Exodu 18:1-27
18 Tsëpitanam Madianchö sacerdöti Jetröqa mashan Moisespaq+ y israelïtakunapaq Teyta Dios llapan ruranqanta musyarirqan. Y israelïtakunata Egiptupita Teyta Jehovä imanö pushamunqantapis musyarirqanmi.+
2 Moisesqa suegrun Jetröpa wayinmanmi warmin Ziporäta mandashqa karqan. Tsëmi Jetröqa juk tiempupa wätarqan warmi tsurin Ziporäta
3 y ishkan willkankunata.+ Moisesqa Guersom*+ nirmi juknin kaq tsurimpa jutin churashqa karqan. Tsënöqa churarqan, “noqaqa forastërullam kë markachö kallä” nirmi.
4 Y juknin kaq tsurimpa jutinnam Eliezer* karqan. Tsënöqa churashqa karqan, “papänïpa Diosninmi yanapamaqnïqa, pëmi wanutsimëta munaq Egiptuchö gobernaqpita salvamashqa”+ nirmi.
5 Tsënam Jetröqa, mashan Moisespa warminta y willkankunata pusharkur Dios Yaya akranqan jirkaman Moisesta watukaq ëwarqan.+
6 Y Moisesta kënö nir willayänampaqmi mandakurqan: “Suegruyki Jetrömi+ warmikiwan y ishkan wamrëkikunawan shamuykan”.
7 Tsënam Moisesqa jinan höra suegrunwan tinkoq ëwarqan. Tinkuriyaptinqa puntanman qonqurikurmi suegrunta mutsarqan, y imanö këkäyanqanta tapunakurirmi Moisespa carpanman* yëkuyarqan.
8 Tsëpitanam Moisesqa israelïtakunata Teyta Jehovä imanö yanapashqa kanqanta, y Egiptuchö gobernaqta y egipciukunata imanö castigashqa kanqanta suegrunta willarqan.+ Tsënöllam Egiptupita ëwakur imakunapa pasayanqanta,+ y Teyta Jehovä imanö yanapanqantapis willarqan.
9 Israelïtakunata Egiptupita yarqatsimunampaq Teyta Jehovä imëkata ruranqanta musyaskirmi Jetröqa kushikurqan,
10 y kënömi nirqan: “Jehovä Dios alabashqa katsun, pëqa Egiptupitam pushayämushurqunki, Egiptuchö gobernaqpita y egipciukuna sufritsiyäshunqëkipitam salvayäshurqunki.
11 Y sufritsiyäshoqniki egipciukunata tukuynöpa castigashqa kaptinmi, kananqa musyari Teyta Jehoväqa llapan santukunapita mas puëdeq kanqanta”.+
12 Moisespa suegrun Jetröqa ushakanqanyaq rupatsina qarëkunata y juk qarëkunatam Teyta Diospaq apashqa karqan. Aaronwan israelïtakunata dirigeqkunaqa, Moisespa suegrunwanmi Teyta Diospa rikëninchö mikuyänampaq juntakäyarqan.
13 Waränin junaqqa imëpis ruranqannömi Moisesqa israelïtakunata problëmankunachö yanapanampaq jamakurqan. Y patsa waranqampita patsa tardiyanqanyaqmi israelïtakunaqa Moisesman ëwayarqan.
14 Tsënam suegrunqa, Moises llapan rurëkanqanta rikar kënö tapurqan: “¿Imanirtan japallëki kë llapanta rurëkanki? ¿Imanirtan patsa waranqampita patsa tardiyanqanyaq kë llapan nunakunata japallëki atiendinki?”
15 Tsënam Moisesqa suegrunta kënö nirqan: “Kë llapan nunakunaqa Teyta Dios yanapananta munarmi noqaman shayämun.
16 Tsëmi ishkaq nunakuna problëmachö karninqa, noqaman shamur willayäman. Tsënam pëkunapa cäsunkunata rikaskir, tsë asuntupaq Teyta Dios mandakunqankunata y leyninchö ima ninqanta musyatsï”.+
17 Tsënam suegrunqa Moisesta kënö nirqan: “Manam allitatsu rurëkanki.
18 Kë trabäjuqa alläpa lasaq qepinömi, tsëmi japallëkiqa rurëta puëdinkitsu, qam y qamman shamoqkunapis ajayäyankim.
19 Tsëmi kë ninqaqta wiyaramë, y Teyta Diosqa yanapashunkim.+ Qammi israelïtakunapa favornin Dios Yayaman mañakunëki,+ y pëkunapa problëmankunatam Dios Yayata willanëki.+
20 Teyta Dios mandakunqankunata, imanö kawayänampaq kaqta y imakunata rurayänampaq kaqtam yachatsinëki.+
21 Mil nunakunata, cien nunakunata, cincuenta nunakunata y chunka nunakunata dirigiyänampaqmi ollqukunata akranëki.+ Pëkunaqa Teyta Diosta respetaq, confiakuypaq, imëkachöpis honrädu,+ y kë trabäjuchö alli yanapakuytam yachayänan.+
22 Pëkunam imëka problëmankunachö israelïtakunata yanapayänan. Fäcil arreglanan cäsukunataqa pëkunam atiendiyänan, y difïcil cäsukunataqa qammanmi chätsiyämunan.+ Pëkuna yanapayäshuptikim qam ruranqëki trabäjupis mas fäcil-llana kanqa.+
23 Tsënö ruraptiki y Teyta Dios permitiptinqa, llapan ruranëkipaq kaqwanmi shumaq cumplinki, y qamman shamoq nunakunapis tranquïlum wayinkunata kutikuyanqa”.
24 Moisesqa jinan höram suegrun consejanqannölla rurarqan.
25 Tsëmi tsë trabäjuchö alli yanapakuyta puëdeq ollqukunata akrarqan. Y mil nunakunata, cien nunakunata, cincuenta nunakunata y chunka nunakunata dirigiyänampaq churarqan.
26 Tsë akranqan ollqukunam israelïtakunata problëmankunachö yanapayaq. Fäcil arreglanan cäsukunataqa pëkunam atiendiyaq, y difïcil cäsukunataqa Moisesmanmi chätsiyaq.+
27 Tsëpitanam Moisesqa suegrumpita despidikurqan,+ y suegrunqa markantam kutikurqan.
Nötakuna
^ Tsë jutiqa, “tsë markachö forastëru” ninanmi.
^ Tsë jutiqa, “Diosnïmi yanapamaqnï” ninanmi.
^ Kënöpis niyanmi: toldunman.
