Runasqa ninku Navidad fiestata cristianos ruwasqankuta Jesuspa nacekusqanta yuyarinankupaj. Jinapis, ¿imaraykutaj chay costumbresta Jesuspa nacekusqanwan chhapunku?

Uj costumbreqa Papá Noel cuento. Estados Unidospi 1931 watapi Papá Noelqa uj refrescoj propagandanpaj may rejsisqaman tukorqa. Chaypitaj rikucherqanku Papá Noelqa kusisqa runa kasqanta, yuraj sunkhayoj, puka uyitataj. Brasilpitaj 1950 watapi Papá Noelta Abuelo Indio (Vovô Índio) nisqawan cambiarpayta munarqanku. Nitaj aterqankuchu, imajtinchus profesor Carlos E. Fantinati nisqanman jina Papá Noelqa, Abuelo Indio nisqamanta chantá “niño Jesusmanta, 25 de diciembre fiestapi, aswan rejsisqa karqa”. Chantapis Navidad fiestapeqa mana chay cuentollachu tiyan. Waj costumbrespiwan kasqanta yachanapajqa ñaupa tiempo cristianospa kausayninkumanta parlarina.

Kay Encyclopedia Britannica nisqa libro nin: “Qallariypi cristianosqa 200 watasta jina mana ruwajchu kanku wajkunarayku wañojkunaj diachakunta, nitaj Jesuspatapis”, nispa. Ñaupa tiempo cristianosqa mana diachakusta ruwajchu kanku, diachakuy costumbre llulla religionmanta kasqanrayku. Chantapis Bibliaqa mana ninchu ima pʼunchaypunichus Jesús nacekusqanta.

Cristianos mana diachakusta ruwajtinkupis, Jesús wañusqanmanta 300 watasninman jina Iglesia Católica nerqa Navidad ruwakunanta. Iglesia Catolicaqa aswan atiyniyoj, rejsisqataj kayta munarqa. Chaypajtaj romanospa costumbresninkuta, Intimanta fiestasninkutawan dueñochakorqa. Uj warmi P. Restad sutiyoj La Navidad en América (Christmas in America) nisqa libronpi nerqa: “Romanosqa ashkhata mikhoj kanku, qolqerayku pujllaj kanku, fiestasman rej kanku, waj fiestastawantaj ruwaj kanku diosesninkuta yupaychanankupaj”, nispa. Chaytaqa sapa wata 17 de diciembremanta 1 de enerokama ruwaj kanku. Kay 25 de diciembrepitaj fiestata ruwaj kanku Inti nacekusqanta yuyarikunankupaj. Romanosqa Intipaj fiestata ruwasqankuta Jesucristo nacekusqanta ruwanankupaj cambiarparqanku. La biografía de Santa Claus (Santa Claus, a Biography) nisqa libronpi Gerry Bowler nin: “Romanosqa intipaj fiestasta ruwasqankuwan kusirikushallarqankupuni”, nispa. Paykunaqa mosoj fiestasta ruwasharqanku ñaupa costumbresninkuwan chhapuspa.

Navidad fiestaqa mana allinchu llulla religión qallarichisqanrayku. La batalla en pro de la Navidad (The Battle for Christmas) nisqa libronpi Stephen Nissenbaum nin: “Navidad fiestaqa cristiano fiestaman rijchʼakojtinpis llulla religionmanta”, nispa. Chay fiestaqa Diosta, Wawan Jesucristotapis phiñachin. Chaypitaj allinta tʼukurisunman, imajtinchus Bibliaqa nin: “Cheqa kajqa sajra kajwan mana yananchakuyta atinchu, nillataj kʼanchaypis laqhawanqa chajrukunchu”, nispa (2 Corintios 6:14). Navidad fiestaqa sachʼaj wistʼu kʼullun jina “manaña cheqanchakuyta atinchu” (Eclesiastés 1:15).