1. ¿Jasche kʼax kqabʼan che ukʼutik nimanik?

 ¿LA KʼAX kabʼan che ukʼutik nimanik? Are je xubʼan ri David. Rumal laʼ xubʼij wariʼ che ri Dios: «Bʼanaʼ la chwe chi kinnaʼ chi jumul ri kikotemal ri kuyaʼ ri kolonik la» (Sal. 51:12). Paneʼ ri David sibʼalaj kuloqʼoqʼej ri Jehová, are kʼu jujun taq mul kʼax xubʼan che unimaxik y ri oj xuqujeʼ je kqakʼulmaj. ¿Jasche? Nabʼe, rumal che qechebʼem kan wajun itzel bʼantajik riʼ che kʼax kqabʼan che ukʼutik nimanik. Ukabʼ, rumal che ri Satanás kojutaqchiʼj rech kojniman taj, junam rukʼ ri xubʼan ri areʼ (2 Cor. 11:3). Y urox, rumal che oj kʼo pa jun uwach Ulew che ri winaq kkaj taj kenimanik; y che «ri uxlabʼal ri kataqan pa kiwiʼ ri man keniman ta che ri Dios» (Efes. 2:2). Rumal laʼ, rech kqanimaj ri Jehová y ri uyaʼom taqanik pa kiqʼabʼ rajawaxik kqakoj qachuqʼabʼ rech keqanimaj y kqaxutuj ri kkibʼan ri winaq che e kʼo pa uqʼabʼ ri Satanás.

2. ¿Jas kraj kubʼij ukʼutik nimanik? (Santiago 3:17).

² (Chasikʼij uwach Santiago 3:17). Ri xtzʼibʼan ri wuj Santiago xubʼij che ri winaq che kʼo kinojibʼal «e nimanelabʼ». ¿Jas kraj kubʼij wariʼ? Che rajawaxik kojniman chke ri yaʼom taqanik pa kiqʼabʼ rumal ri Jehová y che xa ta kojtaqchiʼx che kinimaxik. Are kʼu ri Jehová kubʼij ta chqe che kojniman chke ri winaq che xa kojkitaq che ubʼanik itzel taq jastaq (Hech. 4:18-20).

3. ¿Jasche nim ubʼanik chuwach ri Jehová che kojniman chke ri kʼo taqanik pa kiqʼabʼ?

³ Weneʼ kqanaʼo che are kʼax ta kqabʼan che unimaxik ri Jehová chkiwach ri winaq, rumal che ri taqanik che kuya ri areʼ konojel e tzʼaqat, are kʼu ri taqanik che kkiya ri winaq  kʼi taq mul kʼax unimaxik (Sal. 19:7). Paneʼ je wariʼ, ri Jehová uyaʼom taqanik pa kiqʼabʼ ri tat nan, ri qʼatal taq tzij y ri e kʼamal bʼe pa ri congregación (Prov. 6:20; 1 Tes. 5:12; 1 Ped. 2:13, 14). Are chiʼ keqanimaj ri winaq riʼ are tajin kqanimaj ri Jehová. Chqilampeʼ jas kqabʼan che kinimaxik ri yaʼom taqanik pa kiqʼabʼ rumal ri Jehová y paneʼ kʼax ubʼanik.

4. ¿Jasche ri alabʼom alitomabʼ kkaj taj keniman chke ri kitat kinan?

⁴ Ri alabʼom alitomabʼ e kʼo kachiʼl che keniman ta chke ri kitat kinan (2 Tim. 3:1, 2). ¿Jasche e kʼi keniman taj? E Jujun kkilo che ri kitat kinan kkitaʼ jastaq chke che ni ri areʼ kkibʼano. E nikʼaj chi alabʼom alitomabʼ kkichomaj che ri taqanik che kkiya ri kitat kinan chke kʼo ta chi upatan, kʼax ubʼanik o kʼo ta ktobʼan wi chke. Ala ali, ¿la kʼo jumul je achomam wariʼ? E kʼi weneʼ kʼax kkibʼan che unimaxik wajun taqanik che kubʼij ri Jehová: «Alkʼwalaxelabʼ, rumal rech chi ix kojoninaq che ri Ajawaxel, cheʼinimaj ri itat inan. Are kʼu waʼ ri sukʼ» (Efes. 6:1). ¿Jas kattowik rech katnimanik?

5. Junam rukʼ ri kubʼij Lucas 2:46-52, ¿jasche ri Jesús jun utzalaj kʼutbʼal re nimanik chke ri alkʼwalaxelabʼ?

⁵ Jun utz kʼutbʼal re nimanik are ri Jesús (1 Ped. 2:21-24). Ri areʼ tzʼaqat ri ukʼaslemal are kʼu ri utat unan e ajmakibʼ. Ri Jesús xniman chke, paneʼ jujun taq mul xesachik o xkichʼobʼ ta ri tajin kubʼano o kuchomaj (Éx. 20:12). Chqilampeʼ ri xukʼulmaj are chiʼ kʼateʼ 12 ujunabʼ (chasikʼij uwach Lucas 2:46-52). Ri Jesús xbʼe kukʼ ri ufamilia are chiʼ xbʼe pa Jerusalén che ubʼanik ri nimaqʼij ri kbʼan ronojel taq junabʼ. Are chiʼ ri José y María xetzalij lo cho kachoch xkil taj che ri Jesús xkanaj kanoq. Rajawaxik riʼ kkilo we konojel ri e kalkʼwal e teren chkij. Are chiʼ xekiriqa, ¡ri María xubʼij che utz ta ri xubʼano che xutas kan ribʼ! Ri Jesús xkun riʼ wet xubʼij che che qastzij ta ri tajin kubʼij ri María che, are kʼu xubʼij ta wariʼ. Xaneʼ rukʼ utzilal xubʼij chke ri rumal che xkanaj kanoq. Are kʼu ri José y María «man xkichʼobʼ ta ri tzij ri xubʼij chke». Paneʼ je wariʼ ri Jesús xuya «ribʼ pa taqik chke».

6, 7. ¿Jas ketoʼw ri alabʼom alitomabʼ rech keniman chke ri kitat kinan?

⁶ Ala ali are chiʼ ri atat anan utz ta ri kkibʼano o kkichʼobʼ ta ri kabʼano, ¿la kʼax kabʼan che kinimaxik? ¿Jas kattowik? Nabʼe, chatchoman chrij ri kunaʼ ri Jehová. Ri Biblia kubʼij che we ri akʼalabʼ keniman chke ri kitat kinan, «kqaj chuwach ri Ajawaxel» (Col. 3:20). Are chiʼ ri atat anan kkichʼobʼ ta ri kanaʼo o kkiya taqanik chawe che kʼax ubʼanik, chnaʼtaj chawe che ri Jehová kuchʼobʼ ri kanaʼo. Are kʼu, paneʼ ri atat anan kkichʼobʼ ta ri kanaʼo o kʼi taq mul kesachik, we katniman chke ri Jehová sibʼalaj kkikot awukʼ.

⁷ Ukabʼ, chatchoman chrij ri kkinaʼ ri atat anan. Are chiʼ keʼanimaj kekikot awumal y kkikubʼsaj kikʼuʼx chawij (Prov. 23:22-25). Y qastzij riʼ che más keʼaloqʼoqʼej. Jun qachalal che kel pa Bélgica Alexandre ubʼiʼ, kubʼij: «Are chiʼ más xinniman chke ri nutat nunan xkʼojiʼ jun utz achilanik chqaxoʼl y más kojkikot chik». b Urox, chachomaj che are chiʼ katnimanik katutoʼ pa ri akʼaslemal kimik y pa ri petinaq. Ri a Paulo che kel pa Brasil,  kubʼij wariʼ: «Kinimaxik ri nutat nunan inutoʼom rech kinnimaj ri Jehová y ri kʼo taqanik pa kiqʼabʼ». Ri Biblia kubʼij chawe ri rumal che rajawaxik kanimaj ri atat: «Rech utz katelik, naj kʼut katkʼasiʼ na cho ri uwach ulew» (Efes. 6:2, 3).

8. ¿Jasche e jujun alabʼom alitomabʼ kkaj keniman chke ri kitat kinan?

⁸ E kʼi alabʼom alitomabʼ kilom che kkiriq utzilal are chiʼ kekinimaj ri kitat kinan. Ri al Luiza che xuqujeʼ kel pa Brasil, nabʼe kuchʼobʼ taj jasche ri utat unan kkaj taj che kkʼojiʼ uteléfono, rumal che kʼi alabʼom alitomabʼ che junam ujunabʼ kukʼ kʼo chi kiteléfono. Are kʼu xrilo che ri utat unan xa tajin kkichajij. Y retaʼm che ri nimanik chke ri utat unan kraj taj kubʼij che kʼo ta chi kkun che ubʼanik, xaneʼ kʼo ktobʼan wi che. Jun ali che kel pa Estados Unidos ubʼiʼ Elizabeth, kubʼij che kʼax kubʼan che kinimaxik ri utat unan. Ri areʼ kubʼij: «Kinchoman chrij ronojel ri taqanik che kkiya ri nutat nunan chwe y kinchoman chrij ronojel ri utzilal uyaʼom chwe». Monica, che kel pa Armenia, kubʼij che más kuriq utzilal are chiʼ kniman chke ri utat unan.

9. ¿Jas kkichomaj jujun chrij ri nimanik chke ri qʼatal taq tzij?

⁹ Ri winaq kilom che keʼajwataj ri qʼatal taq tzij y che rajawaxik «kkiya kibʼ pa taqik chke ri qʼatal taq tzij ri e kojom» (Rom. 13:1). Are kʼu are chiʼ ri qʼatal taq tzij kkiya taqanik che kʼax ubʼanik, kkaj ta chik kenimanik. Chojchoman chrij ri utojik ri impuestos. Jun encuesta che xbʼan pa Europa, kubʼij che jun chke kajibʼ winaq, «kubʼij che rajawaxik taj ktoj ri impuestos are chiʼ más kyaʼ uwiʼ ri ktaʼik». Rumal laʼ kkichomaj che xa 65% re ri impuestos kkitojo.

10. ¿Jasche kqanimaj ri taqanik che kkiya ri qʼatal taq tzij paneʼ utz ta ri kkichaʼ ubʼanik?

¹⁰ Junam rukʼ ri kubʼij ri Biblia ri qʼatal taq tzij kkibʼan kʼax chke ri winaq, rumal che e kʼo pa uqʼabʼ ri Satanás naj ta chi kraj ksachisax kiwach (Sal. 110:5, 6; Ecl. 8:9; Luc. 4:5, 6). Xuqujeʼ kubʼij chqe che «ri kukʼulelaj uwach ri qʼatal tzij, are kukʼulelaj ri utaqanik ri Dios». Ri Jehová uyaʼom na che e kʼo ri qʼatal taq tzij rech kʼo jachin ktaqan pa kiwiʼ ri tinamit y kraj che keqanimaj. Rumal laʼ rajawaxik kqatoj ri qakʼas «kukʼ konojel», y wariʼ kraj kubʼij che kqatoj ri impuestos, nim keqil wi y keqanimaj (Rom. 13:1-7). Weneʼ kqachomaj che kʼax unimaxik jujun taq taqanik che kkiya ri qʼatal taq tzij o kqachomaj che kʼo ta upatan chqe. Are kʼu ri oj kqanimaj ri Jehová y keqanimaj ri qʼatal taq tzij, are kʼu kojniman ta chke are chiʼ xa kojkitaqchiʼj che ubʼanik jun jastaq che utz taj (Hech. 5:29).

11, 12. Junam rukʼ ri kubʼij Lucas 2:1-6, ¿Jas xkibʼan ri José y María rech xkinimaj jun taqanik che xuya ri qʼatal tzij che kʼax ubʼanik? ¿Y Jas utzilal xkiriq rukʼ wariʼ? (Xuqujeʼ chawilaʼ ri e wachbʼal).

 ¹¹ Kʼo kʼi kqetaʼmaj chkij ri José y María. Ri areʼ xeniman che ri qʼatal tzij paneʼ jujun taq mul kʼax ubʼanik ri taqanik che xuyaʼo (chasikʼij uwach Lucas 2:1-6). Jun kʼutbʼal, xkoj pa kʼax ri kinimanik are chiʼ ri María xa jubʼiqʼ chi kraj kkʼojiʼ ri ral. Ri qʼatal tzij César Augusto xuya jun taqanik che konojel ri winaq kekitzʼibʼaj ri kibʼiʼ pa ri qʼatbʼal tzij. Rech xkinimaj ri qʼatal tzij rajawaxik xebʼe pa Belén rech xekitzʼibʼaj ri kibʼiʼ. Wariʼ xubʼano che xebʼin 150 kilómetros (93 millas) pa taq kʼachelaj. Kʼax xkiriqo are chiʼ xebʼe pa wajun tinamit riʼ más na ri María. Weneʼ xechoman chrij ri kukʼulmaj ri areʼ y ri alaj ral. ¿Y we kkʼojiʼ ri ral are chiʼ e bʼenaq pa ri bʼe? ¡Ri María kralaj na ri Mesías! La kraj kubʼij wariʼ che rajawaxik taj kunimaj ri qʼatal tzij.

¹² Ri José y María amaqʼel xkinimaj ri taqanik che xuya ri qʼatal tzij. Y ri Jehová xeʼutewchij rumal ri kinimanik: ri María kʼo ta xukʼulmaj are chiʼ xopan pa Belén y kʼo ta uyabʼ ri alaj ral che xkʼojik, rukʼ wariʼ xtzʼaqat jun profecía re ri Biblia (Miq. 5:2).

13. ¿Jas kubʼan ri qanimanik che kitoʼik ri qachalal?

¹³ Are chiʼ kojniman chke ri qʼatal taq tzij kqariq utzilal xuqujeʼ ri e nikʼaj chik. Jun utzilal che kqariqo are che kqariq ta kʼax y kʼax ta kqabʼan che unimaxik ri taqanik che kkiya ri qʼatal taq tzij (Rom. 13:4). Jun chi utzilal che kuya ri nimanik, are che ri qʼatal taq tzij utz kechʼaw chqij ri oj testigos rech Jehová. Are waʼ ri xkʼulmataj pa ri tinamit Nigeria ojer kanoq. E jun jupuq soldados xeʼok pa ri Ja rech Ajawbʼal are chiʼ tajin kbʼan ri riqbʼal ibʼ. Tajin kekitzukuj jujun winaq che kkaj taj kkitoj ri impuestos. Are kʼu ri kʼamal kibʼe ri soldados xubʼij chke che keʼel bʼi chilaʼ. Xubʼij: «Ri testigos rech Jehová amaqʼel kkitoj ri impuestos». Are chiʼ amaqʼel kojniman chke ri qʼatal taq  tzij, ktobʼanik rech utz kechʼaw ri winaq chrij ri utinamit ri Jehová. Wajun nimanik riʼ ktobʼanik rech kkiriq ta kʼax ri qachalal (Mat. 5:16).

14. ¿Jas xubʼan jun qachalal rech xniman chke ri qʼatal taq tzij?

¹⁴ Weneʼ jujun taq mul kʼax kqabʼan che kinimaxik ri qʼatal taq tzij. Jun qachalal re Estados Unidos ubʼiʼ Joanna, kubʼij wariʼ: «Sibʼalaj kʼax kinbʼan che kinimaxik ri qʼatal taq tzij, rumal che kibʼanom kʼi kʼax chke ri nufamilia». Are chiʼ xqʼax ri tiempo ri Joanna xukʼex ri uchomanik. ¿Jas xubʼan che ubʼanik? Nabʼe, xusikʼij ta chi mensajes pa internet che kchʼaw chkij ri qʼatal taq tzij rech kpe ta itzel taq chomanik pa ujolom (Prov. 20:3). Ukabʼ, xutaʼ che ri Jehová rech kukubʼsaj más ukʼuʼx chrij y chkij ta ri qʼatal taq tzij (Sal. 9:9, 10). Y urox, xeʼusikʼij ri qawuj che kchʼaw chrij che xaq xiw ri uQʼatbʼal tzij ri Dios kqatoʼ uwiʼ (Juan 17:16). Ri al Joanna kubʼij che kinimaxik ri qʼatal taq tzij uyaʼom jamaril pa ranimaʼ.

15. ¿Jasche kʼax kqabʼan che unimaxik ri taqanik che kuya ri utinamit ri Dios?

¹⁵ Ri Jehová kubʼij chqe che kojniman chke ri yaʼom taqanik chke pa ri congregación (Heb. 13:17). Paneʼ ri Jesús tzʼaqat, are kʼu e ukojom winaq pa ri congregación che xa ajmakibʼ. Jujun taq mul kʼax kqabʼan che kinimaxik ri taqanik che kkiyaʼo, más na are chiʼ kbʼix jun jastaq chqe che kqaj taj kqabʼano. Are waʼ ri xunaʼ ri apóstol Pedro. Are chiʼ jun ángel xubʼij che che keʼutij ri awaj che yaʼtal taj ketijik. Are kʼu ri Pedro oxmul xubʼij che kutij taj (Hech. 10:9-16). Chuwach ri areʼ utz ta ri xtaʼ che. Ri areʼ kʼamanaq chi che che jalan ri kubʼan che kibʼanik ri jastaq. We ri apóstol Pedro kʼax xubʼan che unimaxik jun ángel, ¿la mat qastzij che ri oj kʼax kqabʼan che kinimaxik ri yaʼom taqanik chke rumal che xa ajmakibʼ?.

16. ¿Jas xubʼan ri apóstol Pablo are chiʼ xyaʼ jujun taqanik che che utz ta xrilo? (Hechos 21:23, 24, 26).

¹⁶ Ri apóstol Pablo xukʼutu che kraj knimanik xuqujeʼ are chiʼ xyaʼ jujun taqanik che che chuwach ri areʼ qas ta kʼo upatan. Jujun cristianos judíos kkibʼij che kitom che ri Pablo tajin keʼutijoj ri winaq «che utasik kibʼ chrij ri upixabʼ ri Moisés» y che kniman ta che ri taqanik che xuya ri Jehová (Hech. 21:21). Ri kʼamal taq bʼe pa Jerusalén xkibʼij che ri Pablo che kuqʼalajisaj che tajin kniman che ri taqanik che xyaʼ che ri Moisés. Rech kubʼan wariʼ rajawaxik keʼukʼam bʼi kajibʼ achijabʼ pa ri templo rech kukʼutu che tajin kanim che ri taqanik che uyaʼom ri Dios. Are kʼu ri Pablo retaʼm che ri cristianos rajawaxik ta chik kkinimaj ri taqanik che yaʼom che ri Moisés y che ri areʼ kʼo ta jun itzel jastaq ubʼanom. Paneʼ je wariʼ aninaq xniman che ri taqanik che xyaʼ che. Ri Biblia kubʼij: «Ri Pablo xeʼukʼam kʼu bʼik ri kajibʼ achijabʼ. Chukabʼ chi kʼu qʼij xkijosqʼij kibʼ» (chasikʼij uwach Hechos 21:23, 24, 26). Rukʼ ri nimanik che xukʼutu xtobʼanik rech xkʼojiʼ jamaril chkixoʼl ri cristianos (Rom. 14:19, 21).

17. ¿Jas kqetaʼmaj chrij ri ukʼutbʼal ri qachalal Stephanie?

¹⁷ Jun qachalal ubʼiʼ Stephanie kʼax xubʼan che unimaxik jujun taqanik che xuya ri sucursal. Ri areʼ y ri rachajil sibʼalaj kekikotik rumal che tajin kkiya ri kitobʼanik pa jun lugar che kechʼaw pa jun chi chʼabʼal. Are kʼu ri sucursal xubʼij che ksach uwach wajun chʼabʼal riʼ y xeʼutaq bʼi ri qachalal  pa jun congregación che are ri kichʼabʼal. ¿Jas xunaʼ Stephanie? Ri areʼ kubʼij: «Sibʼalaj xinbʼisonik y xinchomaj che wajun chʼabʼal riʼ che kojchʼaw wi kajwataj ta tobʼanik che». Paneʼ je wariʼ ri xkʼulmatajik are kʼu xnimanik. Ri areʼ kubʼij: «Xwilo che ri xuchaʼ ubʼanik ri sucursal are ri más utz. Pa wajun congregación riʼ e kʼo kʼi qachalal che e kʼo ta ri kifamilia pa ri utinamit ri Jehová, rumal laʼ xojux kifamilia. Xuqujeʼ xinmajij uyaʼik etaʼmanik che jun qachalal ixoq che qajinaq uchuqʼabʼ ri ukojonik. Y kimik más kʼo nutiempo rech kinnikʼoj ri Biblia». Chukʼisbʼal kubʼij: «Qas wetaʼm che nukojom nuchuqʼabʼ rech kinnimanik y wariʼ kuya jamaril pa wanimaʼ».

18. ¿Jas utzilal kqariqo are chiʼ kojnimanik?

¹⁸ Qonojel kojkunik kojnimanik. Ri Jesús «xretaʼmaj ri nimanik rumal ri kʼax ri xuriqo» y rumal ta ri utzilal che xuriqo (Heb. 5:8). Ri oj xuqujeʼ kqetaʼmaj kojnimanik are chiʼ kqaqʼaxej kʼi taq kʼax pa ri qakʼaslemal. Chojchoman chrij ri xkʼulmatajik are chiʼ xumajij ri COVID-19. Xbʼix chqe che kojbʼe ta chi pa ri e riqbʼal ibʼ pa ri Ja rech Ajawbʼal y che kojbʼe ta chi che utzijoxik ri utzij ri Dios chuchiʼ taq ja. ¿Jas xanaʼo? ¿La kʼax xabʼan che unimaxik wariʼ? Apastaneʼ ri xabʼano are kʼu ri animanik xtobʼanik rech xkʼojiʼ jun utz awachilanik kukʼ ri qachalal y xakikotemaj ri Jehová. Kimik qas kqaj kqanimaj ri kbʼix chqe are chiʼ kopan ri nimalaj kʼaxkʼolil. We kojniman che ri kbʼix chqe kojkun riʼ kojkʼasiʼ kanoq (Job 36:11).

19. ¿Jasche kawaj katnimanik?

¹⁹ Xqetaʼmaj che are chiʼ kojnimanik kqariq kʼi tewchibʼal. Are kʼu kqaj kojniman che ri Jehová rumal che sibʼalaj kqaloqʼoqʼej y che kkikot qukʼ (1 Juan 5:3). Kojkun taj kqatzalij che ri Jehová ronojel ri uyaʼom chqe (Sal. 116:12). Are kʼu kojkunik kojniman che y keqanimaj ri uyaʼom taqanik pa kiqʼabʼ. Rukʼ ri qanimanik kqakʼutu che kʼo qanojibʼal y kqakikotemaj ri Jehová (Prov. 27:11).