Mateo 17:1-27
17 Tsaypita soqta junaqtami Pedruta, Santiaguta y Santiagupa wawqin Juanta pushakurkur Jesús witsarqan altunnin jirkaman.
2 Tsaychömi paykuna rikaykaptin Jesús jukniraqman tikrarqan. Tsaymi qaqlan intinöraq chipchipyarqan y röpanpis pasaypa yoraq rikakur chipchipyarqan.
3 Tsaychömi rikapäkurqan Moisés y Elías yuriparkur Jesúswan parlarkaykaqta.
4 Tsawraqa Jesústa Pedro kayno nirqan: “Alipaqmi kaycho karkaykä, tayta. Munaptikiqa kimsa tsuklata rurapäkushaq: jukta qampaq, jukta Moiséspaq y jukta Elíaspaq”.
5 Pedro tsayno niykashqan hörami chipchipyaykaq pukutay paykunata tsapakurkurqan. Pukutay rurinpitami Tayta Dios kayno nimurqan: “Paymi kuyay Tsurï. Paypitami kushishqa kaykä.* Pay nishushqaykita wiyakäriy”.*
6 Tsayno nimuqta mayaykurmi discïpulunkuna pasaypa mantsakashpan pampaman lätakaykärirqan.
7 Tsayno lätaraykaptinmi paykunata yataykur Jesús kayno nirqan: “Ama mantsakäriytsu. Sharkapäkuy”.
8 Tsayno niptin nukirkushpanmi Jesúslatana rikapäkurqan.
9 Jirkapita uraykämushqanchömi Jesús kayno nirqan: “Puntacho rikapäkushqaykita pitapis ama wilapankiraqtsu. *Runapa Tsurin wanushqanpita kawarimuptinraq wilakärinki”.
10 Tsawraqa discïpulunkuna Jesústa kayno tapupäkurqan: “Runapa Tsurin wanunanpaq kaykaptinqa ¿imanirtaq ley yachatsiqkuna nipäkun puntata Elíasraq shamunanpaq kashqanta?”*
11 Niptinmi Jesús kayno nirqan: “Elías rasunpami puntata shamunqa lapanta kamakätsinanpaq.
12 Itsanqa Elías maynami shamushqa.* Paytaqa pï kashqantapis mana reqirmi wanutsipäkurqan. Tsaynölami Runapa Tsurintapis wanutsipäkunqa”.
13 Jesús tsayno niptinmi discïpulunkuna tantiyarqan Elíaspaq parlar Bautizaq Juanpaq parlaykashqanta.
Juk mözuta Jesús aliyätsishqan
Marcos 9.14-29; Lucas 9.37-43a
14 Runakuna juntaraykashqanman Jesús chayaykuptinmi nawpanman qonqurpakuykur juk runa ruwakurqan kayno nir:
15 “Tsurïta kuyapaykulay, tayta. Wanuy qeshya tsariptinmi pasaypa nakan. Atska kutimi ninamanpis tunishqa y yakumanpis jeqashqa.
16 Discïpuluykikunaman apamuptïpis manami aliyätsiyta kamäpakushqatsu”.
17 Tsayno niptinmi Jesús kayno nirqan: “¡Yärakuyniynaq jutsasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantashayki! Mä tsay mözuta apapäkamuy”.
18 Nawpanman chayaykatsiptinmi mözuta nakaykätsiq *supayta Jesús olqüparqan. Tsaymi supayqa jinan höra mözupita yarqurir aywakurqan. Tsay hörapitami mözu sänuna rikakurqan.
19 Tsaypita kikilankuna kaykarmi discïpulunkuna Jesústa tapurqan kayno nir: “Noqakunaqa ¿imanirtaq tsay supayta qarquyta mana kamäpakärishqätsu?”
20 Tsawraqa Jesús kayno nirqan: “Janan shonqula yärakurmi qarquyta kamäpakärishqankitsu. Rasunpami kayno nï: Ñäpushpa murunno takshalapis yärakuyniki kaptinqa taqay jirkata witikunanpaq niptikipis witikunmanmi.* Manami imapis aläpa sasatsu qamkunapaq kanman.
21 [Tsayno kaptinpis kay niraq supaykunataqa qarqapäkunki ayunar Tayta Diosta manakurraqmi]”.
Wanunanpaq kashqanta Jesús yapay wilakushqan
Marcos 9.30-32; Lucas 9.43b-45
22 Galileacho puriykarmi discïpulunkunata Jesús kayno nirqan: “*Runapa Tsurinta chikiqninkunapa makinmanmi entreganqa.
23 Wanutsiptinpis kimsa junaqtami kawarimunqa”.
Tsayno niptinmi discïpulunkuna fiyupa lakikärirqan.
Templupaq impuestuta Pedro pägashqan
24 Tsaypitanami Capernaúmman discïpulunkunawan Jesús chayarqan. Tsaychömi templupaq impuestu cobraqkuna* Pedruta tapurqan kayno nir: “Señornikiqa ¿manaku templupaq impuestuta pägan?”
25 Tsayno tapuptinmi Pedro kayno nirqan: “Aw, päganmi”.
Tsaypita wayiman Pedro yaykurir imatapis manaraq niptinmi Jesús kayno nirqan: “¿Ima ninkitaq, Simón? Mandaq reykuna ¿pitataq impuestuta cobrapäkun? ¿Marka mayinkunataku o jäpa runakunataku?”
26 Tsayno tapuptinmi Pedro kayno nirqan: “Jäpa runakunatami, tayta”.
Tsawraqa Jesús kayno nirqan: “Tsayno kaptinqa tsurinkuna manami pägantsu.
27 Tsayno kaptinpis cobraqkuna mana rabyakunanpaq qochaman aywar anzuëluwan pescäduta tsarimuy. Punta kaq pescäduta tsarimushqaykipa shiminchömi qellay kaykanqa. Tsay qellaywan ishkantsipita impuestuta pägamuy”.
Ichic wilacuycuna
^ 17.5b Deut. 18.15; 2Ped. 1.17-18.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 17.12 Mat. 11.14.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 17.20 Mat. 21.21; Mar. 11.23; 1Cor. 13.2.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 17.24 Éxo. 30.13; 38.26.
