Apocalipsis 3:1-22
3 “Sardis markacho kaykaq *iglesiapa *angilninpaq kay nishqäta qelqay: Noqami Tayta Diospa qanchis espïritunkunata tsararaykä. Noqami makïcho qanchis qoylarkunata tsararaykä.*
“Noqa rikaykämi lapan rurashqaykikunata. Tayta Dios munashqanno kawarkaykashqaykita runakuna yarpaptinpis wanushqanömi karkaykanki.
2 “Shonquykikuna manaraq chukruyashqanyaq Tayta Dios munashqanno kawapäkunaykipaq shumaq yarpachakäriy. Alita ruraykashqaykita yarpapäkuptikipis Tayta Diospaqqa mana alimi kaykan.
3 Yachakärishqaykita y mayapäkushqaykita mana qonqaypa cäsukäriy. Jutsa ruraykunata kacharir munashqänöna kawapäkuy. Tsayno mana kawapäkuptikiqa elaqpita suwa shamushqannömi qamkunata castiganäpaq shamushaq.*
4 “Wakinlaykimi Tayta Dios munashqanno kawarkaykanki. Tsayno kawashqaykipitami yoraq röpayki jatishqa nawpächo kawapäkunkipaq.
5 Imano nakarpis mana ajayaypa yärakamaqkunaqa yoraq röpan jatishqami kanqa. Paykunapa jutinkunata Libru de la Vïdapita* manami börrashaqtsu. Taytäpa y angilkunapa nawpanchömi favornin parlashaq.*
6 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun.
Filadelfia markacho kaykaq yärakuqkunapaq cartata apatsishqan
7 “Filadelfia markacho kaykaq *iglesiapa *angilninpaq kay nishqäta qelqay: Noqaqa *santumi kaykä. Nishqäkunata cumplïmi. Davidpa llävinpa wawantami tsararaykä. Tsaymi punkuta kichaptï mana pipis wichqanqatsu. Wichqaptï manami pipis kichanqatsu.*
8 “Noqa rikaykämi lapan rurashqaykikunata. Munayniynaq kaykarpis mana ñëgamashpaykimi nishqäkunata cumplipäkushqanki. Tsaymi gloria punkuta kichapashqä. Tsay punkupa yaykuptiki manami pipis michäshunkitsu.
9 “Markaykicho wakin runakuna kaynömi nirkaykan: ‘Tayta Dios kuyashqan Israel runami kapäkü’. Tsayno niykarpis lulakurkaykanmi. Paykunaqa *Satanás munashqantami rurarkaykan. Tayta Dios kuyashqan runakuna kashqanta nipäkuptinpis qamkunatami noqa kuyä. Tsayta musyapäkunanpaqmi* nawpaykiman qonqurpakärinanpaq mandashaq.*
10 “Nishqäta cumplirmi imano nakarpis mana ajayaypa yärakaykämanki. Tsayno kashqaykipitami maytsaycho taq runakuna fiyupa nakananpaq kaq tiempu* chayamuptinpis qamkunawan kaykäshaq.
11 “Noqaqa shamunäpaqnami kaykä. Tsayno kaykaptinqa yachatsishqäkunata mana qonqaypa cäsukäriy. Tsaynöpami corönaykita pipis mana qechushunkitsu.
12 Imano nakarpis mana ajayaypa yärakamaqkunataqa Diosnïpa templuncho columna kananpaqmi churashaq. Tsaymi mana yarquypa tsaycho imayyaqpis kanqa. Paykunamanmi qelqashaq Tayta Diosnïpa jutinta y markanpa jutinta. Tsay markaqa jana patsapita shamuq mushuq Jerusalénmi kaykan.* Tsaynölami kikïpa mushuq jutïtapis paykunaman qelqashaq.*
13 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun.
Laodicea markacho kaykaq yärakuqkunapaq cartata apatsishqan
14 “Laodicea markacho kaykaq *iglesiapa *angilninpaq kay nishqäta qelqay: Noqami Tayta Dios promitishqankunata cumplï. Imaypis rasun kaqlatami nï. Noqawanmi Tayta Dios lapantapis kamarqan.*
15 “Noqa rikaykämi lapan rurashqaykikunata. Musyämi qasaqpis ni akaqpis mana kashqaykita.* Tsaypa trukanqa qasaqlapis o akaqlapis kapäkunkiman.
16 Qasaqpis ni akaqpis kanaykipa trukanqa wawaquñuyla kashqaykipitami shimïpita aqturishayki.
17 “Rïcu kashqaykiman atiënikärishpaykimi ‘imäpis manami pishïmantsu’ nirkaykanki. Tsayno nirpis manami cuentata qokärinkitsu kuyapaypaq waktsa, qapra y qarapächula karkaykashqaykita.
18 Rasunpa rïcu kayta munarqa ninawan tsulutsishqa qori *püruta noqapita rantipäkuy. Qarapächu kayta mana munarqa yoraq röpata noqapita rantipäkuy. Qapra kayta mana munarqa noqapita jampita rantipäkuy. Tsaynöpami rïcu, ali röpashqa y ali rikaq kapäkunkipaq.
19 “Kuyashqä kaqtaqa lutankunata ruraptin corrigïmi.* Tsayno kaykaptinqa jutsa rurayta kacharir lapan shonquykiwan sirvipäkamay.
20 ¡Tantiyakäriy! Punkuykipitami qayakaykämü. Mayqaykipis qayakamushqäta mayar kichapämaptikiqa yaykamuptï juntumi mikushun.
21 Imano nakarpis mana ajayaypa yärakamaqkunataqa noqawan mandaq kananpaqmi churashaq.* *Satanásta vincishqäpitami *noqatapis Taytä churamashqa paywan imayyaqpis mandaq kanäpaq.
22 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun”.
Satanáspa angilninkunaqa supaykunami karkaykan (Mat. 25.41; Apoc. 9.11).
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 3.1 Apoc. 1.20.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 3.5b Mat. 10.32; Luc. 12.8.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 3.7 Isa. 22.22.
^ 3.9b Isa. 49.23; 60.14.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.10 Dan. 12.1; Mat. 24.21-22.
^ 3.12a Apoc. 21.2.
^ 3.12b Isa. 62.2; 65.15.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 3.14 Prov. 8.22-31; Juan 1.3.
^ 3.15 Qasaq karqa Jesucristuta manami cäsukuntsu. Akaq karmi itsanqa Jesucristuta lapan shonqunwan kushishqa cäsukärin.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 3.19 Prov. 3.12; Heb. 12.6.
^ 3.21a 2Tim. 2.12; Apoc. 20.4, 6; 22.5.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.21b Juan 16.33; Apoc. 5.5.
