Apocalipsis 8:1-13
8 Röllucho qanchis kaq laqaraykaq cërata Carnish jorquriptinmi jana patsacho pulan hörano pipis mana parlakurqantsu.
2 Nirkurnami rikarqä Tayta Diospa nawpancho qanchis *angilkuna ichirpaykaqta. Paykunami cada ünun *cornëtata chaskirqan.
3 Tsaypitanami Tayta Diospa trönun nawpancho kaykaq *altarman juk ángel chayarqan* inciensu qoshtatsikunan aptashqa. Altarpis y inciensu qoshtatsikunanpis qoripitami karqan. Tsaychömi atska inciensuta chaskirqan Diosman yärakuqkuna manakushqantawan* altarman churananpaq.
4 Altarcho inciensuwan qoshtatsiptinmi yärakuqkuna manakushqan inciensupa qoshtaynin talukashqami Tayta Diosman chayarqan.
5 Tsay angilmi inciensu qoshtatsikunanman altarcho kaykaq shanshata winarkur kay patsaman jitarpamurqan.* Tsaymi atsikyaqpa atsikyar elquy karqan, räyupis mantsakuypami pashtarqan y patsapis fiyupami siksikyarqan.*
Chusku angilkuna cornëtakunata tukamushqan
6 Tsaypitanami *cornëtata chaskiq qanchis *angilkuna tukananpaq kamarikärirqan.
7 Punta kaq ángel cornëtata tukamuptinmi ninawan yawar talushqa runtu tamya patsaman tamyarqan.* Tsaywanmi cäsi pulan patsa rupar ushakarqan. Tsay runtu tamya chayashqan kaqqa yörapis y qewapis lapanmi ushakarqan.
8 Tsaypita ishkay kaq ángel cornëtata tukamuptinmi jatunkaray jirkano rupaykar lamarman kuchparqan. Tsaymi cäsi pulan lamar yawarman tikrarqan.*
9 Yawarman tikrashqan kaqchöqa lapanmi wanurqan. Tsaynölami tsaycho kaykaq *büquikunapis talpukar ushakarqan.
10 Kimsa kaq ángel cornëtata tukamuptinmi jatunkaray rupaykaq qoylar shikwamurqan.* Tsay qoylarmi cäsi pulan mayukunaman y cäsi pulan pukyukunaman chayarqan.
11 Qoylarpa jutinmi karqan Asqaq. Asqaq kaptinmi tsay qoylar chayashqan kaq yakuqa asqaq rikakurqan.* Tsay yakuta upuq kaqkunaqa tsaytsikami wanupäkurqan.
12 Chusku kaq ángel cornëtata tukamuptinmi intipis y killapis qeshyarqan. Tsaymi intipis ni killapis shumaq atsikyarqannatsu.* Tsaynölami cäsi pulan qoylarkunapis mana chipchipyarqannatsu.
13 Tsaypitanami rikarqä juk anka* altupa tumaykaqta. Tsay hörami mayarqä tsay anka fuertipa kayno nimuqta: “¡Wawalaw, wawalaw, wawalaw! Patsacho kawaqkuna ¡imanöraq kanqa! ¡Kimsa angilkunaraqmi cornëtata tukamunan pishiykan!”
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 8.3a Éxo. 30.1, 3.
^ 8.3b Sal. 141.2; Apoc. 5.8.
^ 8.5a Lev. 16.12; Eze. 10.2.
^ 8.5b Éxo. 19.16; Apoc. 11.19; 16.18.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 8.7 Éxo. 9.23-25; Eze. 38.22.
^ 8.8 Éxo. 7.17-21.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 8.10 Isa. 14.12.
^ 8.11 Jer. 9.15; 23.15.
^ 8.13 Wakin qepa kaq griego copiakunachöqa ángel ninmi.
