BIBLIAPA ushanan kaq Apocalipsis librom shumaq kawakïta nunakuna kushishqa shuyaräyänampaq yanapan. Tsëchömi apóstol Juan willakun Jehová ninqankuna y munënin imanö cumplikänampaq kaqtapis.

Punta kaq visionta rikanqanchöqa, kawarimushqa Jesucristum congregacionkunata yanapan y willapan. Y qateqnin visionchönam, ciëlochö Diospa trönompaq y tsëchö sirweqninkuna Jehoväta alabëkäyanqanta willakun.

Diospa munënin cumplikänampaq ushëkaptinnam, Jesucristu chaskirin juk röllota qanchis sëllokunawan sellashqata. Chuskun punta kaq sëllokunata kichariptinmi, chuskoq cabällonkuna montashqa yarqayämun. Puntata yulaq cabällon montashqa yarqamoqqa kikin Jesusmi, Rey kanampaqmi coronarishqana këkan. Y kima kaqkunaqa juk color cabällonkuna montashqam kayan, y rikätsikuyan guerra, mallaqë, tukïläya qeshya y Patsapa ushakënin këllachöna kanqantam. Qanchis kaq sello kichakäriptinnam, wiyakurin qanchis kuti trompëtata tocayanqan, y tsëqa rikätsikun Diospa castïgonkuna shamunantam. Nïkurmi qanchis plägakuna kan, tsëqa Diospa piñakïninmi.

Tsëpitanam, Juanqa rikëkun juk wamra yurireqta, y tsëqa ciëlochö juk Reyta Diosnintsik churanqanmi. Tsëchö guerra qallëkuptinnam Satanastawan demonionkunata Patsaman qarparayämun. Tsënam ciëlopita sinchipa kënö nimoqta wiyarirqan: “Allau patsacho” kaqkuna. ¿Imanir? Ichik tiempollachöna ushakärinampaq kaqta musyarmi Diabluqa alläpa piñashqa këkan (Apocalipsis 12:12).

Yapëmi Jesusqa achkas niraqlla ciëlochö rikakurin, y pëwan “juntu mandacuya[nampaqmi]” 144.000 akrashqa nunakunapis nöpanchö këkäyan. Apocalipsis libro willakuptinmi, musyantsik Dios awnikunqan juknin kaq mirë 144.000 nunakuna kayanqanta (Apocalipsis 14:1; 20:6).

Tsëpitanam, Patsachö llapan gobernantekuna ëllukäriyan Armagedonpaq o Diospa ‘dia del juisiunpaq’, y yulaq cabällon montashqa Jesustawan ciëlochö tröpankunatam ushakätsita tïrayan. ¿Imachöraq tsë guerra ushanqa? Patsapa llapan gobernantenkunata ushakäratsiyaptin y Satanasta llawirkuyaptinmi. Jesuswan 144.000 nunakunaqa waranqa watapam kë Patsata gobernayämunqa, tsëpitanam Satanasta ushakätsiyanqa (Apocalipsis 16:14; 20:4).

Waranqa Wata Jesus gobernarnin, ¿imataraq alli nunakunapaq ruranqa? Juanmi kënö nirqan: “Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apocalipsis 21:4). Y, ¡alläpa shumaq huertamanmi Patsa yapë tikrarinqa!

Apocalipsis libroqa willamantsik awnikushqan Reywan Jehová jutinta santoyätsinampaq y pëlla gobernëta puëdenqantam.

(Apocalipsis libropita jorqashqam.)