Bibliachöqa juk kutillam parlan tatuäjipaq, Levïticu 19:28 textuchömi nin: “Ama qarëkikunachö ima dibüjutapis dibujatsiyankitsu”. Israelïtakunapa amänunkunachö täkoq nunakunaqa qarankunachömi dibujatsikuyaq diosninkunapa jutinkunata o señalninkunata. Tsëmi pëkunanö mana kayänanta munar Diosqa israelïtakunata mandarqan tatuäjita mana rurakuyänampaq (Deuteronomiu 14:2). Kanan tiempu cristiänukunaqa tsë Ley ninqannö manana kawarpis, cuentachömi katsiyan tsë asuntupaq Diosnintsik imata pensanqanta.

Cristiänukunaqa, ¿tatuäjita rurakuyanmantsuraq?

 Tsë asuntuchö imata decidinapaq kaqta Bibliapita yachakurishun.

•   1 Timoteu 2:9 textuchömi kënö nin: “Warmikunapis shumaq vistikuyätsun, y wakinkunata respetar y alli juiciuwan altsapäkuyätsun”. Tsënö ninqantaqa ollqu kaqkunapis cäsukuyänanmi. Cristiänukunaqa manam kikinkunallaman pensarnin munayanqanta rurakuyanmantsu. Manam jukkuna rikapänanrëkurllaqa imatapis rurayanmantsu, ni manam rurayanqanwan jukkunata mana alli sientikatsiyanmantsu.

•   Wakinkunaqa munëninkunata rurakoq kayanqanta rikätsikuyta munar y pï kayanqanta rikätsikuyta munarmi qarankunachö tatuäjita ruratsikuyan. Peru cristiänukunaqa Bibliachö kënö ninqantam cuentachö katsiyänan: “Qamkunata[m] rogayaq, kawëkaq, limpiu y Diosta kushitseq qarëtanö cuerpuykikunata entregayänëkipaq. Tsënömi llapan pensënikikunawan Teyta Diosta sirwiyanki” (Romänus 12:1). “Llapan pensënikikunawan” nirqa rikätsikun imatapis shumaq pensëkur ruranapaq y imarëkur imatapis ruranqantsikta cuentachö katsinapaqmi. Wakinqa capaz möda kanqanrëkurlla o ima grüpupitapis kayanqanta rikätsikuyta munarlla tatuäjita rurakuyanman. Tsëqa kënö nirmi pensayänan: “¿Imataraq ruräman tsë möda pasariptin, o rurakunqä tatuäji manana gustamaptin?”. Tsënö yarpachakunqantsikmi yanapamäshun alli kaqta decidinapaq (Proverbius 4:7).

•   “Imatapis alli pensëkur ruranqanqa allim yarqunqa, peru manaraq alli pensar imatapis lluta ruraqkunaqa waktsam tikrayanqa” (Proverbius 21:5). Wakinkunaqa rasllam o sasllam imatapis rikëkur munariyan, tsënöpam tatuäjitapis rurakuriyan, peru tiempu pasariptinqa trabäjunkunachö mana chaskiyaptin o mana alli rikäyaptinmi llakikuyan y arrepentikuyan tatuäjita ruratsikuyanqampita. Jinamampis, tsë tatuäjita borrapuyänampaqqa alläpa chanintam mañayan, y alläpa nanëtam sientiyan. Tsëmi wakinqa tatuäjita ruratsikuyanqampita alläpa arrepentikuyan y imëkanöpapis borratsita munayan. Tsënöpam tatuäjita borrar trabajaqkuna mëtsëchö mirëkushqa.