Exodu 5:1-23
5 Tsëpitanam Moiseswan Aaronqa Egiptuchö gobernaqman ëwar kënö niyarqan: “Israelïtakunapa Diosnin Jehovämi këta nin: ‘Juntakëkurnin alabayämänampaqmi sirweqnïkuna tsunyaq sitiuman yarquyänanta dejanëki’”.
2 Tsënam gobernaqqa, “¿¡pitaq Jehoväqa+ imata ruranäpaq kaqta nimänampaq!?+ Manam Jehoväta reqïtsu, ni manam israelïtakuna yarquyänanta dejashaqtsu”+ nirqan.
3 Tsënam Moiseswan Aaronqa niyarqan: “Hebreukunapa Diosnïkunam parlapäyämashqa. Tsëmi rogakuyaq kima junaq yarquyänäta* permitïkayämänëkipaq, tsënöpa tsunyaq sitiuman ëwar Jehovä Diosnïkunapaq qarëkunata rupatsiyänäpaq.+ Mana tsënö rurayaptïqa qeshyawanmi castigayämanqa, o chikimaqnïkuna wanutsiyämänantam permitinqa”.
4 Tsënam gobernaqqa nirqan: “Moises y Aaron, ¿imanirtaq qamkunaqa munayanki israelïtakuna trabäjunkunata dejëkur ëwakuyänanta? ¡Llapëki trabajaq ëwayë!”.+
5 Kënöpis nirqanmi: “Kë nacionchöqa mëtsika marka mayikikunam noqapaq trabajëkäyan, y qamkunaqa, ¿llapankuna trabäjunkunata dejariyänantaku munayanki?”.
6 Tsë kutim Egiptuchö gobernaqqa mandakoqninkunata y mandakoq israelïtakunata nirqan:
7 “Amana israelïtakunata päjan makyayënatsu,+ kananqa kikinkuna ashirna adöbikunata rurayätsun.
8 Tsënö kaptimpis, ama mënustaqa rurayätsuntsu, sinöqa puntatanölla rurayätsun. Pëkunaqa qela karmi, ‘¡ëwakuytam munayä! ¡Diosnïkunapaqmi qarëkunata rupatsita munayä!’ nirnin këkäyan.
9 Tsëmi ocupädu kayänampaq y engañakur puriyanqanta mana wiyayänampaq mas trabajatsiyë”.
10 Tsënam gobernaqpa mandakoqninkuna+ y mandakoq israelïtakunaqa kënö niyarqan: “Egiptuchö gobernaqmi këta nishqa: ‘Mananam päjata makyayashqëkinatsu.
11 Kananqa qamkunanam adöbita rurayänëkipaq mëpitapis päjata ashiyänëki, y manam mënustaqa rurayänëkitsu’”.
12 Tsënam israelïtakunaqa adöbita rurayänampaq entëru Egiptuchö raströjukunapita päjata ashiyarqan.
13 Y gobernaqpa mandakoqninkunaqa kënö nirmi israelïtakunata qayapäyarqan: “Päjata makyayanqaq tiempuchönöllam cada junaq rurayänëkipaq kaqta cumpliyänëki”.
14 Y gobernaqpa mandakoqninkunaqa, “¿imanirtaq dejayarqunki qanyampis kanampis mënus adöbillata rurayänanta?” nirmi mandakoq israelïtakunata maqar ushayarqan.+
15 Tsënam mandakoq israelïtakunaqa gobernaqman ëwar kënö quejakuyarqan: “¿Imanirtan sirwishoqnikikuna këkäyaptï tsënö tratayämanki?
16 Päjata mana makyëkäyämarmi, ‘¡puntatanölla adöbikunata rurayë!’ nirnin obligayäman. Y kikinkuna culpayoq këkarmi mana cumpliyanqäpita maqar ushayäman”.
17 Tsënam gobernaqqa kënö nirqan: “¡Qelakuna! Qamkunaqa qela karmi,+ ‘¡ëwakuytam munayä! ¡Jehoväpaqmi qarëkunata rurëta munayä!’ nirnin purikäyanki.+
18 ¡Jinan höra trabajaq kutiyë! Manam päjata chaskiyankinatsu, y puntatanöllam adöbikunata rurar sïguiyänëki”.
19 Tsëmi mandakoq israelïtakunaqa puntatanölla cada junaq adöbikunata ruratsiyänan kaptin ni imanö këtapis puëdiyarqantsu.
20 Y gobernaqwan parlayanqampita yarquyänampaqqa, Moiseswan Aaronmi waqtachö shuyëkäyarqan, y pëkunawan parlayänampaqmi juntakäyarqan.
21 Tsë höram Moisestawan Aaronta niyarqan: “Qamkunapa culpëkikunam gobernaqpis y sirweqninkunapis chikiyäman, y qamkuna qallapäyashqa kayaptikim kananqa ushakätsiyämanqapis.+ ¡Tsëta rurayanqëkipita Teyta Jehovä juzgayäshuy!”.
22 Tsënam Moisesqa Teyta Jehoväman kënö mañakurqan: “Jehovä Diosllä, ¿¡imanirtan permitinki sirwishoqnikikunata tsënö sufritsiyänanta!? ¿¡Imapaqtan Egiptuchö gobernaqman mandamarqunki!?
23 Qampa jutikichö parlapanqäpitam+ Egiptuchö gobernaqqa sirwishoqnikikunata masraq sufrikätsin,+ y qamqa manataq sirwishoqnikikunata salvanëkipaq ni imatapis rurarqunkitsu”.+
Nötakuna
^ O “viajayänäta”.
