Job 27:1-23
27 Jobqa kënöpis nirqanmi:
2 “Justiciata negamaq Teyta Dios kawanqannölla,+y mana allikunapa pasatsimaq Llapanta Puëdeq Dios kawanqannöllam,+
3 shütëkar,y Teyta Dios kawëkaqllataraq katsimaptinqa,+
4 manam shimïqa mana allikunata parlanqatsu,y manam qallüpis ulikunqatsu o llullakunqatsu.
5 Qamkuna niyanqëki rasumpa kanqantaqa manam imëpis acuerdutsu kashaq.
Wanukunqäyaqmi Teyta Diostaqa dejashaqtsu.+
6 Mana culpayoq kanqätam imëpis nishaq,+kawanqäyaqqa manam concienciä* acusamanqatsu.*
7 Chikimaqnïkuna mana alli nunakunanö castigashqa kayätsun,y mana allita ruramaqkuna, mana allita ruraqkunanö ushayätsun.
8 Wanuyänanta o wañuyänanta Teyta Dios permitiptinqa,+¿ima allitan kan pëpa contran kaqkunapaq?*
9 ¿Illaqpita mana allikunapa pasar qayakuyaptimpis,Teyta Dios wiyanqatsuraq?+
10 ¿Llapanta Puëdeq Diostatsuraq adorayanqa?
¿Imëkata pasarpis Teyta Diosmantsuraq rogakuyanqa?
11 Kananqa Teyta Diospa podernimpita parlapäyashqëki,y Llapanta Puëdeq Diospita llapan musyanqäta willayashqëki.
12 Teyta Diospita revelacionta chaskishqa kayaptikiqa,¿imanirtan parlayanqëkikuna imachöpis yanapakuntsu?
13 Këtam Teyta Diosqa mana allita ruraqkunapaq dispunishqa,+y këtam Llapanta Puëdeq Diosqa wakinkunapita provechakoqkunata ruranqa.
14 Mëtsika tsuriyoq karpis espädawanmi wanuyanqa o wañuyanqa,+y pëpita yureqkunapis mikuytam pishipakuyanqa.
15 Kawëkaq quedaqkunatanam qeshya ushakätsinqa,y manam viuda quedaq warminkunapis pëkunapaq waqayanqatsu.
16 Alli kaq röpankuna y juntayanqan plätankuna,mitunö o allpanö mëtsika kaptimpis,
17 y tsëkunata kikinkuna juntashqa kayaptimpis,alli kaqta ruraq nunam tsëkunawan vistikunqa,y juntayanqan plätatapis jutsannaq* kaqmi wakinkunata rakipanqa.+
18 Rurayanqan wayikunaqa,täpakoqkunapa tsukllannö+ y puyupa* qarannöllam kayan.
19 Rïcu këkarmi punukunqa, peru kapunqankunaqa manam juntashqatsu kanqa,nawinkunata kicharkamuptinqa manam imampis kanqanatsu.
20 Mëtsika yakunömi illaqpita imëkapis mantsakätsinqa,y vientuntin tamyam paqaspa apakunqa.+
21 Inti o rupay yarqamunan lädupita vientum,këkanqan sitiumpita apakur illakäratsinqa.+
22 Salvakuyta munar imëkata rurëkaptinmi,+mana llakipar* pëman chanqa.+
23 Waqtanchö taqllaparmi pëpita burlakunqa,y këkanqan sitiupitam wichyapanqa.*+
Nötakuna
^ Hebreu idiömachöqa “shonqü” ninmi.
^ O “condenamanqatsu”.
^ O “pëta mana respetaqkunapaq”.
^ Kënöpis niyanmi: pecädunnaq.
^ Kënöpis niyanmi: pulillapa.
^ Kënöpis niyanmi: ankupar; kuyapar.
^ O capazchi “waqtanchö taqllaparnin pëpita burlakuyanqa, y këkanqan sitiupitam wichyapäyanqa”.
