Bibliaqa tawa caballospi lloqʼasqa kajkunamanta parlan. Chay tawa caballospi lloqʼasqa kajkuna llojsisqankutaj tʼukunapaj jina. Ñaupajtaqa yuraj caballo llojsimorqa, patanpi lloqʼasqa kajqa may rejsisqa rey karqa, kunallanraj coronasqataj. Chantá uj puka caballoñataj llojsimorqa, patanpi lloqʼasqa kajtaj Jallpʼamanta allin kausayta chinkachin. Chantá yana caballoñataj llojsimorqa, patanpi lloqʼasqa kajtaj makinpi pesasta japʼisharqa, uyarikorqataj mikhuna pisiyasqan. Tawa kaj caballotaj tunti qʼellu caballo karqa, onqoykunawan, wañuywantaj ninayan, patanpi lloqʼasqa kajpa sutintaj Wañuy karqa. Sepulturataj qhepanta jamusharqa ashkha runasta wañuchispa (Apocalipsis 6:1-8).

“Bibliapi tawa caballospi lloqʼasqa kajkunamanta leespa mayta mancharikorqani. Yuyarqanitaj juicio pʼunchay chayamushasqantaña, chay diapaj mana wakichisqa kasqayraykutaj wañunayta creerqani” (Crystal).

“Tawa caballospi lloqʼasqa kajkuna mana uj color caballollapichu kashasqankumanta leey mayta gustawaj. Imachus chay niyta munasqanta yachaytaj allin rijchʼawarqa” (Ed).

¿Qanpis ajinatachu yuyanki? Apocalipsis libropi tawa caballospi lloqʼasqa kajkunamanta parlakusqanqa may rejsisqa. Tawa caballospi lloqʼasqa kajkunamanta yachakunaykeqa yanapasunkiman. Diosqa nin Apocalipsis librota leejtiyki, entiendejtiyki, chayman jinataj kausakojtiyki, kusisqa kanaykita (Apocalipsis 1:1-3).

Wakin runasqa Apocalipsis libropi tawa caballospi lloqʼasqa kajkunamanta leespa manchachikunku, jinapis chayqa mana manchachikunapajchu. Astawanpis chayqa ashkha runaspa creeyninkuta kallpachan, suyakuytataj qon. Qantapis kallpachasunkiman, suyakuytataj qosunkiman. Qhepan yachaqanataj chaymanta astawan parlashan.