Proverbios 30:1-33
30 Jaquépa tsurin Agurmi Itielta y Ucalta wilapar kayno nirqan:
2 Lapanpitapis mas mana tantiyakuq upa runanömi kä.Imatapis mana tantiyaq runanömi kaykä.
3 Tantiyakuq kanäpaqpis lapantaqa manami yachakushqätsu.*Santu Tayta Diospa yachatsikuynintapis lapantaqa manami shumaq musyätsu.
4 Manami pï runapis jana patsaman aywaykur kutimushqatsu.Tsaynölami pï runapis wayrata mana aptarantsu,ni lamarta jakunwan qepintsuni kay patsapa lindërunta churashqatsu.Pilapis rurashqanta musyarqa mä jutinta wilamay.Tantiyakuq karqa mä tsurinpa jutinta wilamay.
5 Tayta Dios tsapanmi payman yärakuqkunataqa.Lapan promitishqanta payqa cumplinmi.*
6 Paypa palabranman kikikipa yarpaynikita ama yapaytsu.Yapaptikiqa olqüpashushpayki castigashunkipaqmi.Tsaynöpami musyakanqa lulakuq kashqayki.
7 Kawashqäyaq ishkay cösalatami manakamü, Tayta Dios.
8 Tantiyaykatsilämay pitapis mana lulapänäpaq.Ama rïcuyätsimaytsu ni waktsayätsimaytsu.Tsaypa trukanqa waran waran nistashqäkunata kamaripaykalämay.*
9 Imaykayuqpis karqa capazchari qamta qonqarpis qonqayküman.Pishïpakur suwakushpä penqaymanpis churaykümanchari.
10 Ashmay lutanta ruraptinpis patronninta ama wilapaytsu.Wilapaptikiqa tsay ashmay maldicionarpis maldicionaykushunkimanchari.
11 Wakin runaqa mamanta y papäninta maldicionanmi.
12 Wakin runaqa jutsayuq kaykarpis jutsaynaq tukunmi.
13 Wakin runaqa lapanpita mas ali kashqanta yarparmi runa mayinta manakaqman churan.
14 Wakin runanami ambiciösu kar waktsakunapa imaykantapis qechur qarapächulata qarqurin.Mana kuyapäkuq kaptinmi paykunapaqa kirunpis espädanöraq y waqunpis puñalnöraq kaykan.
15 Ambiciösu runaqa yawar shoquq kurunömi kaykan.Tsay runaqa aykata chaskirpis manami contentakuntsu.Tsaynöpis kimsa cösa y juk masmi kaykan mana contentakuqkuna.
16 Tsaykuna kaykan sepultüra, qoluq warmi, tsaki chakra y nina.
17 Taytanta manakaqman churaqkunata y maman yätsishqanta mana chaskikuqkunataqa nawintapis wiskulkuna jorqutsun.Condorpis kawaykaqta mikutsun.
18 Kimsa cösa y juk masmi kaykan mana tantiyaypaq kaqkuna.
19 Tsaykuna kaykan anka imano pärishqan,rumi jananpa culebra imano purishqan,lamar jananpa *büqui imano aywashqany jipashwan mözu imano wamrata rurashqan.
20 Runan jarukuq warmiqa juk runawan punurpis manami penqakuntsu.Nirkurpis kaynömi nin: “Noqaqa manami ima jutsatapis rurashqätsu”.
21 Kay patsacho kimsa cösa y juk masmi kaykan runakuna mana munashqan.
22 Tsaykunaqa kaykan juk ashmay rey kayman yaykushqan,mana tantiyakuq runa imaykayuqpis rikakushqan,
23 despreciashqa warmi runayuq rikakushqany patrönanpa trukan ashmay warmi patröna rikakushqan.
24 Kay patsacho chusku akapala kaqkunami tantiyaqpitapis mas tantiyaq kaykan.
25 Tsaykuna kaykan pitishkuna (paykunaqa kalpaynaq karpis usya witsanmi mikuyninta churakärin),
26 wishkashkuna (paykunaqa kalpaynaq karpis ranrakunachömi wayinta rurapäkun),
27 chukluskuna (paykunaqa mandaqnin rey mana kaykaptinpis qatinaylanpami puripäkun)
28 y shulakkuna (paykunaqa fácil tsariy kaykarpis reypa palaciunmanmi yaykapäkun).
29 Kimsa cösa y juk masmi kaykan waräwa* puriqkuna.
30 Tsaykuna kaykan león (leonqa lapan uywapitapis mas mantsakuypaq y imapitapis manami qeshpintsu),
31 pelyaq gällu,yayan chïvuy soldädukunapa puntanta aywaq rey.
32 Lëchipa nätasninpitami mantequïllata ruran.Fuertipa jaqchisyaptinqa senqanpita yawarmi yarqun.Tsaynölami piwanpis achäquita ashipänakurqa pelyapäkun.Mana tantiyakuypa runa tukur pitapis achäquita ashiparqa tsaykunata tantiyakuy.
33 -
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 30.5 2Sam. 22.31; Sal. 18.30.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 30.29 Wakin runakunaqa orgullösu nipäkun.
