Jüdas 1:1-25
1 Jesucristupa sirweq y Santiägupa+ wawqin Jüdaspita, Teyta Dios kuyanqan y Jesucristuwan+ juntu kayänampaq cuidanqan akrashqakunapaq:+
2 Teyta Dios masraq qamkunawan llakipäkoq* y kuyakoq këkutsun, y yamë kayänëkipaq yanapëkuyäshuy.
3 Kuyë wawqikuna y panikuna, llapantsik chaskinantsik kaq salvacionpaq parlarmi qamkunaman qellqamuyta munarqä.+ Peru mas alliqa kashqa, Teyta Diosman markäkuyanqëkita o yärakuyanqëkita imëkanöpapis cuidayänëkipaq rogayarniki qellqamunqämi.+ Tsëtaqa juk kutilla imëyaqpis kanampaqmi limpiu nunakuna chaskiyarqan.
4 Këtaqa qellqamü, unëpitana Qellqarëkanqanchö willakunqannö condenashqa* kayänampaq nunakuna, mana cuentata qokuyanqëkiyaq qamkunaman yëkamushqa kayaptinmi. Pëkunaqa Teyta Diosta mana respetarmi, pë alläpa alli kanqanchö tsapäkur mana penqakur mana allikunata rurayan,*+ y japallan duëñuntsik* y Señornintsik Jesucristutam dejariyashqa.+
5 Qamkuna alli musyayaptikipis, yarpäyänëkitam munä, Teyta Jehoväqa* Egiptu nacionpita juk grüpu nunakunata salvanqanta,+ peru tsëpitaqa mana markäkoq o yärakoq kaqkunata ushakätsinqanta.+
6 Tsënöllam chaskiyanqan carguta mana väleqpaq churar, kawayanqan sitiuta dejaq angelkunatapis,+ mana imëpis ushakaq cadënakunawan cadenarkur, juiciu junaq chämunqanyaq, pasëpa* ampiman o tsakëman* churashqa.+
7 Sodöma, Gomörra y amänun markakunachö nunakunapis, oqllanakur melanëpaqkunata rurar* y jutsa* ruraq cuerpunkuna munanqanta rurarmi kakuyarqan.+ Y pëkuna mana imëpis upeq* ninawan castigashqa kayanqanqa, pëkunata pasanqampita yachakunapaqmi këkan.+
8 Tsënö këkaptimpis, tsë nunakunapis pensëninkunachö mana allikunata patsätsirmi këkäyan, tukuyläya melanëpaq rurëkunata rurarmi, kikinkunapa y wakinkunapa cuerpunta Diospa rikëninchö mana limpiuta tikratsiyan, autoridäyoq kaqkunatam despreciayan y Teyta Dios väleqpaq churanqan kaqkunapaqmi mana allita parlayan.+
9 Peru arcangel+ Miguel+ Diabluwan mana acuerdu kar Moisespa ayampaq discutirqa,+ manam mana allipa parlapartsu condenarqan,*+ sinöqa “Jehovä* juzgashuy”+ nirqanmi.
10 Tsënö kaptimpis, tsë nunakunaqa mana entiendiyanqan kaqkunapaqmi mana allita parlayan.+ Y peqanman o umanman chanqanta ruraq animalkunanö wakin wakinta entiendiyanqanqa,+ mas mana allimanmi chëkätsin.
11 ¡Allaw pëkuna! Pëkunaqa Cain ruranqantam* rurayashqa,+ pägurëkurmi Balaam ruranqannö mana allita rurëman chäyashqa,+ y Corënö+ jukpa contran mana allita parlarmi ushakäyashqa.+
12 Pëkunaqa mikuyänëkipaq juntakäyanqëkichö* qamkunawan mikupakuykarmi,+ yaku rurinchö pakarëkaq qaqanö, mana penqakushpa pachanta juntatsillaman yarparäkoq mitsikoqnö,+ wakpa këpa vientu puritsinqan usya pukutënö,+ tiempunchö mana wayoq pasëpa* wanushqa* y watsimpita o matsumpita* sutashqa plantanö kayan.
13 Pëkunaqa oqrakashqa pureq estrëllanömi kayan, y mana penqakur rurayanqanqa, pushuqata jitaq lamarchö laqcheqsëkaq yakunömi.+ Pëkunataqa pasëpa* ampeqmi o tsakëmi* imëyaqpis shuyarëkan.+
14 Adanpita qallëkur qanchis kaq kastan Enocpis,+ pëkunapaqmi kënö nir willakurqan: “¡Rikäyë! Teyta Jehovämi* mëtsika limpiu angelninkunawan shamurqan+
15 llapan nunakunata juzganampaq,+ y Diosta mana respetaqkuna Diosta mana respetar rurayanqampita, y mana respetar mana penqakushpa imëka mana allikunata pëpaq parlayanqampita culpayoq kayanqanta rikätsikunampaq”.+
16 Tsë nunakunaqa imëkata pasayanqampitam quejakur puriyan,+ y munayanqanta rurarmi kawakuyan.+ Pëkunaqa allish tukurmi alabakuyan, y kikinkunapa bienninkuna ashirmi wakinkunata alabapäyan.*+
17 Peru qamkunaqa kuyë wawqikuna y panikuna, yarpäyë Señornintsik Jesucristupa apostolninkuna puntapitana willakuyanqanta.*
18 Pëkunaqa kutin kutinmi kënö niyäshurqëki: “Ushanan tiempuchöqa burlakoq nunakuna yurimurmi, Teyta Diosta mana respetar munayanqannö mana allikunata rurayanqa”.+
19 Pëkunaqa congregacionchö kaqkunatam rakikätsiyan,+ animalkunanömi portakuyan y manam Diospa santu espïritunta katsiyantsu.
20 Peru qamkunaqa kuyë wawqikuna y panikuna, Diosman markäkuyanqëkichö o yärakuyanqëkichö mas firmi këkäyë, y mañakuyanqëkichö santu espïritu dirigiyäshunëkita permitiyë.+
21 Tsënöpa Señornintsik Jesucristu llakipäyäshurniki* imëyaqpis kawëman chätsiyäshunëkita shuyäyanqëkiyaq,+ Teyta Dios kuyanqan nunakuna kayänëkipaq.+
22 Tsënölla creikuyanqanchö mana següru këkaqkunatapis llakipar* këkäyë,+
23 y ushakätsikoq ninapita salvayë.+ Wakintapis llakipar* këkäyë, peru tsëtaqa cuidakur rurayë, jutsata* rurar mana alli portakuyanqanta mana allitanö rikar.+
24 Kananqa jutsaman* mana chäyänëkipaq* cuidayäshuynikita puëdeq, y chipapëkaq rikëninchö allita, llapanchö sänuta+ y alläpa kushishqata katsiyäshuynikita puëdeq,
25 awmi, Señornintsik Jesucristuwan Salvamaqnintsik japallan Teyta Dios, punta puntaman churashqa, alläpa respetashqa, puëdeq y autoridäyoq këkutsun, unë, kanan y imëyaqpis. Tsënö kallätsun.*
Nötakuna
^ Kënöpis niyanmi: ankupäkoq; kuyapäkoq.
^ O “patronnintsik”.
^ Griëgu idiömachö: aselguëia. Rikäri “Bibliachö palabrakunata entiendinapaq” neqta.
^ O “juzgashqa”.
^ Kënöpis niyanmi: tutapëman.
^ Kënöpis niyanmi: jankat.
^ Rikäri “Bibliachö palabrakunata entiendinapaq” neqta.
^ Kënöpis niyanmi: pecädu.
^ Kënöpis niyanmi: wañoq.
^ O “manam juzgar condenarqantsu”.
^ Griëgu idiömachöqa “nänintam” ninmi.
^ O “kuyanakur mikuyänëkipaq juntakäyanqëkichö”.
^ Kënöpis niyanmi: jankat.
^ Griëgu idiömachöqa “ishkë kuti wanushqa” ninmi.
^ Kënöpis niyanmi: jawampita; chapampita; sipimpita.
^ Kënöpis niyanmi: tutapëmi.
^ Kënöpis niyanmi: jankat.
^ O “väleqpaq churayan”.
^ O “unëna musyatsikuyanqanta”.
^ Kënöpis niyanmi: ankupäyäshurniki; kuyapäyäshurniki.
^ Kënöpis niyanmi: ankupar; kuyapar.
^ Kënöpis niyanmi: ankupar; kuyapar.
^ Kënöpis niyanmi: pecäduta.
^ Kënöpis niyanmi: pecäduman.
^ O “ishkiyänëkipaq”.
^ O “Amen”.
