Teytakunapa punta wamrankuna yuririptinqa alläpam kushikuyan, peru wätananqa sasaraqmi (ajaraqmi). Itsachi espantakuyanki llullu wamrëkikunata cuidayänëkipaq atska tiemputa y kallpata wanayanqëkita. Mana alläpa punuyanqan, mana jamayanqan y imëka cambiukuna kanqanmi höraqa casädukunata problëmaman chäratsinman. Tsëmi, ishkankuna cambiukunata rurayänan wamrankunata y casädu kawakïninkunata cuidayänampaq. ¿Imanötaq Bibliapa consëjunkuna yanapayäshunkiman tsë asuntukunata altsayänëkipaq?

BIBLIA YACHATSIKUNQAN: “Cuyaqqa imata rurayaptinpis, awantanqam, ancupanqam [...], ni imatapis manam quiquinllapaqqa ashenqatsu, ni piñashqa purenqatsu, ni ofendenqantapis yarparanqatsu” (1 Corintius 13:4, 5). Mama karqa punta wamrëki yuririptinmi, pëta atiendita mas procuranki. Tsëqa itsa qowëki sientinqa unënöna mana kuyanqëkita ni atiendinqëkita, manam qonqanëkitsu qowëkipis atiendinëkita wananqanta. Pacienciawan y kuyakïwan llullu wamrëkita cuidayänëkipaq wananqëkita y valoranqëkita rikätsita puëdinkim.

“Casadu nunacunapis, shumaq tratayë warmiquicunata” (1 Pëdru 3:7). Teyta tikrarirqa, entienditam procuranëki kananqa warmiki wamrëkikunata cuidar mas tiemputa pasarnin, höraqa utishqa, ganasninnaq o llakishqa sientikunampaq kaqta. Itsa qamwampis piñakunqa, peru pacienciakunëkim, porqui “kallpasapa nunapitapis mas alliqa mana ras piñakoq nunam” (Proverbius 16:32). Entiendita procurë y wananqanta qoy (Proverbius 14:29).

ITSA KËNÖ RURANKIMAN:

• Teyta karninqa: Warmikita yanapë llullu wamrëkikunata cuidar, hasta paqaskunapapis. Warmikiwan y wamrëkiwan mas tiempu pasanëkipaq wakin rurënikikunapita tiempïkita raki

• Mama karninqa: Qowëki wamrata cuidar yanapashïnikita munaptinqa, chaskikï. Qamnö mana ruraptinqa, mana piñapashllapa imanö ruranampaq kaqta shumaq yacharatsi

BIBLIA YACHATSIKUNQAN: “Ishkankunapis juk ëtsallanam kayanqa” (Genesis 2:24). Wamrëkikuna kaptimpis, ama qonqëtsu majëkiwan qam ‘juk ëtsalla’ kayanqëkita. Alleq kallpachakï casädu kawakïniki mana ushakänampaq.

Warmi karqa, qowëki yanapashunqëkita agradecikï. Agradecikur imatapis ninqëkiqa, itsa ‘jampi’ cuenta kanqa (Proverbius 12:18). Qowa karqa, warmikita niri familiëkirëkur ruranqampita alläpa kuyanqëkita y valoranqëkita (Proverbius 31:10, 28).

“Waquincunapaqpis yarpacachäshun, y ama quiquintsicpa biennintsicllaqa imatapis ashishuntsu.” (1 Corintius 10:24.) Majëkipaq llapan puëdinqëkita imëpis rurë y kallpachakunqanta precisaqpaq churë. Tiemputa rakiyë shumaq parlakuriyänëkipaq. Pununakuyänëki asuntuchöqa kikikipa munënikillataqa ama rurëta procurëtsu. Majëki imata wananqanta cuentaman churë. Bibliam kënö nin: “Jucniqui jucniquicunapis ama michänacuyëtsu cuerpiquicuna qonaquita”, tsënö kanampaqqa ishkëkim acuerdu kayänëki (1 Corintius 7:3-5). Tsë asuntupitam cläru parlayänëki. Pacienciayoq y entiendikoq kanqëkim casädu kawakïnikita sinchiyätsinqa.

ITSA KËNÖ RURANKIMAN:

• Ama qonqëtsu majëkiwan tiemputa pasayänëki alläpa precisanqanta

• Kuyanakuyanqëkita rikätsinakuyë ima qarëllatapis qonakurnin o qellqapänakurnin

BIBLIA YACHATSIKUNQAN: “Yarpë wamra canqequipita patsa Diospa palabranta yachaconqequita. Tse Diospa palabranmi cäyitsishunqui [...] salbacunequipaq caqta” (2 Timoteu 3:15). Wamrëkita imanö yachatsinëkipaq kaqta puntallapitana preparakï. Cuentamanmi churanëki mëyaqlla yachakunampaq kaqta, wamrëkiqa manaraq yurirnimpis yachakïta puëdinmi. Tantiyarinëkipaq, manaraq yurirnimpis parlanqëkita reqita puëdinmi y imanö këkanqëkitapis sientinmi. Jina yurinqampita patsë imëpis leyipänëki, leyinqëkita mana entiendirpis, winarnin leyita gustanampaq itsa tsë yanapanqa.

Diospita parlapänëkipaq alläpa llulluraq kanqanta ama pensëtsu. Pëpa nöpanchö Jehoväman mañakï (Deuteronomiu 11:19). Pëwan pukllarqa, Dios kamanqankunapita parlapë (Salmu 78:3, 4). Winanqanmannömi wamrëkiqa cuentata qokunqa Jehoväta alläpa kuyanqëkita y pëpis qamnöllam kuyanqa.

ITSA KËNÖ RURANKIMAN:

• Wamrëkita yachatsinëkipaq Jehoväta mañakï yachëniki qoshunëkipaq

• Llullu wamrëki ras yachakunampaq kutin kutin parlapë precisaq palabrakunata y yachatsikïkunata