Ezequiel 9:1-11
9 Tsëpitanam fuertipa kënö nimaqta wiyarqä: “Markachö nunakunata castigayänampaq nunakunata qayamuy. Cada ünu armankuna aptashqa shayämutsun”.
2 Tsënam rikarqä, norti läduchö këkaq altu kaq punkupa joqta nunakuna shayämoqta.+ Cada ünum ushakätsiyänampaq armankuna aptashqa kayarqan. Y pëkunawanmi lïnupita rurashqa röpayoq juk nuna shamurqan. Tsë nunapa tseqllanchömi secretariukuna qellqayänan tintata puritsikuyänan këkarqan. Y llapankuna yëkurirmi cobripita rurashqa altar lädunman shäkuriyarqan.*+
3 Tsëpitanam Israelpa Diosnimpa poderninqa,+ këkanqampita witsarkurqan querubin angelkuna jananman, punkupa umbralnin kaqman.+ Y pënam* lïnupita rurashqa röpan vistishqa y tseqllanchö secretariukuna tintata puritsiyänan katseq nunata qayarqan.
4 Pëtam Teyta Jehovä kënö nirqan: “Entëru Jerusalen markapa ëwar, imëka mana allikunata rurayanqanta rikar waqaq y llakikur+ këkaq nunakunata urkunkunachö señalë”.+
5 Wakinkunatanam puntächö kënö nirqan: “Qepanta ëwayë y nunakunata wanutsiyë entëru markachö. Ama ni ichikllapis llakipäyankitsu.*+
6 Awkintapis, jövintapis, wamratapis, warmitapis, ollquwan manaraq kashqa shipashkunatapis wanutsiyë o wañutsiyë.+ Templupita wanutsir qallayë.+ Peru señalashqa kaq nunakunataqa ama wanutsiyankitsu”.+ Tsënö niptinmi templuchö këkaq dirigentikunapita wanutsir qallëkuyarqan.+
7 Tsëpitanam kënö nirqan: “Wanushqakunataqa patiukunaman qotuyë.+ Tsënöpam templuqa sagrädunatsu kanqa. Jinan höra ëwayë”. Tsënö niptinmi pëkunaqa jinan höra ëwar markachö nunakunata wanutsiyarqan.
8 Nunakunata wanutsir wanutsir ëwayaptinmi japallä quedarqä. Tsënam urküpis patsaman chanqanyaq ishkirirqä y llakishqam fuertipa kënö nirqä: “Llapanta Gobernaq Teytallä Jehovä, ¿Jerusalenchö nunakunata ushakätsirku quedaq kaq Israel nunakunatapis llapanta ushakätsinki?”.+
9 Tsënam pëqa nimarqan: “Israel nunakunawan Judä nunakunaqa alläpanam jutsata* rurayashqa.+ Entëru nacionchömi wanutsinakurlla kawakuyan.+ Kë markachöqa manam justicia rurëpis kantsu.+ Pëkunaqa niyan: ‘Jehoväqa markantsikta dejarishqam. Jehoväqa manam rikämantsiktsu’.+ Tsënö nirmi tsëkunata rurayashqa.
10 Tsëmi noqaqa llakipäshaqtsu* ni pëkunapaq yarpachakushaqtsu.+ Imëka mana allikunata rurayanqampitam kananqa pagakuyanqa”.
11 Tsëpitanam rikarqä lïnupita rurashqa röpayoq nuna shamuykaqta, y tseqllanchönam secretariukuna tinta puritsikuyänan këkarqan. Chäramurmi kënö nirqan: “Mandamanqëkinöllam llapanta rurarqö”.
Nötakuna
^ Kënöpis niyanmi: ichiskiyarqan.
^ Capazchi Teyta Diospaq parlëkan.
^ Kënöpis niyanmi: ankupäyankitsu; kuyapäyankitsu.
^ Kënöpis niyanmi: pecäduta.
^ Kënöpis niyanmi: ankupäshaqtsu; kuyapäshaqtsu.
