Proverbius 4:1-27
4 Wamrakuna, papänikikuna corregiyäshuptiki cäsukuyë.+
Alli entiendiyänëkipaq shumaq wiyakuyë.
2 Noqaqa, allim yachatsiyashqëki.
Yachatsinqaqkunata* ama qonqayankitsu.+
3 Noqaqa, llapanchömi papänïta cäsukurqä,+y mamänïpapis kuyë wamranmi karqä.+
4 Papänïqa kënö nirmi shumaq parlapämaq:
“Imëpis alli kawakunëkipaqqa, parlapanqaqkunata ama qonqankitsu,+ y mandanqaqkunatapis llapanta cumplinki.+
5 Teyta Dios yachaq kanqanta entiendi y imatapis alli entiendita procuranki.+
Parlapanqaqkunata ama imëpis qonqankitsu.
6 Teyta Dios yachaq kanqanta mana qonqarqa, manam imëka mana allikunaman chankitsu.
Yachakunqëkita kuyanki, tsëmi mana alli rurëkunapita tsapäshunki.
7 Imëkapitapis masqa välin, Teyta Dios yachaq kanqanta entiendinqantsikmi.+
Tsëmi yachakunqëkinö imatapis ruranëki, y imatapis yachakurqa, yachakunqëkimannömi kawanëki.+
8 Tsënö kawakuyta kuyaptikiqa pïmëmi reqishunki,+tsënö kawakuyta gustaptikiqa pïmëmi respetashunki.+
9 Yachakunqëkimannö kawarqa shumaq corönayoqnömi kanki,wëtapita rurashqa shumaq corönayoqnö”.
10 Hïju, parlapanqaqta cäsukuy.
Cäsukurqa mëtsika watakunapam kawakunki.+
11 Noqam yanapashqëki yachakunqëkimannö kawakunëkipaq+y allikunata rurar kawakunëkipaq.+
12 Purinqëki nänichöpis manam ni ima ishkitsishoqniki kanqatsuy cörrirpis manam ishkinkitsu.
13 Corregiyäshuptiki chaskikuy, ama qonqankitsu.+
Tsëtaqa imëpis yarparanki, tsëmi yanapashunki imëpis alli kawakunëkipaq.+
14 Ama mana alli nunakunanöqa portakuytsu,ni pëkuna rurayanqankunata rurëtsu.+
15 Mana allita ruraq nunakunawanqa ama ichikllapis juntakëtsu,+pëkunapitaqa witikuri.+
16 Mana allikunata mana rurarqa, pëkunaqa manam punuytapis puëdiyantsu.
Pitapis mana allita rurar-raqmi kushishqa punuyan.
17 Pëkunapaqqa, imëka mana allikunata rurëqa mikuyninkuna cuentay vïnunkuna cuentam.
18 Peru alli nunakuna, allikunata rurar kawakuyanqanqa patsa wararnin atsikyar qallaqnömi,y tsëpita ichikllapa ichikllapa pasëpa* atsikyäreqnömi.+
19 Peru mana alli nunakunaqa ampichö o tsakëchö* pureqnömi këkäyan,tsëmi mana allikunapa pasarpis imanir sufriyanqanta musyayantsu.
20 Hïju, ninqaqta cäsumë,parlapanqaqta shumaq wiyamë.
21 Tsëkunataqa ama qonqankitsu,imëpis yarparanki.+
22 Cäsukoq kaqqa, allim kawakunqa+y cuerpumpis manam qeshyananqatsu.
23 Shonquykiwanran kawëta puëdinki.
Tsëmi imapitapis masqa shonquykita alli cuidanëki.+
24 Ama mana kaqkunataqa parlëtsu,+y ni pitapis ulipëtsu o llullapaytsu.
25 Ama imanöpapis qepamanqa rikëtsu,imë hörapis puntallaman rikarë.+
26 Purinqëki nänitaqa alliraq limpië,*+tsëran tranquïlu purinki.
27 Y ëwëkanqëki nänipita ama yarqukuritsu ni ama juk lädupa ëwëtsu.+
Mana allikunataqa ama ichikllapis rurëtsu.
Nötakuna
^ O “Leynïta”.
^ Kënöpis niyanmi: jankat.
^ Kënöpis niyanmi: tutapëchö.
^ O capazchi “imanö kanqanta alliraq rikë”.
