Ri Biblia xa jumul kchʼaw chrij ri tatuajes, Levítico 19:28, kubʼij: «Mawi meʼitʼiq etal che ri icuerpo». Ri Dios xuya wajun taqanik riʼ chke ri israelitas rech kkibʼan ta ke jas ri kkibʼan ri nikʼaj chi tinamit che kkikoj etal y ri ubʼiʼ ri kidioses che ri kicuerpo (Deuteronomio 14:2). Paneʼ ri cristianos e kʼo ta chi chuxeʼ wajun taqanik riʼ, are kʼu rajawaxik kojchoman chrij ri pixabʼ che kukʼut chqawach.

¿La utz we jun cristiano kubʼan jun utatuaje?

 Chqilaʼ jujun textos re ri Biblia che kojutoʼ che uchʼobʼik:

•   «Ri ixoqibʼ utz katzʼiʼaqixik kibʼ kkibʼano, rukʼ jikomal» (1 Timoteo 2:9). Ri pixabʼ riʼ xuqujeʼ utz chke ri achijabʼ. Ri cristiano rajawaxik utz kubʼan che usukʼumaxik ribʼ rech ri ubʼantajik kubʼan ta kʼax chke ri nikʼaj chik.

•   E jujun kkibʼan kitatuajes rumal che kkaj kkikʼutu e jachinoq o che kkikʼutu che kʼo ta nijun ktaqan pa kiwiʼ y kkibʼan ri kkaj rukʼ ri kicuerpo. Are kʼu, ri Biblia kubʼij: «Chi kijach ri icuerpo pa uqʼabʼ ri Dios, che jun tabʼal toqʼobʼ cho ri Dios, jun tastalik sipanik, ri kʼaslik, ri kqaj chuwach ri Dios. Are waʼ ri qas qʼijilanik ri kiyaʼ che ri Dios» (Romanos 12:1). Ri uchomaxik rij ri jastaq keʼutoʼ ri kkaj kkibʼan kitatuaje rech kkichomaj jasche kkaj kkibʼano. Jun kʼutbʼal, weneʼ are kkaj kkibʼan ke jas ri kkibʼan ri winaq o rech kkikʼutu che e kʼo pa jun grupo. Are kʼu rajawaxik kkichomaj: «¿Jas kinbʼano we utz ta chi kinwil ri nutatuaje?». We nabʼe kechoman chrij jasche kkaj kkibʼano, kekun riʼ utz ri kkichaʼ ubʼanik (Proverbios 4:7).

•   «Ri chomanik taq ri utz kichomaxik utz keʼel na; ri xaq aninaq kibʼanik kkikʼam uloq etzelatajik» (Proverbios 21:5). Ri kkibʼan kitatuaje kechoman ta chrij ri kkichaʼ ubʼanik, rumal laʼ rajawaxik kechoman chrij che ri tatuaje xaq ta jubʼiqʼ tiempo kuchʼijo. Are kʼu wariʼ kʼo kubʼan pa ri kikʼaslemal, che ri kachilanik y pa ri kichak. Xuqujeʼ resaxik jun tatuaje sibʼalaj paqal rajil y sibʼalaj kʼax. Qas qʼalaj che kimik e kʼi winaq kkaj ta chi ri kitatuaje rumal che e kʼi chi ri winaq che kechakun chrij uchupik tatuajes.