1 Rëyes 16:1-34
16 Jehovä Diosmi Hananïpa+ tsurin Jehüta+ mandarqan Baasäta kënö willanampaq:
2 “Qamtaqa mana kaqpaq churëkäyäshuptikim, israelïtakunapa gobernaqnin kanëkipaq churarqaq.+ Peru qamqa Jeroboannöllam israelïtakunata jutsata* ruratsirqunki. Tsëmi pëkunaqa imëka mana allikunata rurar cöleratsiyämashqa.+
3 Tsëmi Nebatpa tsurin Jeroboanta+ y pëpa kastankunata ushakätsinqänölla, qamtapis* y qampa kastëkikunatapis pasëpa* ushakätsishaq.
4 Markachö wanoq o wañoq kastëkikunataqa allqukunam mikuyanqa y juk läduchö wanoq kaqkunataqa wiskurkunam mikuyanqa”.
5 Gobernanti Baasä llapan ruranqampita y puëdeq kanqampitaqa Israelchö gobernaqkunapaq willakoq librum masllata willakun.
6 Baasä wanuriptinnam, Tirzä markachö pampayarqan.+ Tsëpitanam Elä jutiyoq tsurin gobernar qallëkurqan.
7 Baasäqa, Jeroboannö y pëpa kastankunanömi Jehovä Diosta cöleratsir jutsata* rurarqan y Nadabtapis* wanutsirqan.+ Tsëmi Jehovä Diosqa Hananïpa tsurin Jehüwan* willakurqan Baasäta y pëpa kastankunata imä pasanampaq kaqta.
8 Judäpa gobernantin Asä veintiseis watapa gobernëkaptinmi, Baasäpa tsurin Eläqa Israelchö gobernar qallëkurqan. Tirzä markapitam ishkë watapa mandakurqan.
9 Peru sirweqnin Zimrïmi contran churakarqan. Zimrïqa guërrapaq carrëtakunata manejaq wakin soldädukunapa mandaqninmi karqan. Juk kutim Eläqa, palaciuta cuentanchö katseq Arzäpa wayinchö, Tirzä markachö, upyarnin machashqa këkarqan.
10 Tsënam Zimrïqa ëwëkur Eläta wanuratsir+ kikinna gobernar qallëkurqan. Tsëqa pasarqan Judächö gobernaq Asä veintisiëti watapa gobernëkaptinmi.
11 Gobernar qallëkurmi Baasäpa llapan kastankunata wanutsirqan. Y wakin kastankunata y amïgunkunatapis ollqu kaqtaqa llapantam wanutsirqan.
12 Zimrïqa, Baasäpa llapan kastankunatam ushakätsirqan, tsënömi cumplikarqan Jehovä Dios ninqanta Jehü willakunqan.+
13 Tsëqa pasakurqan mana väleq santukunata adorarnin Israelpa Diosnin+ Jehoväta Baasäwan tsurin Elä cöleratsiyanqampita y israelïtakunata imëka jutsata* ruratsiyanqampitam.
14 Gobernanti Elä llapan ruranqampitaqa Israelchö gobernaqkunapaq willakoq librum masllata willakun.
15 Gobernanti Asä veintisiëti watapa Judächö gobernëkaptinmi, Zimrïqa Israelchö gobernar qallëkurqan, y Tirzä markapitam qanchis junaqlla mandakurqan. Tsë witsanqa filisteukunapa Guibeton+ markanta atacayänampaqmi, israelïta soldädukuna campamentunkunachö këkäyarqan.
16 Tsëchö këkarmi soldädukunaqa musyariyarqan gobernanti Eläta wanuratsir Zimrï gobernanti yëkushqa kanqanta. Jinan höram llapan israelïtakunaqa, soldädukunapa mandaqnin Omrïta+ Israelchö gobernanti kanampaq churayarqan.
17 Tsënam Omrïwan israelïta soldädukunaqa Guibeton markapita ëwar Tirzä markäta atacayarqan.
18 Ataquëkäyanqanta rikëkurnam Zimrïqa palaciu törriman yëkuskir ninata prendïkurqan y tsëchömi wanurqan.+
19 Tsëqa pasakurqan Jehovä Diosta mana cäsukur imëka mana allikunata ruranqampita y Jeroboannölla mana allikunata rurarnin israelïtakunata jutsata* ruratsinqampitam.+
20 Gobernanti Zimrï llapan ruranqampita y Eläpa contran churakanqampitaqa Israelchö gobernaqkunapaq willakoq librum masllata willakun.
21 Tsënam wakin israelïtakunaqa munayarqan Guinatpa tsurin Tibnï gobernantinkuna kananta, y wakinnam Omrïta yanapayarqan.
22 Peru Omrïta yanapaqkunam, Guinatpa tsurin Tibnïta yanapaqkunapita mas puëdeq kayarqan. Y Tibnï wanuriptinmi Omrïqa gobernanti tikrarirqan.
23 Gobernanti Asä treinta y ünu watapa Judächö gobernëkaptinmi, Omrïqa Israelchö gobernar qallëkurqan y döci watapam mandakurqan. Peru Tirzä markapitaqa joqta watallam mandakurqan.
24 Omrïqa juk markata shäritsinampaqmi, Sëmer jutiyoq nunapita sesenta y öchu kïlus* pläta qellëchö Samaria jirkata rantirqan. Y Sëmer jutiyoq nunapita rantishqa karmi, shäritsinqan markataqa Samaria*+ nir jutin churarqan.
25 Omrïqa Jehovä Diosta mana cäsurmi punta gobernaqkunapitapis mas jutsata* rurarqan.+
26 Pëqa Teyta Diosta mana cäsukurmi Nebatpa tsurin Jeroboan ruranqannölla imëka jutsata* rurarqan, y mana väleq santukunata adorarmi israelïtakunata imëka jutsata ruratsirqan. Tsënö rurarmi Israelpa Diosnin+ Jehoväta alläpa cöleratsirqan.
27 Gobernanti Omrï llapan ruranqankunapita y guërrachö gananqampitaqa Israelchö gobernaqkunapaq willakoq librum masllata willakun.
28 Omrï wanuriptinnam, Samaria markaman pampayarqan. Tsëpitanam Acab jutiyoq tsurinna+ gobernar qallëkurqan.
29 Gobernanti Asä treinta y öchu watapa Judächö gobernëkaptinmi, Omrïpa tsurin Acabqa Israelchö gobernar qallëkurqan. Samaria markapitam+ veintidos watapa mandakurqan.
30 Acabqa Jehovä Diosta mana cäsukurmi, punta gobernaqkunapitapis masraq imëka jutsata* rurarqan.+
31 Y manam Nebatpa tsurin Jeroboan+ ruranqan jutsallatatsu* rurarqan, sinöqa sidoniukunapa gobernaqnin+ Etbaalpa tsurin Jezabelwan+ casakurirmi, Baal santuta+ adorar qallëkurqan.
32 Samaria markachömi Baal santupaq+ templutapis* altartapis ruratsirqan.
33 Y Aserä santupaqpis sagrädu postitam*+ ruratsirqan. Tsënömi Acabqa punta gobernaqkunapitapis masraq imëka jutsata* rurar Israelpa Diosnin Jehoväta cöleratsirqan.
34 Acab gobernanqan witsanmi Betel markachö täkoq* Hiel jutiyoq nuna Jericö markata yapë shäritsir qallëkurqan. Cimientunkunata perqar qallëkuptinmi Abiram jutiyoq mayor kaq tsurin wanukurqan, y punkunkunata churar qallëkuptinnam Segub jutiyoq menor kaq tsurin wanukurqan. Tsënömi cumplikarqan Jericö markapaq Nunpa+ tsurin Josuëwan Jehovä Dios musyatsikunqan.
Nötakuna
^ Kënöpis niyanmi: pecäduta.
^ O “Baasätapis”.
^ Kënöpis niyanmi: jankat.
^ Nadabqa Jeroboanpa tsurinmi karqan.
^ Jehüqa Diospa willakoqninmi karqan.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduta.
^ Tsë jutiqa, “Sëmerpa kastampa” ninanmi.
^ Hebreu idiömachöqa “2 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecädullatatsu.
^ Hebreu idiömachöqa “wayitapis” ninmi.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: pecäduta.
^ Kënöpis niyanmi: täraq; päraq.
