Estädus Unïdus nacionchömi Centros para el Control y la Prevención de Enfermedades neq oficïnapita niyan, 15 watapita 19 watayaq jövinkunaqa shiminkunapa ruranakuyashqa a kayanqanta. Oral Sex Is the New Goodnight Kiss neq libruta qellqaq Sharlene Azam kënö nin: “Jövinkunata shiminkunapa ruranakuyanqampaq tapuptikiqa, ‘pïmëpis tsëtaqa rurayanmi y allilla kanqantam’ niyan”. Y kënöpis ninmi: “Tsëta nirqa oqllanakuy mana kanqantam creiyan”.

•  ¿Qamqa ima ninkimanraq?

•  ¿Imamantan chätsikunman?

•  ¿Ima nintan Bibliachö?

 Awmi o manam neqta akrë.

1.   Juk jövinwan juk shipash shimipa ruranakuyaptinqa, ¿qeshyaq tikranmantsuraq?

   1.   Awmi

   2.   Manam

2.   ¿Shimipa ruranakuyanqanqa salorninkunapaq peligrösuku?

   1.   Awmi

   2.   Manam

3.   Shiminkunapa ruranakuyanqampis, ¿rasumpatsuraq alläpa jutsa?

   1.   Awmi

   2.   Manam

 Akranqëki respuestatawan igualatsi.

1.   Juk jövinwan juk shipash shimipa ruranakuyaptinqa, ¿qeshyaq tikranmantsuraq?

    Respuesta: Manam. Tsëmi jövinkunaqa pensayan shiminkunapa ruranakuyanqanqa mas alli kanqanta.

2.   ¿Shimipa ruranakuyanqanqa salorninkunapaq peligrösuku?

    Respuesta: Awmi. Shiminkunapa ruranakuyaptinqa, hepatitis A o B, verrugas genitales, gonorrëa, herpes, sïda o sïfilis neq qeshyakunawanmi sufriyanqa.

3.   Shiminkunapa ruranakuyanqampis, ¿rasumpatsuraq alläpa jutsa?

    Respuesta: Awmi. Shiminkunapa ruranakuyanqan, sikipa ruranakuyanqan y ollqupa o warmipa partinkunata yatapäyanqanqa oqllanakuykaqnöllam. Y tsëkunaqa jutsam.

 Shiminkunapa ruranakuyanqampaq Bibliachö ima ninqanta rikärishun.

 Bibliachömi kënö nin: “Teyta Diosqa këtam munan [...] oqllanakur melanëpaqkunata rurëpita cuidakuyänëkita” (1 Tesalonicensis 4:3).

 “Oqllanakur melanëpaqkunata rurayanqan” neq palabraqa rikätsikun, manaraq casakurnin piwampis oqllanakuyanqanta, shiminkunapa ruranakuyanqanta, sikipa ruranakuyanqanta y ollqupa o warmipa partinkunata yatapänakuyanqantam. Tsë melanëpaqkunata ruraqkunaqa, kikinkunam alläpa sufriyanqa y Teyta Dioswampis manam amïgu këta puëdiyanqatsu (1 Pëdru 3:12).

 Bibliachömi kënö nin: “Imëka melanëpaq rurëkunata rurar kakoqqa, kikimpa cuerpumpa contranmi jutsata rurëkan” (1 Corintius 6:18).

 Shimipa ruranakoqkunaqa alläpa llakikurmi sufriyan y Teyta Dioswampis manam amïgu këta puëdiyantsu. Cómo hablar de sexo con los adolescentes para que te escuchen neq libruchömi kënö nin: “Shimipa ruranakurirninqa, manam segürunatsu y llakishqam sientikuyan, peru oqllanakurninqa manam tsënötsu sientikuyan. Melanëpaqkunata rurarninqa alläpam llakikuyanqa y sufriyanqa”.

 Bibliachömi kënö nin: “Noqaqa Jehovä Diosnikikunam kä. Noqaqa biennikikunapaqmi imatapis qamkunata yachatsï” (Isaïas 48:17).

 ¿Diospa Palabranchö oqllanakuy asuntupaq consëjukunaqa yanapashunkitsuraq? O ¿cäsukurninqa manana kushishqa kanëkipaq kaqtaku pensanki? Këllaman pensari: cärruta manejar juk carrëterapa ëwëkankiman, peru despaciulla o ras o sas ëwanëkipaq, y mëchö päranëkipaq señalkuna kanman. Tsëqa ima ninkitan, ¿tsë señalkunaqa mana alliku o següru viajanëkipaqku yanapashunki? ¿Imaraq pasakunman tsë señalta mana cäsukuptiki y wakinkunapis mana cäsukuyaptinqa?

 Tsë cuentallam, Dios mandakunqanta mana cäsukurqa sufrinki (Gälatas 6:7). Sex Smart neq libruchömi kënö nin: “Mana alli rurëkuna mana alli kanqanta musyëkarpis y creinqëkikunata mana kaqpaq churarninqa, manam kikikitapis respetakunkitsu”. Peru Diospa Palabranta cäsukurninqa, rikätsikunki respetëpaq y alli nuna kanqëkitam. Y limpiu concienciayoqmi sientikunki (1 Pëdru 3:16).