“Noqaqa mas jatunyarmi ollqu mayï jövinkunawan këta munarqä, y tsë munëta dejanäqa manam fäciltsu. Tsë munënï juk tiempullapa kanampaq kaqtam pensarqä, peru kananyaqmi tsëkunaman mana pensanäpaq kallpachakuykä” (David, 23 watayoq).

 Davidqa Diostam sirwin y mandakunqankunatam cäsukuyta munan. ¿Pë pasëkanqankunapa pasëkaqkunaqa Dios mandakunqankunata cumplita puëdiyanmantsuraq? ¿Ima nintan Diosnintsik ollqupura o warmipura kakuyta munëpaq?

•  ¿Ima nintan Bibliachö?

•  ¿Tsënö nirqa...?

•  Peru ¿pï karpis...?

 Ollqupura o warmipura kakuyanqantaqa, nunakuna alli o mana alli kanqantaqa pensayan imanö tiempuchö kawayanqampita y markankunachö imanö costumbrinkuna kanqampitam. Peru Diosta sirweqkunaqa manam nunakuna tsënö pensayanqampitatsu pëkunanölla pensayä. Manam Efesius 4:14 ninqannöpis, ‘laqcheqsaq yaku wakman këman jitanqan y vientu wakman këman apanqan barcunö’ këta munayätsu. Ollqupura o warmipura kakuyanqan y wakin mana alli rurëkunapis, mana alli kanqantaqa niyä Bibliachö mana alli kanqanta niptinmi.

 Ollqupura o warmipura kakuy mana alli kanqantaqa, Bibliachöqa clärum willakun. Rikärishun.

•  “Ama warmiwannöqa ollqu mayikiwan oqllanakunkitsu. Tsëqa melanëpaqmi” (Levïticu 18:22).

•  “Shonqunkuna munanqannö imëka melanëpaqkunata rurar[mi] [...]. Warmikunaqa ollqullawan oqllanakuyänan këkaptin, mana rurana kaqta rurar warmipura oqllanakuyarqan. Tsëmi Teyta Diosqa oqllanakuyta ërayëpa munayänanta dejarqan” (Romänus 1:24, 26).

•  “Ama engañayäshunëkita dejayëtsu. Oqllanakur melanëpaqkunata ruraqkuna, santukunata adoraqkuna, mana majanwan oqllanakoqkuna, ollqu mayinkuna oqllayänanta permiteqkuna, ollqu mayinkunata oqllaqkuna, suwakoqkuna, imatapis ërayëpa munaqkuna, machakoqkuna, insultakoqkuna y pitapis engañar suwapaqkunaqa manam Diospa Gobiernunta chaskiyanqatsu” (1 Corintius 6:9, 10).

 Dios mandakunqankunaqa llapantsikpaqmi. Tsëmi ollqupis, warmipis wiyakunantsik y Dios melananqankunata mana ruranapaqmi controlakuyta yachanantsik (Colosensis 3:5).

 ¿Tsënö nirqa ollqupura o warmipura kakoqkunata chikinantsikpaqku Biblia mandakuykan?

 Manam. Bibliaqa yachatsimantsik pï nunatapis mana chikinapaqmi. Imanö kawakuyaptimpis llapan nunakunawan yamë kawakunapaqmi mandamantsik (Hebrëus 12:14). Tsëmi, ollqupura o warmipura kakoqkunapita burlakushwantsu, chikipashwantsu ni mana alli tratashwantsu.

 ¿Tsënö nirqa ollqupura o warmipura casakuyänanta permiteq leypa contran kanantsikpaqku Biblia nikämantsik?

 Bibliachöqa clärum nin, ollquwan warmilla casakuyänanta Dios permitinqanta (Mateu 19:4-6). Y cristiänukunaqa manam ollqupura o warmipura casakuyänanta permiteq leypa contrantsu ni favornintsu këkäyä. Tsë leytaqa polïticukunam patsätsiyan, y Bibliachöqa nin polïtica asuntuman cristiänukuna mana mëtikuyänäpaqmi (Juan 18:36).

 Peru ¿pï karpis ollqu mayinwan o warmi mayinwan këkarnaqa cambiëta puëdinmantsuraq?

 Awmi, cambiëta puëdinmi. Bibliaqa willakun apostolkuna kawayanqan witsanchö wakin nunakuna ollqu mayinkunawan o warmi mayinkunawan kakuyanqantam. Y Corintu cristiänukunaman cartakurninmi apostol Pablu cläru nirqan, ollqu mayinkunawan o warmi mayinkunawan kakoqkunaqa Diospa Gobiernunman mana yëkuyänampaq kaqta. Y tsëpitanam kënö nirqan: “Wakinnikikunaqa tsënömi kayarqëki” (1 Corintius 6:11).

 ¿Tsënö nirqa unë rurayanqankunata manana yarparäyanqantaku nikan? Manam, tsë rurëkunamanqa yarparëkäyanllaran. Tsëmi Diospa Palabranqa kënö nin: “Jukläya nunana kayë, tsëta rurarqa rasumpa kaqpita yachakuyanqëkimannömi, imanö kayanqëkichö Teyta Dios kanqannö tikrayanki” (Colosensis 3:10). Unë rurayanqankunata dejarir Dios munanqannöna kawakuyänampaqqa cada junaqmi kallpachakuyänan.

 Peru pï karpis Dios mandakunqanta wiyakuyta munëkar ollqu mayinwan o warmi mayinwan kakuyta munëllaman yarparäkurqa, ¿imatataq ruranman?

 Wakin munëkunawan ruranqannömi, kikin nuna decidinan tsë munëllaman yarparäkuyta o tsë munë dominananta. Peru ¿imatataq ruranman tsë munënin mana vencinampaq? Bibliachömi kënö nin: “Santu espïritu pushayäshunqëkinö kawar sïguiyë, tsëqa manam jutsa ruraq cuerpuykikuna munanqanta rurayankitsu” (Gälatas 5:16).

 Rikärinqantsiknömi, kë versïculuchöqa manam nikantsu tsë munëkunata qonqëkuyänampaq kaqta. Tsëpa rantinqa, Bibliata estudiayanqan y Diosnintsikman mañakuyanqan tsë mana alli rurëkunaman mana ishkiyänampaq y mana yarparäyänampaq yanapanampaq kaqtam nikan.

 Punta kaq pärrafuchö parlanqantsik Davidqa, tsë mana alli munëninta teytankunawan parlarninmi vencirqan. Kënömi nin: “Janäpita lasaq qepita jitareqnömi sientikurqä. Puntallapitana teytäkunawan tsë asuntupaq parlashqa karqa, jövin kënïta mas kushishqachi pasaman karqan”.

 Jehovä mandakunqankunata cäsukurqa, mas kushishqam kawakushun. Llapan shonquntsikwanmi confiakunantsik tsë mandakunqankunaqa ‘llapampis allilla’ kanqanta y ‘shonquntsikta kushitsinqanta’. Tsë mandakunqankunata cäsukurqa, mëtsika bendiciontam chaskishun (Salmus 19:8, 11).