman sutʼincharqa: “Runaqa ñawisnimpa rikusqallanta qhawan, noqatajrí mana runa jinallachu qhawani, manachayqa sonqota qhawani”, nispa (7 pʼiti). Arí, Jehovaqa mana rikchʼaynillanchiktachu qhawan, manaqa imayna runachus sunqunchikpi kasqanchiktapis qhawallantaq. Chayrayku Bibliaqa, runap ‘sunqunpi imachus kasqanta’ qhawasqanta nin (Salmo 17:3). Chayrayku Eliabta, suqta hermanosnintapis qhisacharqa.
Chantá Samuelqa Isaita tapurqa: “Manachu astawan churisniyki tiyan”, nispa. Isaitaq kutichirqa: “Uj aswan sullkʼa kaj kanraj; payqa ovejasta michishan”, nispa (11 pʼiti). Chantá Samuelqa Davidta waqyachirqa, chayamusqantawantaq Jehová Samuelta nirqa: “Kaymá chay ajllasqayqa; rey kanampaj aceitewan payta jawiykuy”, nispa (12 pʼiti). Davidtaq “alajito jobero karqa, kʼacha ñawisniyoj, allin rijchʼayniyojtaj”, chaywanpis Jehovaqa, payta akllarqa kʼacha sunquyuq kasqanrayku (1 Samuel 13:14).
Kunan tiempopi runasqa, runaspa allin rikchʼaynillankuta qhawanku. Jehovataqrí sunquta qhawan. Payqa ima kʼacha kaykunasniyuqchus kasqanchikta astawan qhawan. Chayrayku, ¿manachu allin kanman kʼacha kaykunata rikuchinapaq kallpachakunanchik?