1 Juan 2:1-29
2 Kuyë wamralläkuna, jutsata* mana rurayänëkipaqmi qamkunaman këkunata qellqëkämü. Peru mëqantsikpis jutsata rurashqaqa, Teytapa lädunchö këkaq alli kaqta ruraq Jesucristum yanapamantsik.*+
2 Pëqa jutsata* ruranqantsikpita+ perdonashqa kanapaq Teyta Dioswan amishtatsikoq qarëmi,*+ peru manam noqantsikpa jutsantsikrëkurllatsu, sinöqa entëru patsachö nunakunapa jutsankunarëkurmi.+
3 Y këchömi pëta reqinqantsikta musyantsik: mandakunqankunata wiyakur këkanqantsikchö.
4 Pï nunapis, “noqaqa pëta reqïmi” nikar, mandakunqankunata mana cäsukurqa, ulikoqmi o llullakoqmi, y manam rasumpa kaq shonqunchötsu këkan.
5 Peru pï nunapis palabranta cäsukurqa, Teyta Diosta rasumpa kuyanqantam cläru rikätsikun.+ Tsëmi pëwan juknölla këkanqantsikta musyantsik.+
6 Pï nunapis pëwan juknölla këkanqanta neqqa, pë* kawanqannömi imëpis kawanan.*+
7 Kuyë wawqikuna y panikuna, manam manaraq reqiyanqëki mandamientutatsu qamkunaman qellqëkämü, sinöqa qallanampitana katsiyanqëki unë mandamientutam.+ Tsë unë mandamientuqa, qamkuna wiyayanqëki kaqmi.*
8 Tsënö kaptimpis, ampiqa o tsakëqa* pasëkannam y rasumpa aktsinam atsikyëkan. Tsëmi manaraq reqiyanqëki mandamientuta qamkunaman qellqëkämü, y tsëqa pëchö y qamkunachöpis clärum cumplikashqa.+
9 Pï nunapis aktsichö këkanqanta nikar, nuna mayinta* chikeqqa,+ ampillachöran o tsakëllachöran* këkan.+
10 Nuna mayinta* kuyaqqa, aktsichömi imëpis këkan,+ y manam imapis mana alliman chätsinqatsu.
11 Peru nuna mayinta* chikeqqa, ampichömi o tsakëchömi* këkan+ y purikan,+ y ampi nawinta tsaparkushqa kaptinmi mëta ëwanqantapis musyantsu.
12 Kuyë wamralläkuna, pëpa jutinrëkur jutsëkikunapita* perdonashqa kayaptikim, qamkunaman qellqamü.+
13 Teytakuna, qallanampita kawaq* kaqta reqishqa kayaptikim qamkunaman qellqamü. Jövinkuna, Diabluta* vencishqa kayaptikim qamkunaman qellqamü.+ Kuyë wamrakuna, Teytata reqishqa kayaptikim qamkunaman qellqamü.+
14 Teytakuna, qallanampita kawaq* kaqta reqishqa kayaptikim qamkunaman qellqamü. Jövinkuna, valienti* kayaptiki,+ Diospa palabran shonquykikunachö imëpis kaptin+ y Diabluta* vencishqa kayaptikim+ qamkunaman qellqamü.
15 Ama kë munduchö nunakunata ni kë munduchö kaqkunata kuyayëtsu.+ Pï nunapis kë munduchö nunakunata kuyarqa, manam Teytata kuyantsu.+
16 Kë munduchö kaqkunaqa: jutsa* ruraq cuerpuntsik munanqan,+ nawintsik rikanqanta munë+ y kapamanqantsikpita alabakuyqa,* manam Teytapitatsu shamun, sinöqa kë munduchö nunakunapitam.
17 Manam tsëllatsu, kë munduchö nunakuna y imata munayanqampis ichikllachönam ushakärinqa,+ peru Teyta Dios munanqanta ruraqqa, imëyaqpis kawëkanqam.+
18 Kuyë wamralläkuna, ushanan höranam. Qamkunaqa wiyayarqunkim anticristu shamunampaq kaqta.+ Peru kanampis atskaq anticristukunam yuriyämushqa,+ tsëmi ushanan hörana kanqanta musyantsik.
19 Pëkunaqa noqantsikpitam yarquyashqa, peru manam noqantsikpa grüpuntsikpitatsu kayarqan.*+ Noqantsikpa grüpuntsikpita karqa, noqantsikwanmi quedakuyanman karqan. Peru llapankuna noqantsikpa grüpuntsikpita mana kayanqan cläru rikakunampaqmi, pëkunaqa yarquyashqa.+
20 Qamkunataqa limpiu Diosmi akrayäshurqunki,+ y llapëkim rasumpa kaqta musyayanki.
21 Rasumpa kaqta mana musyayaptikitsu manam qamkunamanqa qellqamü,+ sinöqa tsëta musyayaptiki y rasumpa kaqpitaqa ima ulikuypis o llullakuypis mana yarquptinmi.+
22 ¿Pitan ulikoqqa o llullakoqqa? ¿Manaku Jesus Cristu kanqanta negaq?+ Awmi, Teytata y Tsurita negaqmi anticristuqa.+
23 Tsurita negaqkunaqa, manam Teytawan juknöllatsu këkäyan.+ Peru Tsurita chaskeqqa,+ Teytawampis juknöllam këkan.+
24 Qamkunaqa qallanampita wiyayanqëkita shonquykikunachö imëpis këkätsiyë.+ Qallanampita wiyayanqëki shonquykikunachö imëpis kaptinqa, Tsuriwan y Teytawanmi imëpis juknölla këkäyanki.
25 Tsëpitapis masqa, kikinmi imëyaqpis kawëta änimarquntsik.+
26 Wakinkuna engañayäshuynikita munayaptinmi, tsëkunapaq qamkunaman qellqëkämü.
27 Qamkunataqa, Teyta Diosmi santu espïritunwan akrayäshurqunki,+ y santu espïritu qamkunachö imëpis këkaptinmi ni pï yachëkätsiyäshunëkita wanayankitsu.* Santu espïrituwanmi Teyta Diosqa llapan imëkata yachëkätsiyäshunki, y tsëqa rasumpa kaqmi, manam ulikuytsu o llullakuytsu.+ Tsëmi santu espïritu yachatsiyäshunqëkinölla, pëwan imëpis juknölla këkäyë.+
28 Kananqa kuyë wamralläkuna, pë rikakunqan tiempu mana mantsakushpa parlanapaq*+ y pë këkämunqan tiempu penqakur mana witikurinapaq, pëwan imëpis juknölla këkäyë.
29 Pë allita ruraq kanqanta musyarqa, allita ruraqkunapis pëpita yuriyashqa kayanqantam musyayanki.+
Nötakuna
^ Kënöpis niyanmi: pecäduta.
^ O “abogäduntsik”.
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqta.
^ Tsënö nirqa, Jesuspaqmi parlëkan.
^ Griëgu idiömachöqa “pë purinqannö purirmi sïguinan” ninmi.
^ O “palabram”.
^ Kënöpis niyanmi: tutapëqa.
^ Kënöpis niyanmi: tutapëllachöran.
^ Griëgu idiömachöqa “wawqinta” ninmi.
^ Griëgu idiömachöqa “wawqinta” ninmi.
^ Griëgu idiömachöqa “wawqinta” ninmi.
^ Kënöpis niyanmi: tutapëchömi.
^ Kënöpis niyanmi: pecäduykikunapita.
^ O “kashqa”.
^ Griëgu idiömachöqa “Mana Allita Ruraqta” ninmi.
^ Griëgu idiömachöqa “Mana Allita Ruraqta” ninmi.
^ O “fuerti “.
^ O “kashqa”.
^ Kënöpis niyanmi: pecädu.
^ O “gälakuyqa”.
^ O “noqantsiknötsu kayarqan”.
^ Kënöpis niyanmi: necesitäyankitsu.
^ O “libri parlanapaq”.
