Exodu 31:1-18
31 Teyta Jehoväqa Moisesta kënömi nirqan:
2 “Judä kastapita+ Bezaleltam+ akrarqö.* Pëqa Urïpa tsurin y Hurpa willkanmi.
3 Y podernïwan yanapaptïmi yachaq, musyaq kanqa, y imëka rurëtam yachanqa.
4 Tsënöpam llapan ruranampaq kaqta shumaq ruranqa, öruwan, plätawan y cobriwanmi imëkata ruranqa.
5 Shumaq rumikunatam llaqllanqa, y tsëkunata churanampaqmi chäpakunata ruranqa,+ y qerupitam imëkata ruranqa.+
6 Pëta yanapanampaqmi Dan kastapita Ahisamacpa tsurin Oholiabta+ akrarqö. Y imëka rurëta yachaq nunakunatam yachaq kayänampaq yanapashaq, tsënöpa kë llapan mandakunqäta rurayänampaq:+
7 carpa* wayita,+ Sagrädu Cäjata+ y tsapananta,+ carpa wayichö utilizäyänëkipaq kaqkunata,
8 mësata+ y mësachö utilizäyänëkipaq kaqkunata, alli kaq örupita candelabruta y candelabruchö utilizäyänëkipaq kaqkunata,+ inciensu rupatsina altarta,+
9 ushakanqanyaq rupatsina qarëkunata rupatsina altarta+ y tsë altarchö utilizäyänëkipaq kaqkunata, jatun lavatoriuta y armazonninta,+
10 alli awashqa röpakunata, sacerdöti karnin Aaron vistikunampaq sagrädu röpakunata y sacerdöti karnin tsurinkuna vistikuyänampaq röpakunata,+
11 sagrädu aceitita y sagrädu sitiuchö rupatsiyänëkipaq inciensuta.+ Pëkunam tsë llapan mandakunqäta rurayanqa”.
12 Y Teyta Jehoväqa Moisesta kënömi nirqan:
13 “Israelïtakunata këta willë: ‘Kuyë sirwimaqnïkuna kayänëkipaq qamkunata akranqätam* säbadu junaqqa rikätsikunqa,+ tsëmi tsë junaqpaq noqa Jehovä mandakunqäta imëpis cumpliyänëki.
14 Säbadu junaqqa sagrädum kanqa, tsëmi tsë junaqpaq mandakunqätaqa imëpis cumpliyänëki.+ Y pï nunapis mana cumpliptinqa wanutsiyänëkim. Tsënöllam pï nunapis säbadu junaqchö trabajaptinqa wanutsiyänëki.+
15 Joqta junaqpam trabajëta puëdiyanki, peru säbadu junaqqa manam trabajayänëkitsu.+ Tsë junaqqa noqa Jehoväta adorayämänëkipaqmi kanqa. Pï nunapis säbadu junaqchö trabajaptinqa wanutsiyänëkim.
16 Llapan israelïtakuna y tsëpita yureq kastankunapis säbadu junaqpaq mandakunqätaqa imëpis cumpliyänanmi.
17 Noqa Jehoväqa joqta junaqpam ciëluchö kaqkunata y patsachö kaqkunata kamarqä, y qanchis junaqqa jamarmi qallëkurqa.+ Tsëmi säbadu junaqqa israelïtakunawan ruranqä acuerduta rikätsikunqa’”.*+
18 Sinaï jirkachö Moiseswan parlar ushaskirmi, Teyta Diosqa ishkë palta rumikunaman qellqanqan mandamientukunata entregarqan.+ Tsë palta rumikunamanqa kikin Teyta Diosmi qellqarqan.+
Nötakuna
^ O “jutipa qayarqö”.
^ Kënöpis niyanmi: toldu.
^ Kënöpis niyanmi: akrayanqaqtam.
^ O “rikätsikoq señal kanqa”.
