Kallpasapaman tukunaypaj ejerciciosllataña ruwaj kani. Chantá Estados Unidospi, San Leandro llajtapi ejerciciosta ruwanapaj wasita kicharerqani. Kallpasapas runaswantaj llankʼarqani. Paykunamanta ujnintaj, may rejsisqa runa karqa. Chaykunata ruwaspapis mana sonqo juntʼasqachu karqani.

Ujnin llankʼay maseyqa, Bibliamanta astawan yachakuyta munasqayta yacharqa, chayrayku rejsisqanwan parlarinayta niwarqa. Qʼayantintaj uj Jehovaj testigon wasiyman jamuspa, 4 horasta tapuykunasniyman Bibliawan kutichiwarqa, chay tardepacha kutimunanta nerqani. Kutimojtintaj chaupi tutakama parlarqayku. Yachachishawasqan allin rijchʼawasqanrayku tapurerqani: “Qʼaya riyta munayman Bibliamanta yachachisqaykita rikunaypaj”, nispa. Runaspa tapuykunasninman Bibliawan kutichisqanqa maytapuni tʼukuchiwarqa, kikillantataj ruwayta munarqani.

Chay precursorwan runasman Bibliamanta yachachimunaypaj, negocioyta saqeporqani. Jehovaj testigosnenqa “precursores” ninku pikunachus astawan tiempochakunku runasman Bibliamanta yachachinankupaj chaykunata. Kay 1948 mayo killapi California, Estadio Cow Palace nisqapi bautizakorqani. Watanmantaj precursor karqani.

Chantá Jehovaj testigosninta mamayta visitarinankuta nerqani. Paytaj paykunata sumajta uyarerqa, pisi tiemponmantaj bautizakorqa. Chaytataj mamaypa familianqa nipuni allinpajchu qhawarqa. Mamayqa wañupunankama Diosman cheqa sonqo karqa. Familiaykumantaqa, iskaynillayku Jehovaj testigosnin karqayku.

Kay 1950 watapi Colorado, Grand Junction llajtaman riporqani, chaypitaj warmiyta rejserqani. Paypaj sutintaj Billie. Payqa kay 1928 watapi, mundontinpi qolqe pisiy kashajtin nacekorqa. Maman Minnieqa sapa chʼisi mechero kʼanchaypi Bibliata leeripoj. Billietaj 4 watitayoj leeyta yacharqaña. Bibliaj wakin yachachiykunasnintataj umanpi sumajta japʼej. Kay 1940 wata tukukuyta, Billiej mamanqa Jehovaj testigosninwan yachakuyta qallarerqa. Yachakorqataj infiernoqa mana ñakʼarinapaj lugarchu kasqanta (Eclesiastés 9:5, 10). Chantá Minnie, qosanwan ima bautizakorqanku.

Billieqa, Boston llajtapi universidadman rej. Kay 1949 watapitaj wasinman kutipuspa Bibliamanta yachakorqa. Profesora kananmantaqa, Diosta sirviyta  ajllarqa. Kay 1950 watapitaj Nueva York llajtapi, Estadio de los Yankees nisqapi bautizakorqa. Chaypeqa Jehovaj testigosnin, uj jatun tantakuyta ruwarqanku. Chantá Billiewan rejsinakorqayku. Casarakuytawantaj sapa killa 100 horasta chayri astawan Bibliamanta yachachej kayku.

Ñaupajtaqa Oregón llajtaman rerqayku. Eugene llajtitapitaj willayta qallarerqayku, ashkha amigostaj kapuwarqayku. Kay 1953 watapitaj Grants Pass llajtaman rerqayku uj juchʼuy qotuchakuyta yanapanaykupaj. Chay watallapitaj, Galaad Escuelaman, clase 23 nisqaman wajyawarqayku. Chaypeqa, Jehovaj testigosninta misioneros kanankupaj wakichinku. Chaytaj unayqa South Lansing llajtapi karqa, Nueva Yorkmanta 400 kilometrospi jina.

Kay 1954, diciembre killapi Galaad Escuelamanta misioneros jina llojsiytawan 5 killasninman, 2 motoresniyoj avionpi Brasilman risharqayku. Jinallapi 1 horanman avionpa ujnin motornin sayarpaporqa, Bermudas nisqa lugarmantaj tiyaykorqayku. Mana chʼallparpakunaykupaj Cuba suyumanñataj tiyaykorqayku. Ñakʼaytapuni 36 horaspi, Brasilpi Jehovaj testigosninpa sucursalninman chayarqayku.

Chay sucursalpeqa pisi tiempollata kaytawan warmiywan iskay misioneras ima São Paulo, Bauru llajtaman misioneros jina riporqayku. Chay llajtapeqa 50.000 runas tiyakoj kanku. Jehovaj testigosnintaj tawalla karqayku.

Runasman Bibliamanta yachachiyta qallarejtiykukama, chay lugarmanta curaqa churanakuwarqayku. Qhepaykuta jamuspa runasta, “ama uyarinawaykuta” nej. Jinapis uj familiata Bibliamanta yachacherqayku. Pisi tiemponmantaj Jehovaj testigosnin kayta munarqanku, bautizakorqankutaj. Waj runaspis yachakuyta munallarqankutaj.

Chay bautizakojkunaj familiarnenqa, uj jatun wasej dueñosnin ukhumanta presidente karqa. Paywantaj uj contratota ruwarqayku, jatun tantakuyta chay wasipi ruwanaykupaj. Curataj chay contratota mana valechiyta munarqachu. Presidentetaj, chay wasej dueño masisninman nerqa: “Sichus chay contrato mana valechikonqa chayqa, niña kaypi llankʼasajchu”, nispa. Jinamanta chay jatun tantakuyta ruwarqaykupuni.

Kay 1956 watapitaj, São Paulo, Santos llajtaman qotuchakuyniykumanta 40 jina uj jatun tantakuyman trenpi rerqayku. Bauruman kutipuspataj uj cartata tarerqani, chaypitaj Jehovaj testigosninpa qotuchakuykunasninta waturinayta nisharqa. Chayta ruwaspa 25 watasta jina karqani, Brasiltataj sumajta rejsiykorqani.

Chay tiempopi viajayqa mana atikullajchu, imajtinchus flotapi, trenpi, camionetapi, bicicletapi chayri chakipi rej kayku. Ñaupajtaqa São Paulo, Jaú llajtaman chayarqayku. Chaypipis uj cura churanakullawarqaykutaj.

Pay niwarqayku: “Ama ovejasniywan parlaychejchu”, nispa.

“Diospata kanku. Mana qanpatachu”, nispataj kuticherqayku.

Kay La Sociedad del Nuevo Mundo en acción nisqa videota runasman rikuchiyta munarqayku. Curataj ashkha runaswan contraykupi oqharikuspa jamusharqa. Chayta yachaspataj policiasta wajyarqayku. Cura, chay runaswan chayamunankupajtaj policiasqa, armasninkuwan kachaykunankupajpacha kasharqanku. Chay tantakuyman rej runastaj, chay videowan mayta gustachikorqanku.

 Mayllapipis ajina churanakuyllawanpuni tinkukoj kayku. Sutʼincharina, Santa Catarina, Brusque llajtapi, 2 precursorasta rejserqayku. Paykunaqa Bibliamanta yachachej kanku, maypichus Jehovaj testigosninta chejnikoj kanku chaypi. Jinapis sinchʼita sayasqankoqa mana qhasichu karqa. Kunankama 50 watasña pasajtinpis 60 qotuchakuykunamanta astawanraj tiyan. Brusque qayllallapitaj, Itajaí llajtapi uj Jatun Tantakuna Wasi tiyan.

Qotuchakuykunata waturishaspa, hermanoswan jatun tantakuykunata wakichispa mayta kusichiwaj. Kay 1970 watas chaynejpi Estadio Morumbi nisqapi jatun tantakuyta ruwarqayku. Chaypitaj noqa encargado karqani. Chay estadiota llimphuchanapaj sapa qotuchakuykunamanta 10 hermanosta minkʼarqayku. Chay qayllapi kaj qotuchakuykunaqa 100 jina karqanku.

Chay chʼiseqa pelotata jaytʼajkuna nerqanku: “Qhawaychej jaqay warmispa pichanitasninkuta”, nispa. Jinapis chay “pichanitaswan” estadiota chaupi tutakama llimphucharqayku. Estadiomanta encargadotaj nerqa: “Llimphuchasqaykichejtaqa semanapichá tukuykuman karqa”, nispa.

Kay 1980 watapi tatay wañuporqa. Pisi tiemponmantaj Estados Unidosman, California, Fremont llajtaman mamayta qhawanaykupaj kutiporqayku. Precursoresllapuni kanaykupaj, portuguesta parlajkunata yanapanaykupaj ima, chʼisisninpi edificiosta llimphuchaspa llankʼaj kayku. Chantá Fremont llajtaj qayllaman, San Joaquín valleman riporqayku. Chaypipis portuguesta parlajkunallatataj maskʼaj kayku. Chay lugarqa may jatunpuni karqa Sacramentomanta, Bakersfield llajtakama. Kunantaj California llajtapi, portugués qallupi 10 qotuchakuykuna jinaña tiyan.

Kay 1995 watapi mamay wañuporqa. Chaymanta Florida llajtaman ripuspa, warmiypa tatanta wañupunankama qhawarqayku. Warmiypa mamanqa 1975 watapiña wañuporqa. Kay 2000 watapitaj Coloradoj ujnin llajtitanman riporqayku. Chay lugarqa orqosniyoj, chʼin pampasniyojtaj. Chaypitaj, navajos chantá utes ayllusman Bibliamanta yachacherqayku. Kay 2014 febrero killapi warmiy wañuporqa.

Jehovaj testigon Bibliawan tapuykunasniyman kutichiwasqanmantapacha kunankama, 65 watasña pasan. Mayta kusikuni payta uyarisqaymanta, yachachiwasqanqa cheqapuni kasqa. Chaymantapacha Diosta sirvishallanipuni. Chaytaj ashkha bendicionesta apamuwan.