Mateo 20:1-34
20 “Tayta Dios *mandaykashqan imano kashqantapis kanan tantiyatsishayki. Juk runashi üva chakrancho arutsinanpaq tuta tutala minkay ashiq aywarqan.
2 Minkayta tariykurshi juk jornalta pägananpaq parlarkur üva chakranman arunanpaq kacharqan.
3 “Tsaypita tuta jamay hörano pläzapa yapay aywarshi runakunata tarirqan aruyniynaqta.
4 Tsayshi kayno nirqan: ‘Qamkunapis üva chakräman aruq aywapäkuy. Manami dembalditsu arupäkunki’. Tsayno niptinshi paykunapis aywapäkurqan.
5 “Pulan junaqpis y malway hörapis yapayshi minkay ashiq aywarqan. Tariykurshi wakin kaqtanöla chakranman kacharqan.
6 “Tsaypita minkay yarqunanpaq juk hörano pishiykaptinshi yapay aywar runakunata tarirqan aruyniynaq kaykaqta. Tsayshi kayno nirqan: ‘¿Imanirtaq qoyati imatapis mana ruraypa karkaykanki?’
7 “Tsayno niptinshi kayno nipäkurqan: ‘Manami pipis minkakärimashqatsu, tayta’.
“Tsayshi kayno nirqan: ‘Qamkunapis chakräman aruq aywapäkuy’.
8 “Patsa tsakaykaptinnashi capatazninta kayno nirqan: ‘Aruqkunata qayaykur lapanta juk jornalta pägapäkuy.* Tardiraq yaykuqkunata puntata päganki y tutapita aruqkunataqa qepata päganki’.
9 Tsay nishqannölashi qepata aruq yaykuqkunata juk jornal complëtuta pägarqan.
10 Tsayta rikarshi tutapita aruqkunaqa shapäkamurqan mas atskata chaskinanpaq kashqanta yarpar. Tsayno yarparpis juk jornallatashi paykunapis chaskipäkurqan.
11 Tsayshi chakrayuqta reclamapäkurqan
12 kayno nir: ‘Qepa yaykamuqkuna juk hörala arurkaykaptinqa ¿imanirtaq tsayjina shanaycho arurkaykaptï paykunatanöla pägarkaykämanki?’
13 “Tsayno niptinshi arutsikuq runa kayno nirqan: ‘Amïgu, parlashqantsinömi pägaykä. Manami pitapis engañaykätsu.
14 Päguykikunata chaskirkaykarnaqa aywakäriyna. Kikï munarmi qepa yaykamuqkunatapis qamkunatano pägaykä.
15 Qamkunaqa ¿ima cuentayuqtaq kanki aykata pägakuptïpis? ¿Ali runa kashqäpitaku rabyapäkunki?’ ”
16 Tsayno wilaparkurmi Jesús kayno nirqan: “Tsaynölami qepa kaqkuna puntacho kanqa. Punta kaqkunanami qepacho kanqa.* [Atskaqta qayarpis walkaqlatami Tayta Dios akranqa]”.*
Wanutsipäkunanpaq kashqanta Jesús yapay wilakushqan
Marcos 10.32-34; Lucas 18.31-34
17 Jerusalénman aywarkaykashqanchömi chunka ishkay discïpulunkunata juk läduman qayaykur Jesús kayno nirqan:
18 “Musyapäkunkimi Jerusalénman aywaykashqantsita. Tsaychömi *Runapa Tsurinta prësu tsarirkur mandaq cürakunaman y ley yachatsiqkunaman apapäkunqa. Paykunami wanutsinanpaq nipäkunqa.
19 Mana Israel autoridäkunapa makinman churaptinmi asipanqa, astanqa y crucificanqa. Tsayno kaptinpis kimsa junaqtaqa kawarimunqami”.
Santiagupa y Juanpa maman ruwakushqan
Marcos 10.35-45
20 Tsaypitanami Zebedeupa warmin wawankunawan Jesús kaqman chayarqan. Jesúspa nawpaman qonqurpakuykurmi kayno nirqan: “Ruwakuläshayki, tayta”.
21 Niptinmi Jesús kayno nirqan: “Mä nimay”.
Tsay warminami kayno nirqan: “Mandaq kanaykipaq Tayta Dios churashuptiki kay ishkay wawäkunata churaykulanki mandäshishunaykipaq, tayta. Jukaqta jamatsinki alawqaykiman y jukaqta itsuqnikiman”.
22 Tsaymi Jesús kayno nirqan: “Imata manakamashqaykitapis manami musyapäkunkitsu. ¿Noqa upunäpaq kaq cöpata* upunkimantsuraq? [¿Awantankimantsuraq bautizamänanpaq kashqanno bautizapäkushuptiki?]”*
Tsaymi kayno nipäkurqan: “Awmi, tayta”.
23 Tsayno niptinmi Jesús kayno nirqan: “Rasunpami noqa upunäpaq kaq cöpata upupäkunki [y bautizamänanpaq kashqanno bautizapäkushunki]. Tsayno kaptinpis alawqäman ni itsuqnïman jamatsinäpaq manami noqapitatsu kaykan. Tsaymanqa jamakärinqa Taytä nishqan kaqkunalami”.
24 Tsay ruwakushqanta mayarmi wakin kaq discïpulunkuna Juanta y Santiaguta rabyaparqan.
25 Tsawraqa discïpulunkunata qayaykur Jesús kayno nirqan: “Musyashqaykinöpis nación mandaq runakunaqa munashqantami ruratsipäkun.
26 Qamkunachöqa manami tsayno kanmantsu.* Mayqaykipis mandaq kayta munarqa ashmaynöla runa mayikita yanapay.
27 Ali rikashqa kayta munarqa esclävunöla runa mayikita yanapay.*
28 *Runapa Tsurinpis manami sirvishqa kananpaqtsu shamushqa, sinöqa sirvinanpaq y runakuna rayku wanur atskaqta salvananpaqmi”.*
Ishkay qaprakunata Jesús aliyätsishqan
Marcos 10.46-52; Lucas 18.35-43
29 Jericó markapita discïpulunkunawan Jesús aywakuptinmi atska runakuna qepanta aywapäkurqan.
30 Tsay nänichömi ishkay qapra runakuna jamarpaykarqan. Paykunami Jesús pasaykashqanta mayar qayakushpan kayno nipäkurqan: “¡*Davidpa Tsurin Tayta Jesús, kuyapaykalämay!”
31 Tsawraqa upälakärinanpaq runakuna olqüparqan. Olqüpaptinpis masraqmi qayakur kayno nipäkurqan: “¡Davidpa Tsurin Jesús, kuyapaykalämay!”
32 Tsawraqa tsay qaprakunata qayaykur Jesús tapurqan kayno nir: “¿Imacho yanapanätataq munarkaykanki?”
33 Niptinmi qaprakuna kayno nipäkurqan: “Nawïkuna rikanantami munapäkü, tayta”.
34 Tsawraqa kuyapar nawinkunata yataykuptinmi jinan höra rikapäkurqanna. Aliyarkurnami Jesúspa qepanta aywapäkurqan.
Ichic wilacuycuna
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 20.8 Lev. 19.13; Deut. 24.15.
^ 20.16 Tsay nishqanqa kaynömi niykan: Tsay arupakuyman punta yaykuqwan qepa yaykuqpis iwal päguta chaskishqannömi Diospa wilakuyninta puntata chaskikuqkuna y qepataraq chaskikuqkunapis gloriaman chayanqa.
^ 20.16 Mat. 19.30; Mar. 10.31; Luc. 13.30.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 20.22a Cöpapaq parlarqa Tayta Dios rabyar jutsa ruraqkunata castigananpaq kashqanpitami parlarqan. Tsaypita masta musyanaykipaq liyinki Sal. 75.8; Isa. 51.17; Jer. 25.15-29; Hab. 2.16.
^ 20.22b Bautizamänanpaq kashqanno bautizapäkushuptiki nirqa wanutsimänanpaq kashqanno wanutsipäkushuptiki nirqanmi.
^ 20.25-26 Luc. 22.25-26.
^ 20.26-27 Mat. 23.11; Mar. 9.35; Luc. 22.26.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 20.28 Luc. 22.27; Juan 13.12-15.
^ Davidpa Tsurin Davidpa Tsurin nirqa Tayta Dios kachamushqan Cristupaqmi nirqan. Tsayno nipäkurqan rey Davidpa miraqninkunapita Cristo yurinanpaq Tayta Dios promitishqa kaptinmi (2Sam. 7.10-16; Sal. 89.1-4, 19-37; 132.11-12; Isa. 11.1-10). Jesucristo salvakuq Cristo kashqanta tantiyarmi Davidpa Tsurin kashqanta nipäkurqan (Mat. 9.27; 12.23; 21.9; 22.41-46).
