Daniel 2:1-49
2 Ishkay watana Nabucodonosor rey kaykarmi yaparir yaparir tsaylata sueñurqan. Tsaymi pasaypa lakikur punuytapis mana tarirqantsu.
2 Sueñushqan imapaq kashqantapis wilananpaqmi rey qayatsirqan musyakuqkunata, brüjukunata, rikakuqkunata y qoylar estudiaqkunata. Lapan qayatsishqan runakuna nawpanman juntakaptinnami
3 rey kayno nirqan: “Sueñushqä imapaq kashqantapis mana musyarmi pasaypa lakishqa kaykä”.
4 Tsaymi tsay yachaq runakuna arameo idiömacho kayno nipäkurqan: “¡Qamla imayyaqpis rey kaykulay! Sueñushqaykita wilaykalämay imapaq kashqantapis wilapäkunäpaq”.
5 Tsayno niptinmi rey Nabucodonosor paykunata kayno nirqan: “Manami wilashaykitsu. Imata sueñushqäta y imapaq tsay suëñu kashqanta mana wilamaptikiqa pedäzu pedäzu kutsushunaykipaq y wayikikunatapis juchutsir ushakätsinanpaqmi ordenashaq.
6 Mayqaykipis imata sueñushqäta y imapaq tsay suëñu kashqantapis wilamaptikiqa churashayki lapan runakuna respitashunaykipaqmi. Tsay jananmanmi imaykatapis kamaripäshayki. Tsawraqa kanan jukla wilapäkamay imata sueñushqäta y imapaq tsay suëñu kashqantapis”.
7 Tsayno niptin yapay kayno nipäkurqan: “Tayta rey, imata sueñushqaykitapis wilamaptikiqa noqakuna wilashaykimi sueñushqayki imapaq kashqantapis”.
8 Tsawraqa rey Nabucodonosor kayno nirqan: “Imata sueñushqätapis manami wilashaykitsu. Qamkunaqa niq tumpalami tiemputa perdiykätsimanki.
9 Sueñushqäta mana wilamaptikiqa lapaykitami ushakätsishaykipaq. Qamkunaqa wilanakushqanki lulapämar engañamänaykipaqmi. Niq tumpala tiemputa perdiykätsimanki. Kanan jukla wilapäkamay imata sueñushqätapis. Tsaynöpami musyashaq sueñushqä imapaq kashqantapis”.
10 Tsaymi yachaq runakuna reyta kayno nipäkurqan: “Manami pipis kay patsacho kantsu imata sueñushqaykita wilashunaykipaq. Mayjina munayniyuq karpis manami mayqan reypis musyakuqkunata, brüjukunata o qoylar estudiaqkunata manakamashqaykino manakushqatsu.
11 Tayta rey, noqakunata manakamashqaykiqa aläpa sasami kaykan. Runaqa tsayta manami musyantsu, sinöqa dioskunalami musyan. Itsanqa paykuna manami noqantsiwantsu kaykan”.
12 Tsayno nipäkuptinmi rey pasaypa rabyakushpan ordenarqan Babiloniacho lapan yachaq runakunata chipyaq ushakätsinanpaq.
13 Ordinta rurarkatsirmi intëru nacionpa apatsirqan lapan yachaq runakunata wanutsinanpaq. Tsaymi Danielta y yanaqaqninkunata ashitsirqan wanutsinanpaq.
14 Tsay ordinwanmi reyta cuidaq soldädukunapa capitannin aywarqan Babiloniacho kaykaq yachaq runakunata wanutsinanpaq. Tsay runapa jutinmi karqan Arioc. Daniel kaqman chayaptinmi Danielqa shumaq yarpachakurkur
15 kayno nirqan: “¿Imataq kashqa rey apurädu tsayno ordenananpaq?”
Tsaymi Danielta Arioc wilarqan imanir wanutsiyta munashqantapis.
16 Tsayno niptinmi Danielqa rey Nabucodonosorman aywaykur manakurqan kayno nir: “Imapaq tsay suëñu kashqantapis wilanäpaq ichiklata shuyaykalämay”.
17 Nirkurnami wayinman Daniel kutiykur Ananíasta, Misaelta y Azaríasta wilarqan rey imanir yachaq runakunata wanutsiyta munashqantapis.
18 Nirkurmi paykunata kayno nirqan: “Jana patsacho kaq Tayta Diosta manakuykulay rey imata sueñushqantapis tantiyatsimänanpaq. Mana tantiyatsimaptinqa Babilonia nacioncho yachaq runakunatapis y noqantsitapis wanutsimäshunmi”.
19 Tsay tsakaymi Danielta Tayta Dios revelarqan Nabucodonosor imata sueñushqanta y imapaq tsay suëñu kashqantapis. Tsaymi Danielqa jana patsacho kaykaq Tayta Diosta alabashpan
20 kayno nirqan:“Tayta Dios, imaypis alabashqa kaykulay.Qampitami yachaypis y poderpis kaykan.
21 Qammi kamakätsinki ima pasananpaq kaqtapis.Tiempukunatapis qammi kamakätsinki.Reykunatapis qammi churanki y trukatsinkipis.Yachaqkunatapis mas yachaytami qonki.Tantiyakuqkunatapis masmi tantiyatsinki.
22 Pipis mana tantiyashqantami musyatsinki.Qampaqqa lapanpis atskichönömi kaykan.
23 Unay aylükuna adorashqan Tayta Dios, qamta agradëcikurmi alabä.Manakushqäta mayamarmi yachayta qomashpayki shumaq tantiyatsimashqanki rey Nabucodonosor imata sueñushqantapis”.
24 Nirkurmi Daniel aywarqan Ariocwan parlananpaq. Arioctami rey ordenashqa karqan yachaq runakunata lapanta wanutsinanpaq. Tsaymi payta Daniel kayno nirqan: “Babiloniacho kaykaq yachaq runakunata ama wanutsiytsu, tayta. Tsaypa trukanqa reypa nawpanman pushaykamay sueñushqan imapaq kashqantapis wilanäpaq”.
25 Tsayno niptinmi Arioc jinan höra Danielta pusharqan rey kaqman. Chayaykatsirmi kayno nirqan: “Tayta rey, Judápita prësu apamushqantsi runakunachömi tarishqä juk yachaq mözuta. Paymi wilashunki sueñushqayki imapaq kashqantapis”.
26 Tsayno niptinmi Beltsasar jutiyuq Danielta Nabucodonosor kayno tapurqan: “¿Rasunpaku qam wilamanki imata sueñushqätapis y imapaq tsay suëñu kashqantapis?”
27 Tsayno tapuptin Daniel kayno nirqan: “Tayta rey, sueñushqaykita tantiyatsishunaykipaq manami pipis kantsu. Manami yachaqkunapis, brüjukunapis, musyakuqkunapis ni rikakuqkunapis tantiyatsiyta kamäpakunqatsu.
28 Tsayno kaptinpis jana patsacho kaykaq Tayta Diosmi runa mana tantiyashqanta revelan. Paymi sueñuynikicho musyatsishushqanki shamuq watakuna imano kananpaq kashqantapis. Kanan wilashayki sueñuynikicho imata rikashqaykitapis.
29 “Tayta rey, cämaykichömi jitaraykarqayki wara warantin imapis pasananpaq kashqanta yarpachakur. Tsaymi punukashqa kaykaptiki imapis pasananpaq kaqta Tayta Dios revelashushqanki.
30 Manami wakin runakunapita mas yachaq kaptïtsu tsay sueñushqaykita musyatsimashqa, sinöqa imapaq kashqantapis musyanaykipaqmi.
31 “Tayta rey, sueñuynikichömi rikashqanki runa niraq jatunkaray monumentuta. Tsay monumentumi mantsariypaq chipchipyar nawpaykicho ichiraykashqa.
32 Umanmi kashqa alinnin kaq qoripita. Pëchun y rikrankunami kashqa qellaypita. Pachan y mama chankankunami kashqa broncipita.
33 Qonqurninpita utsuputunyaqmi fiërrupita kashqa. Chakinkunanami kuwashqa mituwan y fiërruwan takushqa kashqa.
34 “Rikaraykaptikimi elaqpita juk rumi tsay monumentu kaqman kuchpakämushqa. Rumi tsayno kuchpamushqa pipis mana qarpaykämuptinmi. Fiërrupita y mitupita rurashqa chakinman chayarmi tsay monumentuta shalurishqa.
35 Tsaymi mitupita, fiërrupita, broncipita, qellaypita y qoripita rurashqa monumentuta shalurishqa. Usya witsan ëracho trïguta wiruptin polvu rikakushqannömi tsay monumentupis polvu rikakushqa. Tsay polvuta wayra apakuptinmi imapis mana quëdashqanatsu. Monumentuta talamaq rumimi itsanqa jatunkaray punta rikakushpan intëru patsaman juntashqa.
36 “Tsaytami sueñushqanki, tayta rey. Imapaq kashqantapis kanan tantiyarkatsishayki.
37 Jana patsacho kaykaq Tayta Diosmi churashushqanki lapan reykunapitapis mas munayniyuq y pïmaypitapis mas respitashqa kanaykipaq.
38 Tsaynöpis qampa munaynikimanmi churamushqa maytsaycho taq runakunata, lapan uywakunata y lapan päriqkunatapis. Tayta Diosmi churashushqanki paykunapa mandaqnin kanaykipaq. Tsaymi sueñuynikicho rikashqayki monumentupa qori uman kaykanki.
39 “Qam mandashqayki nacionkunataqa juk nacionmi vincirkur munaynincho tsararanqa. Itsanqa tsay nacionqa qam mandashqayki nacionpita mënus munayniyuqmi kanqa. Tsaypitanami juk nación shamunqa lapan nacionkunata mandananpaq. Tsay nacionqa broncino fuerti karmi intëru kay patsata munaynincho tsararanqa.
40 Tsaypita juk nacionnami lapan nacionkunata vincirkur mandanqa. Tsay nacionmi fiërruno fuerti kanqa. Fiërru imatapis pakir ushakätsishqannömi tsay nacionpis wakin nacionkunata vincir chipyaq ushakätsinqa.
41 “Tayta rey, runa niraq monumentupa chakinkuna fiërrupita y kuwashqa mitupita kashqantami rikashqanki. Tsayqa kaykan tsay ultimu kaq nación runakuna juk yarpaywan juk yarpaywan kananpaq kashqanmi. Tsayno kaykarpis fiërruno fuertimi kanqa.
42 Chaki dëdunkuna fiërrupita y mitupita kashqannömi tsay nacionpis aybësis fiërruno fuerti kanqa y aybësis mituno débil kanqa.
43 Fiërruwan mitu chakinkuna talukashqanta rikashqaykinömi tsay nacionpa mandaqnin reykunapis munaynincho kaykaq reykunawan *pactuta rurapäkunqa yanapanakunanpaq. Tsayno rurarpis fiërruwan mituta taluyta mana puëdishqantsinömi tsay nación runakunapis munaynincho kaykaq nación runakunawan talukayta mana kamäpakunqatsu.
44 “Tsay reykuna mandaykänan witsan jana patsacho kaykaq kikin Tayta Diosmi mandayta qalaykunqa. Pay *mandaykashqanqa manami imaypis ushakanqatsu ni paytaqa manami pipis vincinqatsu. Tsaynöpis paymi imayyaqpis mandaq kar wakin mandaqkunata ushakätsinqa.
45 Tsayno kananpaqmi sueñuynikicho rikashqanki jirkapita kuchpamuq rumita. Tsay rumi pipis mana qarpaykämuptin kuchpamurmi fiërrupita, broncipita, qellaypita, mitupita y qoripita rurashqa monumentutami pasaypa talamashqa. Tayta rey, tsayno kananpaqmi Tayta Dios revelashushqanki. Tsayno pasanqa tiempun chayamuptinmi. Tsay sueñushqaykiqa rasunpami pasanqa. Imapaq kashqanta wilashqäpis rasunpami kaykan”.
46 Tsayno niptinmi rey Nabucodonosorqa urkunpis pampaman töpashqanyaq Danielpa nawpanman qonqurpakuykurqan. Nirkurna ordenarqan tsaki mikuy ofrendakunata payta entregananpaq y inciensuwan qoshtatsinanpaq.
47 Nirkurna Nabucodonosor kayno nirqan Danielta: “Sirvishqayki Diosqa lapan dioskunapa Diosninmi y lapan reykunapa mandaqnin reymi kaykan. Lapan ima pasananpaq kaqtapis revelaq karmi revelashushqanki imapaq sueñushqätapis wilamänaykipaq”.
48 Tsaypitanami imaykatapis qararkur* Danielta rey churarqan intëru Babilonia provinciacho gobernador kananpaq. Tsaynöpis churarqan yachaq runakunapa mandaqnin kananpaqmi.
49 Tsaypita reyta Daniel manakurqan Sadracta, Mesacta, Abed-neguta Babilonia provinciakunacho mandäshinanpaq. Kikin Danielnami quëdarqan reypa palaciuncho.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 2.48 Wakin runakunaqa regalarkur nipäkun.
