1. ¿Jas jujun taq sipanik uyaʼom ri Jesús chqe?

 KʼO TA jun winaq uyaʼom jun sipanik junam rukʼ ri uyaʼom ri Jesús. Are chiʼ xkʼojiʼ cho ri uwach Ulew, xubʼan kʼi milagros y je wariʼ xeʼutoʼ ri winaq (Luc. 9:12-17). Y xusipaj ri ukʼaslemal chqe (Juan 15:13). Are chiʼ xkʼastajisaxik, amaqʼel xuya sipanik. Junam rukʼ ri xubʼij kanoq, xutaʼ che ri Jehová che kuya ri espíritu santo pa qawiʼ rech kojutijoj y kuya kubʼsal qakʼuʼx (Juan 14:16, 17, nota; 16:13). Jujun chi tobʼanik are ri e qariqbʼal ibʼ, chilaʼ kojutijoj wi ri Jesús rech kojkunik kqatzijoj ri utzij ri Dios cho ronojel uwach Ulew (Mat. 28:18-20).

2. ¿Jas riʼ ri e «sipanik» che yaʼom chqe? (Efesios 4:7, 8).

² Xaq xiw ta ri e sipanik riʼ uyaʼom ri Jesús chqe. Ri apóstol Pablo xutzʼibʼaj kanoq che, are chiʼ ri Jesús xtzalij pa ri kaj, xeʼuya winaq che sipanik (chasikʼij Efesios 4:7, 8). Xubʼij che ri Jesús xuya kan ri e sipanik riʼ rech kyaʼ tobʼanik pa ri congregación (Efes. 1:22, 23; 4:11-13). Pa taq ri qaqʼij, jujun chke ri «sipanik» riʼ are ri tobʼanelabʼ, ri kʼamal taq bʼe pa ri congregación y solinelabʼ re circuito. a Qetaʼm che ri achijabʼ riʼ e ajmakibʼ y kʼi kesach wi (Sant. 3:2). Pero e jun utz sipanik che xuya kan ri Jesús rech kojkitoʼo.

3. Chabʼij rukʼ jun kʼutbʼal jas kqabʼan che kitoʼik ri achijabʼ riʼ che uyaʼom kan ri Jesús pa ri congregación.

³ Ri Jesús xeʼuya kan ri e sipanik riʼ rech ri e qachalal pa ri congregaciones knimar ri kikojonik (Efes. 4:12). Pero oj juntir kojkunik kojtobʼanik rech kekunik kkibʼan ri chak che nim ubʼanik. Rech kqachʼobʼo, chojchoman chrij che jujun  qachalal tajin kkiwok jun Ja rech Ajawbʼal. Jujun chke are ri qas kebʼanow ri chak, pero kʼo nikʼaj chik che kkiya ri kiwa, kikʼamik bʼik jawiʼ kʼo wi ri chak y nikʼaj chi tobʼanik. Junam rukʼ ri tobʼanelabʼ, ri kʼamal taq bʼe re ri congregación y ri solinelabʼ re circuito kʼi uwach chak kkibʼano y oj juntir kojkunik kqaya ri tobʼanik chke rukʼ ri kqabʼij y ri kqabʼano. Chqilampeʼ jas utzilal kqariq rukʼ ri chak che kkibʼan ri achijabʼ riʼ y kqetaʼmaj na jas kqabʼan oj che ukʼutik che kqamaltyoxij ri chak che kkibʼano y kqamaltyoxij che ri Jesús che xeʼuya ri e sipanik riʼ chqe.

RI TOBʼANELABʼ KKIYA TOBʼANIK

4. ¿Jas jujun tobʼanik xkiya ri tobʼanelabʼ pa ri nabʼe siglo?

⁴ Pa ri nabʼe siglo, jujun chke ri qachalal achijabʼ xyaʼ ri eqeleʼn chke rech keʼok che tobʼanelabʼ (1 Tim. 3:8). Rukʼ wariʼ kqilo che ri achijabʼ riʼ are ri xkiya tobʼanik che xubʼij ri Pablo pa 1 Corintios 12:28. Xkibʼan jujun taq chak rech ri kʼamal taq bʼe kekunik kekitijoj y kekitoʼ ri cristianos. Weneʼ are ri tobʼanelabʼ ri xebʼanow ri copias rech ri Utzij ri Dios o weneʼ areʼ ri keloqʼow ri kajwataj che ubʼanik.

5. ¿Jas jujun taq chak kkibʼan ri tobʼanelabʼ kamik pa taq ri congregaciones?

⁵ ¿Jas jujun taq chak kkibʼan ri tobʼanelabʼ kamik? (1 Ped. 4:10). Weneʼ e areʼ keʼilow ri kuchuj che kyaʼ pa ri congregación o kkil ri territorios ri ktzijox wi ri utzij ri Dios, kkitaʼ apan ri e wuj che kajwataj chke ri publicadores, kkikoj ri e bʼixonem y ri videos, e acomodadores o ketobʼan che uchajixik ri Ja rech Ajawbʼal. Juntir ri chak riʼ kajwatajik rech ri congregación utz kelik (1 Cor. 14:40). Y jujun chke ri tobʼanelabʼ kkiya jujun chʼabʼal pa ri riqbʼal ibʼ re entre semana y re ri fin de semana. Y weneʼ kbʼix chke kkiya tobʼanik che jun superintendente re grupo. Y weneʼ jujun mul jun kʼamal bʼe kubʼij che jun tobʼanel che kbʼe rukʼ che usolixik jun qachalal.

6. ¿Jasche nim kqil wi ri kichak ri tobʼanelabʼ?

⁶ ¿Jasche nim kqil wi ri kichak ri tobʼanelabʼ? Chqilampeʼ ri kibʼim jujun qachalal. Jun qachalal ixoq che kel pa Bolivia ubʼiʼ Beberly b kubʼij: «Rukʼ ri kitobʼanik ri tobʼanelabʼ, kinkunik kinta ronojel ri riqbʼal ibʼ. Rukʼ ri kitobʼanik kinkunik kinbʼixonik, kinya comentarios, kenta ri e chʼabʼal y kʼo kwetaʼmaj chrij ri videos y ri e wachbʼal che kekikoj pa ri e riqbʼal ibʼ. Xuqujeʼ ketobʼan che qachajixik y areʼ keʼilowik are chiʼ ri e qachalal kkibʼan conectar kibʼ pa zoom. Are chiʼ kkʼis ri riqbʼal ibʼ, ketobʼan che umesik ri Ja rech Ajawbʼal, kkil ri kuchuj y kkilo che amaqʼel e kʼo ri wuj che kajwataj chqe. ¡Sibʼalaj kinmaltyoxij ri kichak!». Leslie kel pa Colombia y ri rachajil are kʼamal bʼe. Ri areʼ kubʼij: «Ri tobʼanelabʼ nim tobʼanik kkiya che ri wachajil. We mat ketobʼanik, ri wachajil más kʼi chak riʼ kubʼano. Rumal laʼ sibʼalaj kinmaltyoxij che rukʼ kikotemal kkiya ri kitobʼanik». Qastzij riʼ oj juntir kqamaltyoxij ri chak che kkibʼan ri tobʼanelabʼ (1 Tim. 3:13).

7. ¿Jas kqabʼan che ukʼutik che kqamaltyoxij ri kichak ri tobʼanelabʼ? (Xuqujeʼ chawilaʼ ri wachbʼal).

⁷ Weneʼ kqamaltyoxij pa qanimaʼ ri chak che kkibʼan ri tobʼanelabʼ, pero ri Biblia kubʼij chqe che kqakʼut ri qamaltyoxinik (Col. 3:15). Chqilampeʼ ri xubʼij jun kʼamal bʼe che kel pa Finlandia ubʼiʼ Daavid: «Kintaq bʼi jun tarjeta o jun mensaje y kintzʼibʼaj jun texto re ri Biblia chupam rech kinbʼij che ri tobʼanel che nim inutoʼm wi  y kinmaltyoxij ri chak che ubʼanom». Y ri qachalal Pascal y Jael, che keʼel pa Nueva Caledonia, kkibʼan orar pa kiwiʼ ri tobʼanelabʼ: «Amaqʼel kqamaltyoxij che ri Jehová rumal che e kʼo tobʼanelabʼ pa ri qa congregación y kqataʼ che keʼutewchiʼj y kuya ri tobʼanik che kajwataj chke». Ri Jehová kuta ri oración che kbʼan che y juntir ri qachalal kkiriq utzilal (2 Cor. 1:11).

RI KʼAMAL TAQ BʼE RE RI CONGREGACIÓN KʼI CHAK KKIBʼANO

8. ¿Jasche ri Pablo xubʼij che ri kʼamal taq bʼe re ri nabʼe siglo kʼi chak xkibʼano? (1 Tesalonicenses 5:12, 13).

⁸ Pa ri nabʼe siglo, ri kʼamal taq bʼe kʼi chak xkibʼano (chasikʼij 1 Tesalonicenses 5:12, 13; 1 Tim. 5:17). E areʼ kekʼamow kibʼe ri e riqbʼal ibʼ pa ri congregaciones y e areʼ kechomanik jas kbʼanik. Jujun taq mul weneʼ kkiya pixabʼ chke ri qachalal pero rukʼ loqʼoqʼebʼal kkibʼano y je wariʼ kekichajij ri congregaciones (1 Tes. 2:11, 12; 2 Tim. 4:2). Y kkikoj kichuqʼabʼ rech kqaj ta uchuqʼabʼ ri kikojonik y ri ke ri ki familias (1 Tim. 3:2, 4; Tito 1:6-9).

9. ¿Jas taq chak kkibʼan ri kʼamal taq bʼe kamik?

⁹ Kamik, ri kʼamal taq bʼe kʼi chak kkibʼano. Kkitzijoj ri utzij ri Dios (2 Tim. 4:5). Kkiya jun utz kʼutbʼal are chiʼ kkitzijoj ri utzij ri Dios, kkikʼam ubʼe utzijoxik ri utzij ri Dios pa ri territorio y kojkitijoj rech utz kqabʼan che ukʼutik chkiwach ri winaq. Jujun taq mul, keʼux jueces are chiʼ jun qachalal kubʼan jun mak y rukʼ loqʼoqʼebʼal kkibʼano rech ri qachalal kutzir ri rachilanik rukʼ ri Jehová. Y kkilo che chʼajchʼoj ri congregación (1 Cor. 5:12, 13; Gál. 6:1). Ri kʼamal taq bʼe qas utz ukʼamik qabʼe kkibʼano (1 Ped. 5:1-3). Utz kkibʼan che uyaʼik ri e chʼabʼal, kkikoj kichuqʼabʼ rech kkichʼobʼ kiwach ri qachalal re ri congregación y amaqʼel kkibʼan visitas de pastoreo. Y jujun chke ri kʼamal taq bʼe riʼ ketobʼan che uyakik y uchajixik Ja rech Ajawbʼal, kkil ri kbʼan pa ri e nim riqbʼal ibʼ re oxibʼ qʼij, ketobʼan kukʼ ri Comités de Enlace kukʼ ri Hospitales y e kʼo pa ri Grupos de Visita a Pacientes y nikʼaj chi eqeleʼn. ¡Sibʼalaj kʼi chak kkibʼano!

10. ¿Jas kbʼanowik che keqaloqʼoqʼej ri kʼamal taq bʼe?

¹⁰ Ri Jehová xuya ubʼixik che ri kʼamal taq bʼe utz kkibʼan na che uchajixik ri utinamit, junam rukʼ jun ajyuqʼ che keʼuchajij ri uchij rech kkixiʼj ta kibʼ (Jer. 23:4). Are waʼ ri xunaʼ ri qachalal Johanna che kel pa Finlandia are chiʼ xyawaj ri unan. Ri areʼ kubʼij: «Sibʼalaj kʼax kinbʼano rech kintzijon rukʼ jun chik. Pero jun kʼamal bʼe che qas ta kinchʼobʼ uwach rukʼ paciencia xinutatabʼej, xubʼan orar wukʼ y xubʼij chwe che sibʼalaj nim kinril wi ri Jehová. Knaʼtaj ta chi chwe ri xubʼij pero ri ksach ta pa nujolom are ri xubʼan che ukubʼsaxik nukʼuʼx. Qastzij che are ri Jehová xtaqow loq rech xuya ri tobʼanik che xajwataj chwe». ¿Y ri at? ¿Jas tobʼanik kiyaʼom ri kʼamal taq bʼe chawe pa ri congregación?

11. ¿Jas kqabʼan che ukʼutik che kqamaltyoxij ri kichak ri kʼamal taq bʼe? (Xuqujeʼ chawilaʼ ri wachbʼal).

¹¹ Ri Jehová kraj che kqakʼut ri qaloqʼoqʼebʼal chke ri kʼamal taq bʼe «rumal rech ri kichak» (1 Tes. 5:12, 13). Ri qachalal Henrietta, che kel pa Finlandia, kubʼij: «Ri kʼamal taq bʼe rukʼ ronojel kanimaʼ kkiya ri kitobʼanik, pero wariʼ kraj ta kubʼij che ronojel taq qʼij kʼo ki tiempo y che kkʼis ta ri kichuqʼabʼ o che kʼo ta kʼax kkiriqo. Rumal laʼ jujun taq mul kinbʼij wariʼ che jun chke: ‹Kwaj kinbʼij chawe che utz chak tajin kabʼano›». Jun qachalal ixoq che kel pa Turquía ubʼiʼ Sera, kubʼij: «Ri kʼamal  taq bʼe xuqujeʼ kajwataj chke che ‹kkubʼsax kikʼuʼx› rech kkiya ta kan ubʼanik ri kichak. Rumal laʼ kintaq jujun tarjetas chke, kensikʼij rech kekitijaʼ jun kiwa wukʼ y kintzijoj ri utzij ri Dios kukʼ». ¿La kpe pa ajolom ri tobʼanik che uyaʼom jun kʼamal bʼe chawe? Katkunik kamaltyoxij ri tobʼanik che uyaʼom chawe (1 Cor. 16:18).

RI SOLINELABʼ RE CIRCUITO KEKITOʼ RI QACHALAL PA RI KIKOJONIK

12. ¿Jas jun chi sipanik xuya ri Jesús chke ri congregaciones? (1 Tesalonicenses 2:7, 8).

¹² Kʼo jun chi sipanik xuya ri Jesús chke ri congregaciones. Xeʼukoj ri kʼamal taq bʼe che e kʼo pa Jerusalén rech xkitaq bʼi ri Pablo, Bernabé y nikʼaj chi cristianos che xeʼux solinelabʼ pa taq riʼ ri qʼij (Hech. 11:22). ¿Jasche xetaq bʼik? Rech kekitoʼ ri qachalal pa ri kikojonik junam rukʼ ri kkibʼan ri tobʼanelabʼ y ri kʼamal taq bʼe (Hech. 15:40, 41). Ri achijabʼ riʼ rukʼ ronojel kanimaʼ xkibʼan ri kichak paneʼ jujun taq mul xkiriq kʼax, pero xkibʼano rumal che xkaj xekitijoj y xkikubʼsaj kikʼuʼx ri nikʼaj chik (chasikʼij 1 Tesalonicenses 2:7, 8).

13. ¿Jas jujun taq chak kkibʼan ri solinelabʼ re circuito?

¹³ Ri solinelabʼ re circuito amaqʼel kekisolij ri congregaciones. Jujun naj kebʼinik rech keʼopan pa jun chi congregación. Ronojel taq semanas kʼi uwach chʼabʼal kkiyaʼo, kkibʼan visitas de pastoreo y e areʼ keʼilow ri riqbʼal ibʼ chke ri precursores, chke ri kʼamal taq bʼe y ri riqbʼal ibʼ re utzijoxik ri utzij ri Dios. Kkitijoj kibʼ che ri chʼabʼal che kkiya pa ri e nim riqbʼal ibʼ re circuito y re oxibʼ qʼij. Kkil ri Tijobʼal re ri Chak re Precursor, ri riqbʼal ibʼ kukʼ ri precursores ri kbʼan nabʼe chuwach ri nim  riqbʼal ibʼ re circuito y kkil jujun chi chak che kyaʼ chke —y jujun taq mul aninaq kbʼanik— rumal ri sucursal.

14. ¿Jasche kqamaltyoxij ri kichak ri solinelabʼ re circuito?

¹⁴ ¿Jas tewchibʼal kkiriq ri congregaciones rumal ri utzalaj chak che kkibʼan ri solinelabʼ? Jun qachalal achi che kel pa Turquía kubʼij: «Rumal ri solinik che kubʼan ri solinel kubʼano che más kwaj kinkʼojiʼ kukʼ ri qachalal y che kinya ri tobʼanik che kajwataj chke. Kʼi solinelabʼ re circuito wetaʼm kiwach, pero nijun chke xubʼij che kʼo ta u tiempo o che kkun taj ktzijon wukʼ rumal ri chak che kubʼano». Ri qachalal Johanna, che xojchʼaw kan chrij pa ri párrafo 10, xutzijoj ri utzij ri Dios rukʼ ri solinel re circuito, pero kʼo ta jun winaq xkiriqo. Ri areʼ kubʼij: «Paneʼ kʼo ta jun winaq xqariqo, pero ksach ta wajun qʼij riʼ pa nujolom. Rumal che ri kebʼ wachalal kʼateʼ xebʼe pa jun chi tinamit, rumal laʼ sibʼalaj kenbʼisoj. Ri solinel rukʼ ronojel ranimaʼ xubʼij chwe che paneʼ naj e kʼo wi, pero pa ri kʼakʼ uwach Ulew kqajach ta chi qibʼ». Qastzij wi, ri solinelabʼ re circuito sibʼalaj keloqʼoqʼex kumal ri qachalal rumal che rukʼ ronojel kanimaʼ kekisolij (Hech. 20:37-21:1).

15. a) ¿Jas kqabʼan che ubʼanik ri kubʼij 3 Juan 5-8 rech kqakʼutu che nim keqil wi ri solinelabʼ re circuito? (Xuqujeʼ chawilaʼ ri wachbʼal). b) ¿Jas kqabʼano rech kqakʼutu che nim keqil wi ri kixoqil ri qachalal che yaʼom jun eqeleʼn chke pa ri congregación? (Chawilaʼ ri recuadro « Chenaʼtaj ri kixoqil chqe»).

¹⁵ Ri apóstol Juan xubʼij, che ri Gayo rajawaxik kukʼutu che nim keril ri qachalal che tajin kekisolij ri congregaciones y xubʼij wariʼ che: «We kʼu keʼatoʼ che ri kibʼe jas ri kqaj chuwach ri Dios, utz kabʼano» (chasikʼij 3 Juan 5-8). ¿Jas kqabʼan che resaxik uwach? Kqabʼano are chiʼ kqabʼij  che ri solinel che kutija uwa qukʼ cho qachoch y kqakoj qachuqʼabʼ rech kqatzijoj ri utzij ri Dios are chiʼ kopan pa ri qa congregación. Chqilampeʼ ri kubʼan ri qachalal Leslie, che xojchʼaw kan chrij pa ri párrafo 6, rech kukʼutu che kumaltyoxij che kopan ri solinel. Ri areʼ kubʼij: «Kintaʼ che ri Jehová che kuya ri kajwataj chke. Kqataq bʼi cartas chke rukʼ ri wachajil jawiʼ kqabʼij wi chke che nim kqil wi che xojkisolij». Masach chqe che ri solinelabʼ re circuito xuqujeʼ kkikʼulmaj jujun kʼax. Jujun taq mul weneʼ keyawajik, kebʼisonik y weneʼ kubʼan kebʼ kikʼuʼx. Katkunik keʼatoʼo we kabʼij utz taq tzij chke o kaya jun sipanik chke (Prov. 12:25).

KEʼAJWATAJ MÁS QACHALAL ACHIJABʼ CHE KEʼUX JUN «SIPANIK»

16. ¿Jas chrij utz kechoman wi ri qachalal? (Proverbios 3:27).

¹⁶ Pa ronojel ri uwach Ulew, pa ri congregaciones kajwataj más qachalal achijabʼ rech keʼux jetaneʼ sipanik. We abʼanom chi ri a bautismo, ¿la kawaj kariq jun eqeleʼn? (chasikʼij Proverbios 3:27). ¿La kawaj katux tobʼanel pa ri congregación? We at tobʼanel chik, ¿la tajin kakoj achuqʼabʼ rech katux kʼamal bʼe? c Weneʼ katkunik kakʼex jujun jastaq pa ri akʼaslemal rech katbʼe pa ri Tijobʼal chke ri kkiya ubʼixik ri Ajawbʼal. We katbʼe pa wajun Tijobʼal riʼ, ri Jesús qas katukoj riʼ jawiʼ kajwataj wi. We kachomaj che katkun taj kabʼan wariʼ, chabʼij che ri Jehová. Chataʼ ri espíritu santo che rech katkunik kabʼan ronojel ri chak che kyaʼ chawe (Luc. 11:13; Hech. 20:28).

17. ¿Jas kukʼut ri kichak ri achijabʼ che uyaʼom kan ri Jesús pa ri congregación?

¹⁷ Ri nimalaj chak che tajin kkibʼan ri achijabʼ che uyaʼom kan ri Jesús kukʼutu che tajin kojuchajij pa taq ri qʼij riʼ (Mat. 28:20). Sibʼalaj kojkikotik rumal che wajun Qʼatal tzij riʼ kojuloqʼoqʼej y nim kojril wi, ksipanik, kuya ri kajwataj chqe y keʼuya qachalal chqe rech kojkitoʼo. ¿La mat qastzij che kqamaltyoxij ri sipanik riʼ? Qas chqakʼutuʼ che kojmaltyoxinik. Y chqamaltyoxij che ri Jehová, rumal che areʼ ri kyaʼow «ronojel utzalaj sipanik, ronojel tzʼaqatalaj sipanik» (Sant. 1:17).