Josuë 1:1-18
1 Jehovä Diospa sirweqnin Moises wanuriptinmi, Jehoväqa Nunpa tsurin Josuëta* parlaparqan.+ Josuëqa karqan Moisespa yanapaqninmi,*+ pëtam kënö nirqan:
2 “Sirwimaqnï Moisesqa wanukushqanam.+ Kananqa, Jordan mayuta* israelïtakunawan tsimpayänëkipaq alistakuy, y entreganäpaq kaq markakunaman pëkunata yëkatsi.+
3 Moisesta äninqänöllam, llapan yëkuyanqëki markakunaqa qamkunapaq kanqa.+
4 Markëkikunaqa tsunyaq sitiupita Lïbanuyaq y Eufratis jatun mayuyaqmi* kanqa, tsëqa hitïta nunakuna+ kawayanqan llapan markakunam. Y Jatun lamaryaqmi* kanqa.*+
5 Kawanqëkiyaqqa contrëki llapan churakaqkunatam vencinki.+ Imanömi Moisesta yanaparqä, tsënöllam qamtapis yanapashqëki.+ Manam imëpis qonqashqëkitsu ni dejashqëkitsu.+
6 Qammi kë nunakunata yanapanki unë awilunkunata äninqä markakunata chaskiyänampaq.+ Tsëmi valienti kanëki y manam mantsapakunëkitsu.+
7 Valientim kanëki y manam mantsapakunëkitsu, y sirwimaqnï Moises mandashunqëki Leytam wiyakunëki. Llapan Ley ninqantam cäsukunëki,+ tsëmi yanapashunki mëta ëwarnimpis, imatapis alli pensëkur ruranëkipaq.+
8 Kë libruchö qellqarëkaq Leypitam imëpis parlanëki.+ Kë librutam paqasta junaqta leyinëki y leyinqëkimanmi pensanëki.+ Tsëmi yanapashunki kë libruchö llapan qellqarëkaqkunata cäsukunëkipaq. Tsënöpam ima ruranqëkipis alli yarqapushunki, y alli pensëkurmi imatapis ruranki.+
9 ¡Noqam mandëkaq valienti kanëkipaq y mana mantsapakunëkipaq! Noqa Jehovä Diosnikiqa, mëta ëwaptikipis qamwanmi këkäshaq, tsëmi imatapis mantsanëkitsu”.+
10 Tsëpitanam Josuëqa mandakoqkunata kënö nirqan:
11 “Campamentuchö këkaq llapan nunakunata kënö niyë: ‘Jehovä Diosnintsik entregamänapaq kaq markakunaman yëkunapaq y duëñun tikranapaqmi, kanampita kima junaqllatana Jordan mayuta* tsimpashun. Tsëmi imëkëkikunata alistayänëki’”.+
12 Rubenpa kastankunata, Gadpa kastankunata y Manasespa pullan kastankunatanam Josuëqa kënö nirqan:
13 “Jehoväpa sirweqnin Moises niyäshunqëkita yarpäyë. Pëqa kënömi mandayäshurqëki:+ ‘Jehovä Diosnintsikmi kë markakunata entregayäshurqunki këchö alli kawakuyänëkipaq.
14 Warmikikuna, wamrëkikuna y animalnikikunaqa Jordan mayupa* kë tsimpanchömi,*+ Moises entregayäshunqëki markakunachö quedakuyanqa. Peru qamkunaqa, pelyapaq valienti nunakunaqa,+ wakin kastëkikunapa puntankunatam guërrapaq listullana tsimpayänëki.+ Pëkunatam yanapayänëki
15 alli kawakuyänampaq qamkunatanölla Jehovä yanapanqanyaq, y Jehovä Diosnintsik entreganampaq kaq markakunata chaskiyanqanyaq. Tsëpitanam Jordan mayupa* kë tsimpanman* kutikayämunki, Jehoväpa sirweqnin Moises entregayäshunqëki markakunaman, tsëchö imëyaqpis kawakuyänëkipaq’”.+
16 Tsënam pëkunaqa Josuëta kënö niyarqan: “Llapan niyämanqëkitam rurayäshaq, y mëpa mandayämaptikipis ëwayäshaqmi.+
17 Imanömi Moisesta llapanchö cäsukuyarqä, tsënöllam qamtapis cäsuyashqëki. Moisesta yanapanqannölla qamtapis Jehovä Diosnintsik yanapëkushuy.+
18 Pï nunapis mandakunqëkipa contran churakar y ninqëkita mana cäsukurqa, wanunanmi o wañunanmi.+ Qamqa, valientim kanëki y manam mantsapakunëkitsu”.+
Nötakuna
^ O “sirweqninmi”.
^ O “Jehosüa”. Tsëqa “Jehovämi salvakoqqa” ninanmi.
^ Kënöpis niyanmi: riuta.
^ Kënöpis niyanmi: riuyaqmi.
^ O “inti o rupay jeqanan läduyaqmi kanqa”.
^ Tsëqa Mediterraneu lamarmi.
^ Kënöpis niyanmi: riuta.
^ O “inti o rupay yarqamunan läduchö”.
^ Kënöpis niyanmi: riupa.
^ Kënöpis niyanmi: riupa.
^ O “inti o rupay yarqamunan lädunman”.
