Chachomaj: diez minutos opaninaq Karen pa jun nimaqʼij tekʼuriʼ, xaq kʼateʼ, xuta ri uchʼabʼal jun winaq che kuchʼobʼ uwach:

Are chiʼ xkaʼy chrij, xrilo che are ri rachiʼl ubʼiʼ Jessica, rukʼam kebʼ cervezas. Xuya jun che xuqujeʼ kubʼij: «Man at jun alaj akʼal ta chik. Katkunik katkikot jubʼiqʼ».

Karen kraj taj kutij tzam rumal che kʼa majaʼ ri ujunabʼ, are kʼu xuqujeʼ kraj taj che ri rachiʼl kuchomaj che kraj taj kkikotik. Xuqujeʼ, Jessica are jun utz ali. We are kutij tzam, are ta jun itzel jastaq. «Xa jun cerveza —kuchomaj—. Junam ta rukʼ utijik drogas».

Wet at, at Karen, ¿jas kabʼan riʼ?

Rech kachaʼ ubʼanik ri utz pa jun jastaq junam rukʼ wariʼ, rajawaxik kkʼojiʼ ri qas abʼantajik. Ri abʼantajik kubʼij chawe at jachinoq xuqujeʼ ri akojonik. Retaʼmaxik wariʼ katuchajij xuqujeʼ kuya achuqʼabʼ rech kabʼan ri kawaj are ta ri kkibʼij ri nikʼaj chik chawe (1 Corintios 9:26, 27).

¿Jas kabʼan che uriqik ri achuqʼabʼ? Nabʼe, chatchoman chrij ri e preguntas riʼ.

We awetaʼm ri qas utz tajin kabʼano, pa nikʼaj chi tzij, ri katkun che ubʼanik xuqujeʼ ri abʼantajik, kakubʼsaj más akʼuʼx chbʼil awibʼ.

KʼUTBʼAL RE RI BIBLIA. Ri apóstol Pablo xutzʼibʼaj: «Puneʼ man kinnaʼw taj kintzijonik, man in je ta waʼ pa ri wetaʼmabʼal» (2 Corintios 11:6). Rumal che qas retaʼm ri utzij ri Dios, amaqʼel xubʼan ri sukʼilal pa neʼ xyoqʼik. Xuya taj che ri itzel tzij xkibʼij nikʼaj chik xresaj ri ukubʼsal ukʼuʼx (2 Corintios 10:10; 11:5).

CHACHOMAJ RI KABʼANO: Chatzʼibʼaj jun chke ri katkun che ubʼanik o abʼantajik.

Chatzʼibʼaj jun chke ri qas utz abʼantajik (jun kʼutbʼal, chʼuchʼuj awanimaʼ, katsipanik, kkikubʼsaj kikʼuʼx nikʼaj chik chawij o qas kabʼan ri kabʼij).

Junam rukʼ jun cadena che ktʼoqopin jachiʼ kʼo ta uchuqʼabʼ, at xuqujeʼ kasach uwach ri qas abʼantajik, pa nikʼaj chi tzij ksach chawe at jachinoq, we kakoj ta achuqʼabʼ che usukʼumaxik ri kubʼan kʼax chawe, katuchʼako.

KʼUTBʼAL RE RI BIBLIA. Pablo qas xuchʼobʼo che ajmak. Rumal laʼ xutzʼibʼaj: «Kakikot ri wanimaʼ rumal ri upixabʼ ri Dios. Kinwil kʼu jun pixabʼ chik pa ri nucuerpo, ri kukʼulelaj ri pixabʼ ri utz karil wi ri nuchomanik. In kʼo kʼu pa uqʼabʼ ri upixabʼ ri mak, ri kʼo pa ri nucuerpo» (Romanos 7:22, 23).

CHACHOMAJ RI KABʼANO: ¿Jas ri kasukʼumaj na pa ri akʼaslemal?

¿La katpaqiʼ pa jun taxi tekʼuriʼ kabʼij che ri kbʼinsanik che xaq ksutinik kʼa kkʼis na ri ugasolina? Qastzij che kabʼan ta waʼ. Xuqujeʼ sibʼalaj nim riʼ katojo.

¿Jas ri kqetaʼmaj? We qas kachomaj ri kabʼan pa ri akʼaslemal, xaq ta katsutin riʼ. Awetaʼm riʼ ri katopan wi xuqujeʼ ri kabʼano rech katopanik.

KʼUTBʼAL RE RI BIBLIA. Pablo xutzʼibʼaj: «Man kinkʼam ta wanim ri je ta ne ma ta kinwilo jawijeʼ kinbʼe wi» (1 Corintios 9:26). Pablo retaʼm jawiʼ ri kbʼe wi, xuyaʼo che ri jastaq kbʼantajik, xujach ri ukʼaslemal che ubʼanik ri kraj (Filipenses 3:12-14).

CHACHOMAJ RI KABʼANO: Chatzʼibʼaj oxibʼ jastaq che kawaj kabʼan pa wajun junabʼ riʼ.

We qas ta awetaʼm ri kakojo, katkun ta riʼ kabʼij jas ri kabʼano. Kʼi mul riʼ kakʼex ri abʼantajik rech katjunamataj kukʼ ri awachiʼl, katjunamataj ri rukʼ jun camaleón che kukʼex ri ucolor rech kjunamataj rukʼ ri kʼo che unaqaj. Ri kubʼan wariʼ kʼo ta ri qas ubʼantajik.

Are kʼu, we kakʼex ta ri achomanik —apasta neʼ kkibʼan ri nikʼaj chi winaq—, kasach ta ri qas abʼantajik.

KʼUTBʼAL RE RI BIBLIA. Weneʼ kʼa akʼal na ri Daniel are chiʼ xesax bʼi pa ri ufamilia. Pa neʼ je wariʼ xuriqo, «xuchomaj pa ranimaʼ» che kunimaj ri utaqanik ri Dios (Daniel 1:8). Xutzaq ta ri qas ubʼantajik xuqujeʼ xukʼex ta riʼ ri qas kraj kubʼano.

CHACHOMAJ RI KABʼANO: ¿Jas ri akojonik? Jun kʼutbʼal: ¿La kakojo che kʼo Dios? ¿Jasche kakojo? ¿Jas kubʼan chawe che qas awetaʼm che kʼolik?

¿La kachomaj che ri kʼaslemal che kqaj chuwach ri Dios katutoʼ? ¿Jasche?

Rumal laʼ, ¿jas kawaj katuxik: jun uxaq cheʼ kkʼam bʼi rumal ri kaqiqʼ o jun cheʼ che kuchʼij ri nimaʼq taq kaqiqʼ? We kawaj katux junam rukʼ jun cheʼ chakojoʼ achuqʼabʼ rech qas kaqʼalajisaj ri qas abʼantajik. Wariʼ katutoʼ che uchomaxik wajun pregunta riʼ: ¿Jas ri qas nubʼanik?