Mateo 27:1-66
27 Patsa waraykaptinnami mandaq cürakuna y Israel mayor runakuna wilanakurqan Jesústa imanöpapis wanutsipäkunanpaq.
2 Wilanakurkurnami Jesústa liyarkur gobernador Pilatuman apatsirqan.
Judas Iscariote jurkakushqan
Hechos 1.18-19
3 Wanutsinanpaq kashqanta musyaykurmi Jesústa rantikuq Judas fiyupa lakikurqan. Tsaymi mandaq cürakuna y Israel mayor runakuna juntakashqanman aywaykur chaskishqan kimsa chunka (30) qellayta kutitsir*
4 kayno nirqan: “Jutsaynaq runata wanutsinaykipaq entregar jutsatami rurashqä”.
Tsayno niptinmi kayno nipäkurqan: “¡Noqakunata imata qokaman! ¡Kaypita witikuy!”
5 Tsayno niptinmi chaskishqan qellayta templuman jitapaykur aywakurqan. Nirkurnami jurkakurqan.
6 Mandaq cürakunanami tsay qellayta shuntarkur kayno nirqan: “Kay qellayqa runapa yawarninpa chaninmi. Tsayno kaykaptinqa ofrendakunaman ama talutsishuntsu”.
7 Tsaymi wilanakurkur tsay qellaywan manka ruraq runapa chakranta rantipäkurqan jäpa runakuna wanuptin tsayman pampananpaq.
8 Tsaypita patsami kananyaqpis tsay chakrapa jutin kaykan Yawar Pampa.
9 Chakrata tsayno rantirmi profëta Jeremías kayno qelqashqanta cumplipäkurqan:“Paypa chanin ayka kananpaqpis Israel runakuna nishqannölami kimsa chunka (30) qellayta chaskipäkurqan.
10 Tsay qellaywanmi Tayta Dios nimashqannöla manka ruraq runapa chakranta rantipäkurqan”.*
Jesústa Pilato tapushqan
Marcos 15.2-5; Lucas 23.3-5; Juan 18.33-38
11 Jesústa chayatsiptinmi gobernador *Pilato tapurqan kayno nir: “¿Rasunpaku Israel runakunapa mandaqnin rey kaykanki?”
Tsawraqa Jesús kayno nirqan: “Rasun kaqtami niykanki”.
12 Tsaycho mandaq cürakuna y Israel mayor runakuna Jesúspa contran imaykata jitapaptinpis Jesús manami imatapis rimakurqantsu.
13 Tsawraqa Pilato tapurqan kayno nir: “¿Manaku imatapis ninki contrayki rimapäkuptin?”
14 Tsayno niptinpis Jesús manami imatapis rimakurqantsu. Tsawraqa Pilato aläpa yarpachakurqan.
Jesústa crucificananpaq Pilato mandashqan
Marcos 15.6-15; Lucas 23.13-25; Juan 18.39—19.16
15 Cada watami *Pascua fiestacho runakuna manakushqan prësuta *Pilato kachariq.
16 Tsay watami pïmaypis jamurpashqan Barrabás jutiyuq runa prësu wichqaraykarqan.
17 Tsaymi tsayman juntakaptin runakunata Pilato kayno nir tapurqan: “¿Mayqan prësutataq kacharinäta munapäkunki? ¿Barrabástaku? ¿O Cristo nishqan Jesústaku?”
18 Pilato musyarqanmi Jesústa chikir prësu apapäkushqanta.
19 Pilato tsaycho juzgar jamaraykaptinmi warmin wilakatsir kayno nirqan: “Tsay runaqa jutsaynaqmi. Paywan ama jatikaytsu. Payta prësu tsarishqanpita kanan paqas pasaypa mana alikunatami sueñupäkushqä”.
20 Mandaq cürakuna y Israel mayor runakunanami itsanqa runakunata shimita qorqan Barrabásta kacharir Jesústa wanutsinanpaq.
21 Tsaymi “¿mayqantataq kacharishaq?” nir Pilato yapay tapuptin runakuna kayno nipäkurqan: “Barrabásta kachariyqa”.
22 Tsayno niptinmi Pilato kayno nirqan: “Tsayno kaptinqa Cristo nishqan Jesústa ¿imatataq rurashaq?”
Niptinmi lapan kayno nipäkurqan: “¡Crucificay!”
23 Tsawraqa Pilato tapurqan: “¿Ima jutsatataq rurashqa?”
Tsayno niptinpis masraqmi kayno nipäkurqan: “¡Crucificay!”
24 Runakuna qapararraq nipäkuptinmi ima ruraytapis Pilato mana kamäpakurqantsu. Tsaymi yakuta apaykatsimur runakuna rikaykaptin makinta maylakur* kayno nirqan: “Kay runata wanutsiptiki noqa manami jutsayuqtsu kä. Qamkuna imanöpis kakäriy”.
25 Tsayno niptinmi runakuna kayno nipäkurqan: “Kay runa wanushqanpita noqakuna y wamräkunami jutsayuq kashaq”.
26 Tsayno niptinmi Barrabásta Pilato kacharirqan. Jesústanami fiyupa astarkatsir crucificananpaq soldädukunapa makinman kachaykurqan.
Jesústa kasha corönata jatipashqan
Marcos 15.16-20; Juan 19.2-3
27 Tsaypitanami soldädukuna Jesústa apapäkurqan Pilatupa despächunman. Tsayman lapan tröpa* soldädukuna juntapaykurmi
28 Jesúspa röpanta loqtiparkur puka cäpata ayluparqan.
29 Tsaynöpis kashapita awashqa corönatami umanman jatiparqan. Alawqa kaq makinmannami shoqushta aptaparqan. Nirkurmi nawpanman qonqurpakuykur asipar kayno nipäkurqan: “¡Alabashqa katsun Israel runakunapa mandaqnin rey!”
30 Tsaynöpis toqapar ushashpanmi aptaraykashqan shoqushta qechurir umacho wirupäkurqan.
31 Tsayno asiparkurmi aylupashqan cäpata loqtiparir kikinpa röpantana jatiparqan. Nirkurmi crucificaq apapäkurqan.
Jesústa crucificashqan
Marcos 15.21-32; Lucas 23.26-43; Juan 19.17-27
32 Crucificaq aparkaykashqanchömi tinkurqan Cirene nacionpita Simónwan. Paytami Jesús apaykashqan cruzta umrutsipäkurqan.
33 Tsaypitanami Jesústa chayatsirqan Gólgota nishqanman. Gólgota ninanqa Calavëra Sitiu ninanmi.
34 Tsaycho asqaq jachawan talushqa vïnuta uputsiyta munapäkuptinpis yawarkur manami upuyta munarqantsu.*
35 Jesústa crucificaykurnami suertita jitapäkurqan röpanta mayqanpis apakunanpaq. [Tsayno rurananpaqmi Tayta Diospa profëtan kayno qelqarqan: “Kikinpurami röpäta rakipänakurqan. Röpäta apakunanpaq suertita jitapäkurqan”.*]
36 Nirkurnami täpaykar quëdapäkurqan.
37 Imapita wanutsishqantapis runakuna musyananpaqmi juk letrëruta cruzpa puntanman laqapäkurqan. Tsay letrëruchömi kayno qelqaraykarqan: “Kay runaqa Israel runakunapa mandaqnin rey Jesúsmi”.
38 Jesús crucificaraykashqan nawpanmanmi ishkay suwa runakunatapis crucificapäkurqan, juknin kaqta alawqa kaq nawpanman y jukaqtana itsuq kaq nawpanman.
39 Jesús crucificaraykaqta rikarmi tsaypa pasaq runakuna asiparqan. Umanta awishpanmi*
40 kayno nipäkurqan: “Templutapis juchurkatsir kimsa junaqlata sharkatsinaykipaq kashqanta niykarqa* mä salvakuy. Diospa Tsurin karqa mä cruzpita urämuy”.
41 Tsaynölami mandaq cürakunapis, ley yachatsiqkunapis, [*fariseukunapis] y Israel mayor runakunapis Jesústa asipashpan kayno nipäkurqan:
42 “Wakinta salvarpis kikinqa manami salvakuyta kamäpakuntsu. Israel runakunapa mandaqnin rey karqa mä cruzpita urämutsun. Urämuptinqa criyipäkushunmi.
43 Payqa ‘Tayta Diospa Tsurinmi kä’ nirmi Diosman yärakushqa. Rasunpa Tsurin kaptinqa Tayta Dios kuyapar cruzpita jorqutsun”.*
44 Tsaynölami nawpancho crucificaraykaq suwa runakunapis ashlipäkurqan.
Jesús wanushqan
Marcos 15.33-41; Lucas 23.44-49; Juan 19.28-30
45 Pulan junaqpita malway intiyaqmi patsa tsakakurkurqan.
46 Tsay hörami Jesús qayaraypa kayno nirqan: “Elí, Elí, ¿lama sabactani?”
Tsay ninanqa kayno ninanmi kaykan: “Tayta Dios, Tayta Dios, ¿imanirtaq kachariykamashqanki?”*
47 Tsayno nishqanta mayarmi tsaycho kaykaq wakin runakuna kayno nipäkurqan: “Profëta Elíastami qayakuykan”.
48 Tsayno niptinmi juk runa jukla aywaykur pochquq vïnuman esponjata ushmarkatsir shoqushpa puntanman watarqan. Tsaywan Jesústa shoqutsiyta munaptinmi*
49 runakuna kayno nipäkurqan: “Ama shoqutsiytsu. Mä rikashun cruzpita jorqunanpaq Elías shamunqakush”.
50 Tsaypitanami yapay fuertipa qaparar Jesús wanurqan.
51 Tsay hörami templu rurincho tsaparaq cortïna* janapita urayaq rachikäkurqan. Patsa fiyupa siksikyaptinmi qaqakunapis shilikarqan.
52 Sepultürakunapis kichakaptinmi Tayta Dios munashqanno kawaq runakunapis kawarimurqan.
53 Tsawraqa Jesús kawarirkamuptinnami pamparashqanpita yarqamur *sagrädu Jerusalén markaman yaykapäkurqan. Atska runakunami tsay kawarimuq runakunata rikapäkurqan.
54 Jesústa täpaykaq capitán y soldädunkunapis patsa siksikyaykaqta mayar y lapan pasashqankunatapis rikarmi fiyupa mantsakashpan kayno nipäkurqan: “¡Rasunpami kay runaqa Diospa Tsurin kashqa!”
55 Tsaychömi atska warmikuna karulapita rikarpaykarqan. Tsay warmikunami Galileapita patsa Jesústa yanapar aywapäkurqan.
56 Paykunawanmi kaykarqan María Magdalena, Santiagupa y Josépa maman María y Zebedeupa warminpis.*
Jesústa pampashqan
Marcos 15.42-47; Lucas 23.50-56; Juan 19.38-42
57 Patsa tsakaykaptinnami Arimateapita juk rïcu runa José jutiyuq *Pilato kaqman chayarqan. Paypis Jesúspa discïpulunmi karqan.
58 Chayaykurmi Pilatuta manakurqan kayno nir: “Jesúspa ayanta kachapaykalämay pampanäpaq”.
Tsawraqa Pilato soldädukunata nirqan Jesúspa ayanta kachapänanpaq.
59 Kachapaykuptinmi lïnupita rurashqa limpiu säbanaswan piturkur
60 qaqacho tsayraq uchkushqa sepultüraman pamparqan. Tsaypitanami jatunkaray rumiwan sepultürapa punkunta tsapaykur aywakurqan.
61 Tsaychömi María Magdalena y jukaq Maríapis jamarpaykarqan.
Jesúspa sepultüranta soldädukuna täpashqan
62 Jesús wanushqanpita waraynin* jamay junaqnami mandaq cürakuna y *fariseukuna *Pilato kaqman aywaykur
63 kayno nipäkurqan: “Tayta, tsay lulakuq runa kaynömi nirqan: ‘Wanushqäpita kimsa junaqtami kawarimushaq’.*
64 Tsayno nishqa kaykaptinqa sepultürata kimsa junaqyaq soldäduykikunawan täpaykatsilay. Mana täpatsiptikiqa discïpulunkuna Jesúspa ayanta [tsakaypa] suwarkurmi runakunata criyitsinqa wanushqanpita kawarimushqanta. Tsayno lulakurqa tsay runa engañashqanpita mas peormi runakunata engañapäkunqa”.
65 Tsayno niptinmi Pilato kayno nirqan: “Soldädukuna sepultürata täpananpaq pushapäkuy”.
66 Tsayno niptinmi aywaykur sepultüra tsaparaykaq rumita sëllapäkurqan pipis kichaptin musyakänanpaq. Nirkurnami soldädukunata täpananpaq kachaykurqan.
Ichic wilacuycuna
^ 27.3 Hech. 1.18-19.
^ 27.9-10 Jer. 32.6-9; Zac. 11.12-13.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 27.24 Deut. 21.6-9.
^ 27.27 Tröpa complëtuqa soqta pachak (600) soldädukunami karqan.
^ 27.34 Tsayno uputsiyta munarqan aläpa nanayta Jesús mana mayananpaqmi.
^ 27.35 Sal. 22.18.
^ 27.39 Sal. 22.7; 109.25.
^ 27.40 Mat. 26.61; Juan 2.19.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 27.48 Sal. 69.21.
^ 27.51 Éxo. 26.31-33; 2Crón. 3.14.
^ sagrädu Liyinki santupita tantiyatsikuyta.
^ 27.55-56 Luc. 8.2-3.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 27.62 Wakin runakunaqa warantin nipäkunmi.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
