Exodu 36:1-38
36 Carpa* wayita rurarnin yanapakuyänampaqmi, Teyta Jehoväqa imëka rurëta yachaq nunakunata mas yachaq y mas musyaq kayänampaq yanapanqa. Pëkuna y Oholiabmi Bezalelta yanapayanqa Teyta Jehovä mandakunqannölla imëkata ruranampaq”.+
2 Tsëpitanam Moisesqa Bezalelta, Oholiabta y Teyta Jehovä yanapaptin imëka rurëta yachaq nunakunata qayatsirqan.+ Pëkunaqa llapan shonqunkunawanmi Teyta Dios mandakunqanta rurar yanapakuyarqan.+
3 Pëkunatam Moisesqa carpa* wayipaq israelïtakuna apayanqan qarëkunata entregarqan.+ Y israelïtakunaqa cada patsa warëmi qarëkunata aparnin sïguiyarqan.
4 Tsëpitanam carpa* wayita rurarnin trabajëkaq nunakunaqa, jukraq jukraq Moises kaqman ëwayarqan.
5 Y kënömi niyarqan: “Israelïta mayintsikkunaqa wananqantsikpita* mastam Teyta Jehovä mandakunqanta ruranapaq apëkäyämun”.
6 Tsënam Moisesqa entëru campamentuchö kënö willakuyänampaq mandakurqan: “Ollqukuna y warmikuna, amana carpa* wayipaq mas qarëkunata apayämuynatsu”. Tsënö niyaptinmi israelïtakunaqa qarëkunata apayarqannatsu.
7 Carpa* wayita rurayänampaq apayanqan qarëkunaqa wanayanqampitapis* masmi karqan.
8 Tsëpitanam imëka rurëta yachaq nunakunaqa,+ carpa* wayita+ chunka bayëtakunawan rurayarqan. Tsë bayëtakunataqa lïnupita rurashqa alli kaq hïluwan, azul hïluwan, millwapita granäti hïluwan y puka hïluwanmi awayarqan. Y pëmi* tsë bayëtakuna jananchö querubinkunata bordarqan.+
9 Cada bayëtapa largunqa döci metrusnömi* karqan, y anchunnam ishkë metrunö.* Llapan bayëtapis tsë medïdallam kayarqan.
10 Tsëpitanam pitsqa bayëtata jukllëlla kanampaq piëzarqan. Tsënöllam wakin pitsqa bayëtatapis piëzarqan.
11 Y piëzanqan bayëtakunapa ushananchömi azul hïlupita rinrinkuna rurarqan. Tsënöllam wakin piëzanqan bayëtakunapa ushananchöpis rinrinkuna rurarqan, tsëkunapita ishkan jatun bayëtata juntanampaq.
12 Tsë piëzanqan jatun bayëtapa ushananchömi cincuenta rinrinkuna rurarqan. Tsënöllam wakin piëzanqan jatun bayëtapa ushananchöpis cincuenta rinrinkuna rurarqan. Tsë ishkan jatun bayëtata juntanampaqmi, tsë rinrinkunata frenti frenti churarqan.
13 Y tsë ishkan jatun bayëtata juntanampaqmi örupita cincuenta ganchukunata rurarqan, tsënöpa carpa* wayita tsapänampaq bayëta jukllëlla kanampaq.
14 Carpa* wayita tsapanampaqmi cabrapa millwapita onci bayëtata awarqan.+
15 Cada bayëtapa largunqa trëci metrusnömi* karqan, y anchunnam ishkë metrunö.* Tsë oncin bayëtaqa tsë medïdallam kayarqan.
16 Tsëpitanam pitsqa bayëtata jukllëlla kanampaq piëzarqan, y tsënöllam wakin joqta bayëtatapis jukllëlla kanampaq piëzarqan.
17 Y piëzanqan bayëtakunapa ushananchömi cincuenta rinrinkuna rurarqan, y tsënöllam juknin piëzanqan bayëtakunapa ushananchöpis cincuenta rinrinkuna rurarqan.
18 Y ishkan jatun bayëtata juntanampaqmi cobripita cincuenta ganchukunata rurarqan, tsënöpa ishkan bayëtakunata jukllëllaman juntanampaq.
19 Carpa* wayita tsapayänampaqmi, pukaman tiñishqa üshapa qaratsankunata piëzarqan. Y tsë jananman churayänampaqmi föcapa* qaratsankunata piëzarqan.+
20 Tsëpitanam carpa* wayipa kuchunman jawinampaq acacia qerupita+ marcukunata rurarqan.+
21 Cada marcupa largunqa chusku metrunömi* karqan, y anchunnam sesenta y siëti centïmetrusnö* karqan.
22 Tsë marcukunapa chakinta jawinampaqnam täcukunata rurarqan, y cada marcupa chakinkunapaqmi ishkë täcuta churarqan. Tsënöllam rurarqan carpa* wayichö ëwaq wakin marcukunata jawinampaqpis.
23 Carpa* wayipa izquierda* lädunchömi veinti marcuta jawirqan.
24 Tsë veinti marcukunata jawinampaqmi, plätapita cuarenta täcukunata rurarqan. Cada marcupa chakinkunamanmi ishkë täcuta churarqan, y tsënöllam wakin marcukunapa chakinmampis ishkë täcuta churarqan.+
25 Carpa* wayipa derëcha lädunmampis veinti marcukunatam jawirqan.
26 Y marcukunata jawinampaqmi, plätapita cuarenta täcukunata rurarqan. Cada marcupa chakinkunamanmi ishkë täcuta churarqan, y tsënöllam wakin marcukunapa chakinmampis ishkë täcuta churarqan.
27 Carpa* wayipa qepanqa inti o rupay jeqanan lädumampam karqan, y tsë läduman jawinampaqmi joqta marcuta rurarqan.+
28 Tsënöllam carpa* wayipa qepa esquïnankunachö jawinampaqpis ishkë marcuta rurarqan.
29 Tsë marcukunataqa ishkë piëzapitam rurarqan, y ushananchömi tsë ishkan piëzakunata juntarqan, y tsë marcupa jananchömi punta kaq argöllata churarqan. Tsënöllam juknin esquïnachö ëwaq marcuwampis rurarqan.
30 Carpa* wayipa qepanchö ëwaq llapan marcukunaqa puwaqmi kayarqan, y tsëkunapaqmi dieciseis täcukunata rurarqan. Cada marcupa chakinkunamanmi ishkë täcuta churarqan.
31 Y carpa* wayipa juk kaq lädunchö ëwaq marcukunata tsaränampaqmi, acacia qerupita pitsqa listonkunata rurarqan,+
32 tsënöllam juknin kaq lädunchö ëwaq marcukunata tsaränampaqpis pitsqa listonkunata rurarqan. Y inti o rupay yarqamunan läduchö o carpa* wayipa qepanchö ëwaq marcukunata tsaränampaqpis pitsqa listonkunatam rurarqan.
33 Tsë marcukunata chowpimpa* tsaränampaqmi juk listonta ullutsirqan, y juk kaq kuchumpita juknin kaq kuchunyaqmi cruzatsirqan.
34 Llapan marcukunamanmi öruta laqarqan, y listonkunata ullutsiyänampaqmi örupita argöllakunata churarqan. Tsë llapan listonkunamampis örutam laqarqan.+
35 Azul hïluwan, millwapita granäti hïluwan, puka hïluwan y lïnupita rurashqa alli kaq hïluwanmi cortïnata awarqan.+ Tsë cortïnapa jananchömi querubinkunata+ bordarqan.+
36 Tsë cortïnata warkunampaqmi, acacia qerukunapita chusku columnata rurarqan, tsë columnakunamanmi öruta laqarqan. Cortïnata tsaränampaqnam örupita ganchukunata rurarqan. Tsë chuskun columnata jawinampaqmi, plätapita chusku täcukunata rurarqan.
37 Tsëpitanam carpa* wayipa yëkunanman churanampaq azul hïluwan, millwapita granäti hïluwan, puka hïluwan y lïnupita rurashqa alli kaq hïluwan cortïnata awarqan.+
38 Tsë cortïnata warkunampaqmi, acacia qerupita pitsqa columnata rurëkur jananman öruta laqarqan. Tsë columnakunata jawinampaqnam, cobrita tsulluratsir pitsqa täcukunata rurarqan. Tsë columnakunaman churanampaqmi örupita ganchukunata rurarqan.
Nötakuna
^ Kënöpis niyanmi: Toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: necesitanqantsikpita.
^ Kënöpis niyanmi: toldu.
^ Kënöpis niyanmi: Toldu.
^ Kënöpis niyanmi: necesitayanqampitapis.
^ Tsënö nirqa, wakinkuna rurayaptin Bezalel rikanqampaqmi parlëkan.
^ Kënöpis niyanmi: toldu.
^ Hebreu idiömachöqa “28 cödus” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “4 cödus” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: toldu.
^ Kënöpis niyanmi: Toldu.
^ Hebreu idiömachöqa “30 cödus” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “4 cödus” ninmi. Rikäri “Masllata musyanapaq” neqchö B14 kaqta.
^ Föcaqa yakuchö kawaq animalmi.
^ Kënöpis niyanmi: Toldu.
^ Kënöpis niyanmi: toldu.
^ Hebreu idiömachöqa “10 cödus” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “1 cödu pullan” ninanmi. Rikäri “Masllata musyanapaq” neqchö B14 kaqta.
^ Kënöpis niyanmi: toldu.
^ Kënöpis niyanmi: Toldu.
^ Hebreu idiömachöqa “sur” ninmi.
^ Kënöpis niyanmi: Toldu.
^ Kënöpis niyanmi: Toldu.
^ Kënöpis niyanmi: toldu.
^ Kënöpis niyanmi: Toldu.
^ Kënöpis niyanmi: toldu.
^ Kënöpis niyanmi: toldu.
^ Kënöpis niyanmi: pullannimpa.
^ Kënöpis niyanmi: toldu.
