¿E jachin taq kebʼe pa ri kaj?
Ri kuya ubʼixik Biblia
Ri Dios e uchaʼom jujun taq winaq rech kebʼe pa ri kaj are chi’ kekamik (1 Pedro 1:3, 4). Are chiʼ kechaʼ rumal ri Dios rajawaxik kkʼojiʼ nim kikojonik y utz taq kibʼantajik che rajawaxik kkikʼut ri cristianos, rumal che we man kkibʼan wariʼ kekun ta ri’ kebʼe pa ri kaj (Efesios 5:5; Filipenses 3:12-14).
¿Jas kekibʼanaʼ pa ri kaj?
Ri winaq riʼ che e chaʼom rumal ri Dios keʼux na e qʼatal taq tzij xuqujeʼ sacerdotes y kkiqʼat na tzij rukʼ ri Jesús pa mil junabʼ (Apocalipsis 5:9, 10; 20:6). Kekʼojiʼ na pa ri kʼakʼ qʼatbʼal tzij (che ri Biblia kubʼij «kʼakʼ kaj» che) y kkiqʼat na tzij pa kiwiʼ ri utz taq winaq (che ri Biblia kubʼij «kʼakʼ uwach Ulew» che). Ri qʼatal taq tzij riʼ kkibʼan na ronojel rech ri winaq kkiriq utzil cho ri uwach Ulew, junam rukʼ ri xraj ri Dios nabʼe kanoq (Isaías 65:17; 2 Pedro 3:13).
¿E jampaʼ ri kebʼe pa ri kaj?
Ri Biblia kubʼij che e 144,000 winaq kekʼastajisax na rech kebʼe pa ri kaj (Apocalipsis 7:4). Ri apóstol Juan xril pa jun visión «ri Alaj Chij takʼal puwiʼ ri juyubʼ Sión. E kʼo jun sient kawinaq kajibʼ mil (144,000) winaq rukʼ» (Apocalipsis 14:1-3; Juan 1:29; 1 Pedro 1:19). Ri juyubʼ Sión kukʼutunisaj ri eqeleʼn che uyaʼom ri Dios che ri Jesús y ri e 144,000 winaq (Salmo 2:6; Hebreos 12:22).
Ri e chaʼom rech kkiqʼat tzij rukʼ ri Jesús pa ri kaj xuqujeʼ kbʼix «jun chʼutin alaj mulaj chij» chke (Apocalipsis 17:14; Lucas 12:32). Rukʼ wariʼ kqachʼobʼo che xa e jujun ri e chaʼom rech kkiqʼat tzij pa ri kaj (Juan 10:16).
Molom taq tzij che kbʼix chkij ri kebʼe pa ri kaj
Ri kkichomaj jujun winaq: Konojel ri utz taq winaq kebʼe pa ri kaj.
Ri qastzij: Junam rukʼ ri kubʼij ri Dios e kʼi chke ri utz taq winaq kekʼojiʼ na cho ri uwach Ulew (Salmo 37:11, 29, 34).
Ri Jesús xubʼij: «Man kʼo ta jun bʼenaq chikaj» (Juan 3:13). Rukʼ wariʼ kqetaʼmaj che ri winaq che xekam nabʼe chuwach ri Jesús xebʼe ta pa ri kaj junam rukʼ ri Abrahán, Moisés, Job y David (Hechos 2:29, 34). Ri e areʼ keyem che kekʼastajisax cho ri uwach Ulew (Job 14:13-15).
Ri kʼastajibʼal che kyaʼ chke ri kebʼe pa ri kaj kbʼix «nabʼe kʼastajibʼal» che (Apocalipsis 20:6). Rumal laʼ kʼo jun chi kʼastajibʼal, are ri winaq che kekʼasux cho ri uwach Ulew.
Ri Biblia kubʼij che chuxeʼ ri uQʼatbʼal tzij ri Dios «man kʼo ta chi kamikal» (Apocalipsis 21:3, 4). Qastzij che wariʼ are kchʼaw chrij ri kamikal che kʼo cho ri uwach Ulew, rumal che pa ri kaj kʼo ta kamikal.
Ri kkichomaj jujun winaq: Are ri winaq kchowik we kbʼe pa ri kaj o kkanaj kan cho ri uwach Ulew.
Ri qastzij: Xaq xiw ri Dios kbʼinik jachin kekunik kebʼe pa ri kaj (Filipenses 3:14). Are chiʼ ri Dios keʼuchaʼ ri winaq rech kebʼe pa ri kaj are ta kril ri kibʼanik o jawchiʼ kkaj kekanaj wi (Mateo 20:20-23).
Ri kkichomaj jujun winaq: Ri winaq che keya kan cho ri uwach Ulew are ri taqal ta chke che kebʼe pa ri kaj.
Ri qastzij: Ri Dios kubʼij na chke ri winaq che kekanaj na cho ri uwach Ulew: «Nutinamit», «ri e chatal wumal» y «ri e utewchim ri Ajawaxel» (Isaías 65:21-23). Ri winaq riʼ kkibʼano che qas ktzʼaqat na ri urayinik ri Dios: che kekʼojiʼ sukʼalaj taq winaq pa jun kotzʼiʼjalaj uwach Ulew (Génesis 1:28; Salmo 115:16; Isaías 45:18).
Ri kkichomaj jujun winaq: Ri número 144,000 che kʼo pa Apocalipsis xa simbólico.
Ri qastzij: Jujun taq mul ri Biblia kchʼaw chrij números simbólicos are kʼu ronojel ta mul kukojo. Jun kʼutbʼal, ri «kabʼlajuj kibʼiʼ ri [doce apóstoles] ri e rech ri Alaj Chij» (Apocalipsis 21:14). Chqilaʼ jujun taq kʼutbʼal che kukʼutu che ri número 144,000 xaq ta simbólico.
Apocalipsis 7:4 kuya ubʼixik «ri kajilabʼal ri xkoj ketal, are jun sient kawinaq kajibʼ mil (144,000)». Tekʼuriʼ kuqʼalajisaj che junam ta ri kajilabʼal kukʼ ri «kʼiʼalaj winaq, ri man kʼo ta jun kkun che kajilaxik». Ri «kʼiʼalaj winaq» riʼ xuqujeʼ kyaʼ kolotajem chke (Apocalipsis 7:9, 10). Wet ri número 144,000 xaq simbólico y we ta are kchʼaw chkij kʼiʼalaj winaq ketaʼmax ta riʼ che ri e kebʼ jupuq e junam taj. a
Xuqujeʼ kubʼij, che ri 144,000 «xeloqʼ chkixoʼl ri winaq che ri Dios xuqujeʼ che ri Alaj Chij, jetaneʼ ri e nabʼe taq uwachinik ri tikoʼn» (Apocalipsis 14:4). Ri «nabʼe taq uwachinik ri tikoʼn» kraj kubʼij che xa jubʼiqʼ kesax che ronojel ri tikoʼn. Rumal laʼ kkoj wajun tzij riʼ chke ri e chaʼom che kkiqʼat lo tzij pa kiwiʼ ri kʼiʼalaj taq winaq cho ri uwach Ulew (Apocalipsis 5:10).
a Ri profesor Robert Thomas xutzʼibʼaj wariʼ chkij ri 144,000 che kʼo pa Apocalipsis 7:4: «Kchʼaw chrij jun número definido, are kʼu ri kʼo pa 7:9 are jun número indefinido. We ta kqabʼij che are simbólico, kojkun ta riʼ kqabʼij literal che nijun número che kʼo pa ri wuj» (Revelation 1-7: An Exegetical Commentary [Comentario exegético de Revelación 1-7], página 474).
Wene' xuquje' utz kawilo
ETA'MANIK RE RI BIBLIA CHE NIM KIB'ANIK
¿Jas riʼ ri Rajawbʼal ri Dios?
Pa ri uministerio, Jesús xtzijon más chrij ri Rajawbʼal ri Dios chuwach jun chi kʼutunem. Pa kʼi taq junabʼ, ri e winaq kitom wajun Ajawbʼal riʼ pa chʼawem.
E KʼUTUNEM ESAM PA RI BIBLIA
Chawilaʼ jas ubʼanik wajun etaʼmanik riʼ
Chakʼamaʼ jun etaʼmanik re ri Biblia che tojom taj chnojimal katbʼe che rilik.