Gobiernosqa sajra kajta ruwanku atiyniyoj kasqankurayku, allinnillankupajtaj imatapis ruwanku. Chaytaj mana kay tiempollapichu rikukun. Imaraykuchus 3.500 watas ñaupajta jina karqaña, Bibliapi ley nisqanman jinataj ni imarayku uj juiciopi llukʼiy kananchu karqa (Éxodo 23:8). Chaywanpis sajra ruwayqa mana llukʼiyllachu. Imajtinchus autoridadespis llajtaj kapuyninta, qolqenta ima japʼikapunku, suwankutaj. Chaytataj familiaresninkuta, amigosninkuta ima yanapanankupaj apaykachanku.

May chhika runas, sajra kajta ruwanku, astawanqa gobiernos. Kay Barómetro Global de la Corrupción 2013 nisqa qhawarisqanpi Transparencia Internacional nisqa willarqa, runas reparasqankuman jina, astawan sajra kajta ruwajkunaqa kaykuna kasqankuta: políticos, policías, gobiernopaj llankʼajkuna, leyesta churajkuna, justiciata ruwakunanmanta cargoyoj kajkuna ima. Kunanqa wakinta qhawarina.

• ÁFRICA: Sudafricapi 2013 watapi, gobiernopaj llankʼajkunamanta 22.000 jina sajra kajta ruwaymanta juchachasqa karqanku.

• SUDAMÉRICA: Brasilpi, 2012 watapi 25 runas juchachasqa karqanku campañankupaj llajtaj qolqenta gastasqankurayku. Chay 25 runasmanta ujnenqa karqa chay suyupi aswan qhapaj kajkunamanta ujnin, payqa 2003-2005 wataspi kamachej presidenteta yanaparqa.

• ASIA: Kay 1995 watapi Seúl llajtapi (Corea del Sur) uj edificio urmaykorqa, chaypitaj 502 runas wañorqanku. Yachakusqanman jinaqa, chay edificio urmaykusqa pisi valorniyoj materialeswan ruwakusqanrayku. Ruwajkunaqa autoridadesta llukʼiykusqanku pisi valorniyoj materialeswan ruwanankupaj, ajinamanta mana leyman jinachu ruwarqanku.

• EUROPA: Cecilia Malmström nerqa: “Europapeqa may chhika sajra ruwaypuni tiyan”. Payqa Asuntos de Interior de la Comisión Europea nisqamanta encargasqa. Chantá nillarqataj: “Sajra ruwayta chinkachinapajqa políticos uj yuyayllaman chayananku tiyan, chaytaj nisina kanchu”.

¡Sajra ruwayqa mana chinkachiyta atinapaj jina! Uj profesora Susan Rose-Ackerman sutiyoj, pichus sajra kaj chinkananpaj imatachus ruwakunanmanta sumajta yachaj qhelqarqa, mana sajra kausay kananpajqa “gobiernos imaynatachus kamachinanku tijrakunan kasqanta”. Chaytaj manasina kanmanchu. Jinapis Bibliaqa sajra ruwaykuna chinkanantapuni nin.