Kipreguntas ri sikʼinelabʼ
¿Jasche Isaías 60:1, kubʼij che Jerusalén kwalijik y kpe ri usaqil?
Isaías 60:1 kchʼaw chrij Jerusalén, ri capital rech Judá ojer kanoq (Is. 60:14; 62:1, 2). Ri Jerusalén are kukʼutunisaj ri tinamit Israel. Are kʼu ¿jampaʼ xwalij ri Jerusalén xuqujeʼ jampaʼ xkʼutun ri usaqil? ¿La kʼo kraj kubʼij ri e utzij ri Isaías pa taq ri qaqʼij? Chqilaʼ ri respuesta re ri preguntas riʼ.
¿Jampaʼ xwalij ri Jerusalén xuqujeʼ jampaʼ xkʼutun ri usaqil? 70 junabʼ xekʼojiʼ ri Judíos pa Babilonia, pa taq riʼ ri qʼij ri tinamit re Jerusalén xuqujeʼ ri templo bʼanom kan kʼax chke. Pa taq ri kiqʼij ri medos y persas are chiʼ xechʼakan puwiʼ ri tinamit re Babilonia, ri israelitas xyaʼ bʼe chke xetzalij pa ri kitinamit rech kkiqʼijilaj ri Dios chilaʼ (Esd. 1:1-4). Pa ri junabʼ 537 ri judíos re ri 12 tribus che e kʼo na pa Babilonia xetzalij pa ri kitinamit (Is. 60:4). Xkimajij uyaʼik tabʼal toqʼobʼ chuwach ri Jehová y xkimajij ubʼanik ri nimaqʼij che bʼim chke kkibʼano y xkimajij chi uyakik ri templo (Esd. 3:1-4, 7-11; 6:16-22). Are chiʼ xwalij chi jumul ri tinamit Jerusalén xkʼutunik che kʼo ri utewchibʼal ri Jehová pa uwiʼ, je wariʼ xkʼutun ri kisaqil chkiwach ri tinamit che kkiqʼijilaj ta ri Jehová.
Ri profecías che xubʼij kan ri profeta Isaías chrij ri qʼijilanik pa Jerusalén naj taj xuchʼijo. Rumal che kʼi chke ri taq israelitas xkaj ta chik xkinimaj ri Jehová (Neh. 13:27; Mal. 1:6-8; 2:13, 14; Mat. 15:7-9). Xuqujeʼ are chiʼ xqʼax ri tiempo xkixutuj ri Mesías, che are ri Jesucristo (Mat. 27:1, 2). Rumal laʼ pa ri junabʼ 70 ri templo xuqujeʼ ri Jerusalén xbʼan chi kʼax che.
Ri Jehová ubʼim chik che qas kbʼantaj na wariʼ (Dan. 9:24-27). Wariʼ kuqʼalajisaj chqawach che ri profecías che kubʼij ri capítulo 60 re Isaías man xtzʼaqat ta pa ri ojer Jerusalén.
¿La kʼo kraj kubʼij ri e utzij ri Isaías pa taq ri qaqʼij? Kʼolik, rumal che xuqujeʼ are kchʼaw chrij ri Jerusalén che kʼo pa ri kaj. ¿Y jas riʼ ri Jerusalén che kʼo pa ri kaj? Are kchʼaw chkij konojel ri ángeles che e kʼo pa ri kaj. Are chiʼ ri apóstol Pablo xchʼaw chrij wariʼ, xubʼij: «Are qanan oj» (Gál. 4:26). Ri e ral are ri Jesús y ri 144,000 che kebʼe pa ri kaj, che chkixoʼl kʼo ri Pablo. Ri kebʼe pa ri kaj e are ri «tastalikalaj tinamit», ri Israel re ri Dios (1 Ped. 2:9; Gál. 6:16).
¿Jas xubʼan ri Jerusalén che uwalajisaxik ribʼ y che ukʼutik ri usaqil? Xubʼan rukʼ ri kitobʼanik ri e ral che e kʼo pa ri uwach Ulew. Chqilaʼ ri kjunamataj wi ri kubʼij ri capítulo 60 re Isaías rukʼ ri xkikʼulmaj pa ri kikʼaslemal.
Ri kebʼe pa ri kaj xajwatajik che kewaʼlijik rumal che are chiʼ xekam ri apóstoles ri apostasía xubʼano che xeqaj pa qʼequʼmal pa ri kikojonik (Mat. 13:37-43). Jetaneʼ xeqaj pa uqʼabʼ ri Nimalaj Babilonia, ri e qastzij taj kojonem. Xekʼojiʼ na pa uqʼabʼ kʼa pa ri junabʼ 1914 (Mat. 13:39, 40). Tekʼuriʼ pa ri junabʼ 1919 xetzoqopitajik y xkimajij ukʼutik ri kisaqil pa ri kikojonik. ¿Jas xkibʼan che ukʼutik? Xkibʼano are chiʼ rukʼ ronojel kanimaʼ xkimajij utzijoxik ri utzij ri Dios. Umajim lo chilaʼ sibʼalaj e kʼi winaq re ronojel tinamit e bʼenaq che uriqik wajun saqil riʼ, xuqujeʼ ri jupuq Israel, che are ri qʼatal taq tzij che kubʼij Isaías 60:3 (Apoc. 5:9, 10). a
Pa ri petinaq, ri cristianos che kebʼe pa ri kaj más kkikʼutunisaj na ri usaqil ri Jehová. Are chiʼ kekamik, ri e areʼ keʼux na «ri kʼakʼalaj Jerusalén», kraj kubʼij, ri unovia ri Cristo, che are e 144,000 qʼatal taq tzij y kojol tabʼal taq toqʼobʼ (Apoc. 14:1; 21:1, 2, 24; 22:3-5).
Ri Kʼakʼ Jerusalén kʼo jun nimalaj chak kubʼan na, ri utzʼaqatisaxik ri kubʼij Isaías 60:1 (chajunamisaj Isaías 60:1, 3, 5, 11, 19, 20 rukʼ Apocalipsis 21:2, 9-11, 22-26). Jachaʼ ri Jerusalén re ojer kanoq che xux ri capital re ri tinamit Israel, ri Kʼakʼ Jerusalén y ri Cristo kekʼojiʼ na pa ri kʼakʼ Qʼatbʼal tzij. ¿Jas kraj kubʼij Apocalipsis are chiʼ kubʼij che ri Kʼakʼ Jerusalén «kqaj uloq chikaj rukʼ ri Dios»? Kraj kubʼij che ktaqan na puwiʼ ri uwach Ulew. Ri Biblia kubʼij che ri sukʼ taq winaq re ronojel tinamit «kebʼin na pa ri usaqil» y keʼesax na pa uqʼabʼ ri makaj y kamikal (Apoc. 21:3, 4, 24). Y rukʼ wariʼ kesukʼumax «na konojel ri jastaq» che xkibʼij kan ri Isaías y nikʼaj chi profetas (Hech. 3:21). Wajun profecía riʼ xmajtaj loq are chiʼ ri Jesús xux Qʼatal tzij y kkʼisik are chiʼ kkʼis ri Mil Junabʼ.
a Ezequiel 37:1-14 y Apocalipsis 11:7-12 xuqujeʼ kechʼaw chrij ri qastzij qʼijilanik che xmajtaj lo pa ri junabʼ 1919. Ri profecía re Ezequiel are kchʼaw chkij konojel ri cristianos che kebʼe pa ri kaj kewalajisax na pa ri kikojonik rumal che kʼi tiempo xekʼojiʼ pa ri qastzij taj kojonem. Are kʼu ri profecía re Apocalipsis are kchʼaw chrij jun alaj jupuq qachalal che kebʼe pa ri kaj y che tajin kkikʼam ubʼe ri uchak ri Jehová kewalajisax na pa ri kikojonik rumal che xetzʼapix pa cárcel y kʼo ta kimak. Pa ri junabʼ 1919, wajun alaj jupuq riʼ xbʼix «jikalaj pataninel, utz uchomanik» che (Mat. 24:45; chawilaʼ La adoración pura de Jehová: ¡por fin restaurada!, pág. 118).
