Juanpa qhelqasqan Evangelioqa, Jesusmanta iskay juchasapa runasmantawan parlan, paykunaqa rakhu kʼaspispi warkhusqa karqanku. Judiostaj Pilatomanta mañakorqanku, warkhusqaspa chakisninkuta pʼakirachinanta, chaymantataj uraykuchinanta (Juan 19:31).

Wañuchisqa kananpaj jina juchallejtaqa sachʼaman warkhoj kanku. Moisespa leynintaj nej: “Chay ayantaqa ama tutantinta warkhurayashajta saqenkichejchu”, nispa (Deuteronomio 21:22, 23). Romanospa wañuchisqanku runastapis, judiosqa ichá chay ley nisqanman jina, mana tutantintachu saqej kanku. Jesuspata chay iskay runaspatawan chakisninkuta pʼakirajtinkoqa, usqhayllata wañupunkuman karqa, inti niraj yaykupushajtin pʼampanankupaj. Imajtinchus inti yaykupusqantawanqa samarikuna pʼunchay qallarej.

Wañuchisqa kananpaj jina juchallejtaqa, rakhu kʼaspiman chakisninta, makisninta clavaykoj kanku. Chay rakhu kʼaspita sayarichejtinkutaj, runaj cuerpon clavosmanta warkhukamoj. Ajina warkhusqapi samayta atinanpaj, clavasqa chakisninmanraj atiykukunan karqa, chaytaj maytachá nanachej. Chakisninta pʼakirajtinkutaj, manaña samayta atispa usqhayllata wañupoj.

Davidqa uj warakʼawan Goliatta wañucherqa. Payqa ichá ovejasta michishaspa warakʼayta yachakorqa (1 Samuel 17:40-50).

Warakʼaqa unaymanatapacha egipciospa, asiriospa ruwasqasninkupi rikhurin. Ruwajtaj kanku, uj chhikan qaraj chayri telaj puntasninman iskay watusta jina wataykuspa. Warakʼaj runataj, uj naranja chhikan bola rumita warakʼaman churaytawan uma patanpi muyuchej. Chantá ujllata kacharej, rumitaj sonarishaj chinkarej, imallatapis japʼichinanpaj jina.

Oriente Mediopeqa, warakʼanapaj ashkha rumista tarisqanku. Unayqa chaywan maqanakuman rej kanku. Chay tiempomanta soldados warakʼajtinkukama, rumeqa uj ñawi chʼirmiypi 60 metrospi jinaña kashaj. Warakʼaqa, ¿flechana arco jinachu karuman chayachinman? Mana yachakunchu. Jinapis flechana arco jinallataj wañuchiyta atin (Jueces 20:16).