UJ KUTIPI Coreamanta The Chosun Ilbo nisqa periódico kayta nerqa: “Shim Cheongqa tukuywan kʼacha karqa, paytaj Jesusmanta ni imata yacharqachu. Wañuspa, ¿infiernomanchu ripunman karqa?”, nispa.

Runasqa chay periodicoj nisqanta, mana allinpajchu qhawarqanku. Imaraykuchus Shim Cheongqa, Corea cuentospi may kʼachapaj qhawasqa karqa. Payqa ciegoyasqa tatanta yanapananrayku, kausaynintapis qoyta munarqa. Chayrayku Coreamanta runasqa, Shim Cheongpa ruwasqanta jatunpaj qhawanku. Tataspis warmi wawasninku, Shim Cheong jina kanankuta munanku.

Ajina kʼacha runa mana bautizakusqanrayku ichá infiernopi ñakʼarishan nikojtenqa, ashkha runasqa chayta mana allinpajchu qhawanku. Imajtinchus Shim Cheongqa tukuywan kʼacha karqa. Chantapis paypa llajtitanman Jesusmanta yachachiy niraj chayashajtin, chay cuentoqa karqañapuni.

Chay periodicollapitaj, uj curata ajinata tapurisqanku: “Wakin runas, Jesusmanta ni imata yachaspa wañuporqanku. Paykuna, ¿infiernopichu kashanku?”, nispa. Curataj kutichisqa: “Mana yachakunchu. Ajinapis, creeyku chay runasrayku Dios imallatapis ruwayta atisqanta”, nispa.

Uj católico libro nin: “Salvakunapajqa bautizakunapuni, imajtinchus Jesucristo nerqa, sichus pipis mana yakumanta, Espiritumantawan nacen chayqa, Diospa Reinonman mana yaykuyta atinchu (Jn 3.5)”, nispa. Chayrayku wakin runasqa, mana bautizakuspa wañojkuna infiernopi chayri waj lugarpi ñakʼarishasqankuta creenku.

Ashkha runastaj, kay yachachiyta ni imarayku creenkuchu. Chantapis may chhika runas, Bibliamanta ni imata yachaspa wañupunku. ¿Infiernopichu paykuna ñakʼarinanku tiyan? ¿Imatá Biblia chaymanta nin?

Diosqa, Payta mana rejsispa wañupojkunata, mana qhesachanchu. Bibliapitaj Hechos 17:30 kayta nin: “Ñawpa tiempospi runas mana payta rejsisqankuta Diosqa qonqayman churarqa”, nispa. Ajina kajtenqa Diosta mana rejsispa wañupojkuna, ¿kausarimonqankuchu?

Kay tapuyman kutichinapajqa, Jesús wañupunan qayllapi imatachus uj suwaman nisqanta qhawarina. Chay suwaqa Jesuspa ladonpi warkhusqa kasharqa nerqataj: “Yuyarikuwanki ari noqamanta, reinoykipi kaspa”, nispa. Jesustaj kuticherqa: “Kunan cheqamanta niyki: Noqawan Paraisopi kanki, [NM]”, nispa. (Lucas 23:39-43.)

¿Chay suwata janaj pachaman ripunantachu nisharqa? Mana. Imaraykuchus, chay runa Diospa Reinonman yaykuyta atinanpajqa, mana yakumantachu, nitaj espiritumantachu nacerqa (Juan 3:3-6). Jesusqa chay runaman, uj Paraisopi kausakunanta nisharqa. Chay runataj, judío kasqanrayku unay kay Jallpʼapi uj Paraíso kasqanta yacharqa. Mayqentachus Bibliaqa Edén huerta nispa sutichan (Génesis 2:8). Arí, Jesusqa chay runaman nisharqa, kay Jallpʼapi uj Paraisoman kausarimunanta.

Bibliaqa sutʼinchan, “cheqan kajta ruwajkuna”, jinallataj “sajrata ruwajkunapis” wañuymanta kausarinpunankuta (Hechos 24:15). Chay sajrata ruwajkunaqa Diosta ni jaykʼaj rejsisqankurayku, cheqa kamachiykunasninta mana juntʼajkuna kanku. Jesusqa piwanchus parlarqa chay suwa runata, jinallataj Diosmanta ni imata yachaspa may chhika wañuporqanku chaykunatapis, uj Paraisoman kausarichimonqa. Chaypitaj Diospa cheqa kamachiykunasninta yachakuspa, kasukoj runas kasqankuta rikuchinanku kanqa. Ajinamanta Diosta munakusqanku sutʼi kanqa.

Sajrata ruwajkuna kausarimojtinku, ¿juchasninkumantachu juzgasqa kanqanku? Mana. Imajtinchus Romanos 6:7 nin: “Pichus juchapaj wañojqa juchamanta kacharisqaña”, nispa. Rikunchej jina, “sajrata” ruwajkunaqa wañusqankuwan juchasninkuta paganku, nisunman kausarimusqankumanta jaqayman, imatachus ruwasqankuman jina, juzgasqas kanqanku. Manataj, ñaupa juchasninkumantachu. ¿Imaraykutaj chay aswan sumaj kanman?

Imaraykuchus, Diospa kamachiykunasninmanta yachakuyta atenqanku. Chay kamachiykunasnintaj sutʼinchasqa kanqa, libros chayri rollos nisqa kicharikojtin. Chantaraj “ruwasqasninkuman jina” juzgasqas kanqanku, nisunman chay kamachiykunata kasukusqankuman jina (Apocalipsis 20:12, 13). Ajinamanta ashkha runasqa, Diosta rejsiyta atenqanku, kasukoj kasqankutataj rikuchinanku kanqa, kay Jallpʼapi wiñay kausayta tarinankupaj.

Kay yachacheyqa ashkha runasta watejmanta Diospi creenankupaj yanaparqa. Chaymanta ujnin kashan, Yeong Sug, pichus Católica karqa. Wakin familiaresninpis curas karqanku. Payqa monja kananpaj yachakusharqa, jinapis saqeporqapacha. Imajtinchus chay monja wasipi ruwasqasninku mana allinchu rijchʼarqa. Chantapis mana creeyta aterqachu infiernopi runas ñakʼarishasqankuta.

Aswan qhepamantaj, uj Jehovaj testigon, Bibliapi kayta rikucherqa: “Kawsashajkunaqa wañunankuta yachakunku; wañusqasrí mana imatapis yachankuchu”, nispa (Eclesiastés 9:5). Chantataj sutʼincharerqa, ñaupa tatasnin mana infiernopichu ñakʼarishasqankuta, manaqa kausarimuyta suyaspa, wañuypi puñushasqankuta.

Yeong Sugqa, Bibliaj cheqa yachachiykunasninta ashkha runas mana rejsisqankuta yacharqa. Chayrayku Mateo 24:14 nisqanman jina ruwarqa, maypichus nin: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa. Kunanqa Yeong Sug Bibliamanta yachakusqanman jina, wañusqas kausarimunankuta runasman yachachishan.

Biblia nin: “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan”, nispa (Hechos 10:34, 35). Arí, Diosmanta cheqan kayninman jina ruwananta suyanchej. Imaraykuchus Payqa “cheqan kajta, justiciatawan munakun” (Salmo 33:5).