Juan 11:1-57
11 Betania markachömi Lázaro jutiyuq runa pasaypa antsa qeshyaykarqan. Tsaychömi panin Maríawan y Martawan tarqan.*
2 (Maríami Jesúspa chakinman perfümita winaparkur aqtsanwan sëcaparqan.)*
3 Lázaro antsa kaptinmi paninkuna juk runata Jesúsman kachakurqan kayno nir wilananpaq: “Kuyanakushqayki Lázarumi pasaypa antsa kaykan, tayta”.
4 Tsayno wilaptinmi Jesús kayno nirqan: “Lázaruta tsay qeshya manami wanushqalancho usharänanpaqtsu tsarishqa, sinöqa Tayta Diospis y Tsurinpis munayniyuq kashqanta runakuna tantiyakärinanpaqmi”.
5 Jesúsqa pasaypami kuyarqan Martata, Maríata y Lázaruta.
6 Tsayno kaykarpis Lázaro qeshyaykashqanta wilaptin manami juklatsu aywarqan. Tsaypa trukanqa kaykashqan kaqlachömi ishkay junaq qoyarqan.
7 Tsaypitanami discïpulunkunata kayno nirqan: “Judea provinciapa yapay aywashun”.
8 Tsaymi discïpulunkuna kayno nirqan: “*Rabí, qanyankunaraqmi tsaycho runakuna saqmaypa wanutsiyta munashushqanki.* ¿Tsayno kaykaptinku kutiyta munaykanki?”
9 Tsaymi Jesús kayno nirqan: “¿Manaku juk junaqcho chunka ishkay höra kaykan? Junaqpa purirqa atskita rikashpan runakuna manami ishkintsu.*
10 Tsakaypa purirmi itsanqa imamanpis takakar ishkin. Tsayno ishkin paycho atski mana kaptinmi”.*
11 Nirkurnami kayno nirqan: “Kuyanakushqantsi Lázaruqa punukashqalami kaykan. Rikchatsinantsipaq aku aywashun”.
12 Tsawraqa discïpulunkuna kayno nirqan: “Punukashqa karqa aliyanqami, tayta”.
13 Lázaro punuykashqanta nirpis wanushqa kaykashqantami Jesús tumatsipaylapa nirqan. Tsayno niptin discïpulunkunaqa mana tantiyarmi punuykashqalanta yarpapäkurqan.
14 Tsayno yarpaptinmi Jesús kayno nirqan: “Lázaro wanushqami kaykan.
15 Tsayno kaptinpis tsaycho mana kashqäpita kushikümi. Kananmi noqaman mas criyipäkamankipaq. Aku aywashun”.
16 Tsaymi Milïshu nishqan Tomás discïpulu mayinkunata kayno nirqan: “Tsayno kaptinqa Jesúswan iwal wanunantsipaq aywashun”.
Wanushkunata kawaritsimunanpaq munayniyuq Jesús kashqan
17 Betaniaman Jesús chayaykuptinnami wilapäkurqan chusku junaqna Lázaro pamparaykashqanta.
18 Jerusalénpita Betaniaman media lëwanöla kaptinmi
19 atska runakuna aywapäkurqan Martata y Maríata shoqananpaq.
20 “Jesúsmi aywaykämun” niqta mayarmi Martaqa taripaq aywarqan. Maríami itsanqa wayicho quëdakurqan.
21 Jesúswan tinkurmi Marta kayno nirqan: “Kaycho kaptikiqa turï manami wanunmantsu karqan, tayta.
22 Imano kaptinpis musyämi lapan manakushqaykitapis Tayta Dios rurananpaq kashqanta”.
23 Tsayno niptinmi Jesús kayno nirqan: “Turikiqa kawarimunqami”.
24 Tsaymi Marta kayno nirqan: “Musyämi juiciu final junaqcho wanushkuna kawarimuptin turïpis kawarimunanpaq kashqanta”.*
25 Niptinmi Jesús kayno nirqan: “Noqami wanushkunata kawaritsimuq kaykä.* Noqaman yärakamaq kaqtaqa wanuptinpis kawaritsimushaqmi.
26 Kawaqkunapis noqaman yärakamarqa *mana ushakaq kawaytami taripäkunqa. ¿Tsayta criyinkiku?”
27 Tsayno niptinmi Marta kayno nirqan: “Aw, tayta, noqa criyïmi Tayta Diospa Tsurin kashqaykita. Qamqa kaykanki kay patsaman shamunanpaq kaq Cristumi”.
Lázarupaq Jesús waqashqan
28 Tsayno nirkurmi Marta kutirqan nanan Maríata qayananpaq. Chayaykurnami rinrilancho kayno nirqan: “Jesúsmi chayamushqa. Paymi qayaykäshunki”.
29 Tsaymi María jukla aywarqan.
30 Jesús manami markaman chayarqanraqtsu, sinöqa Martawan tinkushqalanchöraqmi kaykarqan.
31 Wayipita María jukla yarquqta rikashpanmi tsaycho kaykaq runakuna qepanta aywapäkurqan kayno nir: “Turin pamparaykashqanmanchari waqaq aywaykan”.
32 Jesús kaqman María chayaykurmi nawpanman qonqurpakuykur kayno nirqan: “Qam kaycho kaptikiqa turï manami wanunmantsu karqan, tayta”.
33 Maríata y yanaqaqnin runakunata waqarkaykaqta rikarmi Jesúspis fiyupa lakikurqan.
34 Tsawraqa kayno tapurqan: “¿Maymantaq pampashqanki?”
Paykunanami kayno nipäkurqan: “Rikatsinäpaq aywashun, tayta”.
35 Tsawraqa Jesúspis waqarqan.
36 Waqaptinmi wakin runakuna kayno nirqan: “Rikay, Lázaruta pasaypachari kuyarqan”.
37 Wakinnami kayno nipäkurqan: “Qapra runatapis aliyaykätsirqa ¿manatsuraq Lázarutapis aliyätsinman karqan?”
Lázaruta Jesús kawaritsimushqan
38 Fiyupa lakishqami Jesús chayarqan Lázaro pamparaykashqan machayman. Punkunnami jatun rumiwan tsapararqan.
39 Tsaychömi Jesús kayno nirqan: “Tsaparaykaq rumita wititsipäkuy”.
Tsayno niptinmi Lázarupa panin Marta kayno nirqan: “Chusku junaqnami pamparaykan, tayta. Pasaypanachari asyaykan”.
40 Tsayno niptinmi Jesús kayno nirqan: “¿Manaku nishqä noqaman yärakamarqa Tayta Dios munayniyuq kashqanta rikanaykipaq?”
41 Tsayno niptinmi tsaparaykaq rumita wititsipäkurqan. Tsaymi Jesús jana patsapa rikärir kayno nirqan: “Manakushqäta mayamashqaykipitami qamta agradëcikamü, papä.
42 Musyämi imaypis mayamashqaykita. Tsayno kaptinpis runakunapa nawpancho manakamü kachamashqaykita criyipäkunanpaqmi”.
43 Tsayno nirkurnami Jesús fuertipa kayno nirqan: “¡Lázaro, yarqamuy!”
44 Tsayno niptinmi kawarirkamur yarqamurqan uman wankushqa y makin chakin pitushqa. Tsaymi Jesús kayno nirqan: “Purinanpaq paskapäkuy”.
Jesústa wanutsinanpaq mandaq cürakuna wilanakushqan
Mateo 26.1-5; Marcos 14.1-2; Lucas 22.1-2
45 Lázaruta kawaritsimushqanta rikaykurmi Maríata yanaqaq runakuna Jesúsman atskaq criyipäkurqan.
46 Wakin kaqnami *fariseukunaman aywaykur wilarqan Lázaruta Jesús kawaritsimushqanta.
47 Tsawraqa mandaq cürakunawan fariseukuna lapan *Sanedrín juezkunata qayaykatsir kayno nipäkurqan: “Tsay runaqa atska milagrukunatanami ruraykan. Tsayno kaptinqa ¿imatataq rurashun?
48 Imatapis mana ruraptintsiqa lapan runakunami payman criyipäkunqa. Tsayta mayaykurqa Roma soldädukuna shamurmi templuntsita juchutsir noqantsitapis wanutsimäshun”.
49 Tsayno niptinmi mas mandaq cüra Caifás kayno nirqan: “¡Qamkuna manami imatapis musyapäkunkitsu!
50 Lapantsi wanunantsipa trukanqa mas alimi kanman juk runala wanuptin. ¿Imanirtaq tsayta mana tantiyapäkunkitsu?”
51 Caifásqa manami kikinpa yarpaynilanpitatsu tsayno nirqan, sinöqa tsay wata mas mandaq cüra kaptinmi Tayta Dios tantiyatsirqan lapan runakunapa trukan Jesús wanunanpaq kashqanta.
52 Manami Israel runakunalapaqtsu wanunan karqan, sinöqa Diospa wamrankuna maytsaychöpis mashtakashqa kaykaqta shuntamunanpaqmi.
53 Tsay junaqpitami autoridäkuna wilanakurqan Jesústa wanutsinanpaq.
54 Tsaymi Israel autoridäkunapita pakaylapana Jesús purirqan. Jerusalénpita Efraín markaman aywakurmi discïpulunkunawan tsaycho qoyäpäkurqan. Tsay markaqa chunyaq jirka nawpalanchömi kaykan.
55 Israel runakunapa *Pascua fiestan qalaykunanpaqna kaykaptinmi markankunapita atskaq runakuna purificakärinanpaq Jerusalénman aywapäkurqan.
56 Jesústa ashirmi templu patiucho jukninpis jukninpis kayno nipäkurqan: “Qamkuna ¿imatataq yarpanki? ¿Fiestapaq Jesús shamunqatsuraq?”
57 Mandaq cürakuna y fariseukuna maynami runakunata kayno nishqa karqan: “Jesústa maychöpis rikashpaykiqa prësu tsaritsinäpaq jukla wilapäkamanki”.
Ichic wilacuycuna
^ 11.1 Luc. 10.38-39.
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ 11.8 Juan 10.31, 39.
^ 11.9 Juan 8.12; 9.5.
^ 11.10 Tsaykunata parlar Jesús kayno nirqan: Hörä manaraq chayamuptinqa manaraqmi wanutsimanqatsu. Tsaynöpis qamkunawan kaykaptïqa manami imapis pasashunkitsu.
^ 11.25 Rom. 6.4-5; Col. 2.12; 3.1.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ Sanedrín juezkuna Sanedrín juezkunaqa Israel nacioncho mas mandaq juezkunami karqan. Tsay juezkunapa mandaqninqa mas mandaq cürami karqan. Sanedrín juezkunami juzgarqan Jesústa (Mat. 26.57-68), Pedruta y Juanta (Hech. 4) y apóstol Pabluta (Hech. 22.30–23.20).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
