Xinkʼiy pa jun barrio re ri tinamit Los Ángeles (California, Estados Unidos), kchʼobʼotaj uwach rumal che chilaʼ kʼo kʼi drogas y e kʼo pandillas. In ri ukabʼ chke seis alkʼwalaxelabʼ.

Ri nunan kojukʼam bʼi pa ri iglesia evangélica are chiʼ kʼa oj nitzʼaq na. Are chiʼ in ala chik, xinbʼan ta pa ri nukʼaslemal ri xbʼix pa ri iglesia. Pa taq domingos kinbʼixon pa ri iglesia, are kʼu pa taq ri nikʼaj chi qʼij kinbʼe che ubʼanik kʼi taq jastaq, junam rukʼ utijik drogas y kinmakun kukʼ ixoqibʼ.

Sibʼalaj in kʼan, aninaq kpe woyowal. Apastaneʼ ri kinriqo kinkoj che nuchʼayabʼal ri kwaj are che kinchʼakanik. Ri kwetaʼmaj pa ri iglesia kʼo ta ktobʼan wi chwe. Amaqʼel kinbʼij: «Are ri Ajawaxel ri ktojow ukʼaxel y ri in tajin kinbʼan ri kubʼij». Are chiʼ kʼo 18 nujunabʼ, pa taq ri junabʼ sesenta, utz xinwil ri kkibʼan ri jupuq político Panteras Negras, are kkikoj kichuqʼabʼ che utoʼik uwiʼ ri derechos civiles. Xinnim wibʼ kukʼ jun jupuq estudiantes che xuqujeʼ kkitoʼ uwiʼ wariʼ. Kʼi mul xojbʼe pa taq protestas, y rumal wariʼ kʼo ta clases pa escuela.

Are kʼu wariʼ xtobʼan ta chwe. Rumal ri nukʼanal xinmaj ubʼanik kʼax. Jun kʼutbʼal, kojbʼe kukʼ ri wachiʼl che rilik películas chilaʼ keqilaʼ wi ri kʼax che kbʼan chke ri esclavos africanos pa Estados Unidos. Wariʼ sibʼalaj xuya oyowal chqe, rumal laʼ xqamaj ubʼanik kʼax chke ri alabʼom alitomabʼ che e kʼo chilaʼ pa ri cine che saq kitzʼumal tekʼuriʼ xojbʼe chi pa taq ri barrios ri keriqitaj wi más junam kukʼ ri areʼ rech kqabʼan kʼax chke.

Pa ri tiempo riʼ oj kebʼ rukʼ ri wachalal kchʼobʼotaj qawach, rumal che kqabʼan chʼoj kukʼ ri qʼatal taq tzij. Jun chke ri nuchaqʼ kʼo pa jun pandilla, y ri in amaqʼel kinbʼe kukʼ. Kinkun taj kinkʼex ri nukʼaslemal.

Ri unan utat jun wachiʼl e testigos rech Jehová y xinkisikʼij pa taq ri riqbʼal ibʼ. Ri nabʼe mul che xinbʼek xinwilo che ri winaq jalan kibʼanik. Konojel kʼo kiBiblia. ¡Y ri alaj taq akʼalabʼ kkiya chi chʼabʼal! Sibʼalaj xinmayo che ri ubʼiʼ ri Dios are Jehová, y che amaqʼel kkikojo (Salmo 83:18). Paneʼ e kʼo winaq che jalajoj kitinamit, are kʼu sibʼalaj kkiloqʼoqʼej kibʼ.

Nabʼe kwaj taj kya tijonik chwe chrij ri Biblia, are kʼu utz kwilo kinbʼe pa ri e riqbʼal ibʼ. Jun mul chiʼ in kʼo pa jun riqbʼal ibʼ, jujun chke ri wachiʼl xebʼe pa jun concierto y xkikamisaj jun ala rumal che xkelaqʼaj ri uchaqueta de cuero. Xkibʼan nimal rukʼ ri xkibʼano. Xuqujeʼ pa ri juicio xkikʼutu che nim kkil ri xkibʼano. Konojel xetzʼapix pa cárcel. ¡Sibʼalaj kinkikotik rumal che in kʼo ta kukʼ are chiʼ xkikamisaj ri ala! Rumal laʼ xinchomaj ukʼexik ri nukʼaslemal y xinmaj retaʼmaxik chrij ri Biblia.

Rumal che jalan kenwil ri nikʼaj chik, sibʼalaj xinmay ri kkibʼan ri testigos rech Jehová. Jun kʼutbʼal, are chiʼ jun testigo rech Jehová che saq utzʼumal xbʼe pa viaje, xeʼuya kan ri alaj taq ralkʼwal che jun chi familia che qʼeq kitzʼumal. Xuqujeʼ jun familia che saq kitzʼumal xkikʼulaj pa ri kachoch jun ala che qʼeq utzʼumal. Wariʼ xukʼut chnuwach che ri testigos rech Jehová qas kkibʼan ri xubʼij ri Jesucristo pa Juan 13:35: «Rumal kʼu waʼ konojel kketaʼmaj na chi ix nutijoxelabʼ, we kiloqʼoqʼelaʼ iwibʼ». Qas wetaʼm che xenriq ri qastzij cristianos.

Rukʼ ri xwetaʼmaj pa ri Biblia, xinwilo che rajawaxik kinkʼex ri nukʼaslemal. Xaq xiw ta xinkʼutu che in utz winaq xaneʼ xinkoj nuchuqʼabʼ che ubʼanik ri utzilal rukʼ ronojel wanimaʼ (Romanos 12:⁠2). Nojimal chi nojimal xinkunik xinkʼex ri nukʼaslemal y pa enero re ri junabʼ 1974, xinbʼan nuqasanjaʼ y xinux testigo rech Jehová.

Xuqujeʼ are chiʼ nubʼanom chi nuqasanjaʼ, xinkoj na nuchuqʼabʼ rech kinya kan ri nabʼe nubʼantajik. Jun kʼutbʼal, jun qʼij are chi’ tajin kqasolij jun familia y tajin kqatzijoj ri Utzij ri Dios chke, xinwilo are chiʼ jun elaqʼom xukʼam b’i ri nuradio che k’o pa ri nucarro. Aninaq xinwoqotaj are chiʼ xa jubʼiqʼ chik kraj che kinkun che uchapik, xukʼaq kan ri radio. Are chiʼ xinbʼij chke ri qachalal ri xinbʼano, jun chke che k’o nim ukojonik xubʼij: «¿Jas ta xabʼan riʼ che we ta xatkun che uchapik?». Rukʼ wajun pregunta xinwilo che majaʼ kinkunik kinkʼex ri nukʼaslemal.

Pa octubre 1974, xinmajij utzijoxik más ri utzij ri Dios. Cien horas xinbʼan che utzijoxik ri utzij ri Dios pa jun ik’. Tekʼuriʼ xinsikʼix pa ri central kech ri testigos rech Jehová pa Brooklyn (Nueva York). Pa ri junabʼ 1978 xintzalij chi pa los Ángeles rech kinchajij ri nunan che yawabʼ. Qʼaxinaq chi kebʼ junabʼ xinkʼuliʼ rukʼ Aarhonda. Ri are’ sibʼalaj xinutoʼ che uchajixik ri nunan k’a chi xkamik. Tekʼuriʼ xojsikʼix pa ri Escuela Bíblica de Galaad de la Watchtower. Are chiʼ xkʼis wajun curso riʼ, xojtaq b’i Panamá, chilaʼ oj k’o wi na chanim.

Are chiʼ xinbʼan nuqasanjaʼ, k’o jujun taq mul che kʼax nubʼanom che ujekʼik wibʼ rumal che sibʼalaj inkʼan. Rech kinmaj ta chʼoj ri kinbʼano are che kinbʼek. Ri wixoqil y ri nikʼaj chi winaq kibʼim chwe che utz ri tajin kinbʼano, xuqujeʼ ri in kinmay ri tajin kinkun che ubʼanik. Xaq ta nutukel xinkunik xinkʼex ri nukʼaslemal. Qas wetaʼm che are ri Biblia ri k’o nim uchuqʼabʼ kkunik kukʼex ri kikʼaslemal ri winaq (Hebreos 4:12).

Ri Biblia inutoʼom rech kinnaʼo che kʼo chi upatan ri nukʼaslemal xuqujeʼ inutoʼm rech kinux jun utz winaq. Kinbʼan ta chi chʼoj rukʼ nijun xuqujeʼ kinchʼayan ta chik, xaneʼ keʼintoʼo y kintzijoj ri utzij ri Dios chke. Xuqujeʼ xinya etaʼmanik re ri Biblia che jun winaq che nabʼe kanoq are nukʼulel. Are chiʼ xubʼan ri uqasanjaʼ, junam xojkʼojiʼ pa jun ja y qayaʼom ta kan ri qachilanik. Kimik e qatoʼom más che ochenta winaq rech keʼux testigos rech Jehová.

Sibʼalaj kinmaltyoxij che ri Jehová rumal che inutoʼom che uriqik kikotemal pa ri nukʼaslemal, in kʼo chi chkixoʼl ri qastzij cristianos.