19 KAQ YACHAKUNËKIPAQ
¿Jehoväpa testïgunkunaqa alli kaq religionku kayan?
Jehoväpa testïgunkunaqa Diospa Palabran Bibliachö mandakunqannömi Diosta adorayä. Këchömi yachakunki imaman creiyanqäta, imanir Jehoväpa testïgun kayanqäta y llapäkuna kuyanakuyanqäta.
1 KAQ: Jehoväpa testïgunkunaqa, ¿imatataq yachatsikuyänampaq utilizäyan?
Jesusmi Jehoväta nirqan: “Palabrëkim rasumpa kaqqa” (Juan 17:17). Jehoväpa testïgunkunaqa Jesusnöllam Diospa Palabran Bibliachö ninqanta creiyä. 1870 watamampam Bibliapita rasumpa kaqta yachakur qallayarqä. Tsë witsanqa “Bibliata estudiaqkuna” nirmi Testïgukunata reqiyaq. Pëkunaqa Bibliachö yachakuyanqanmannömi Jehoväta adorar qallëkuyarqan, y llapan yachakuyanqantam nunakunata yachatsiyaq a iglesiakunachö yachatsikuyanqampa contran kaptimpis.
2 KAQ: ¿Imanirtan Jehoväpa testïgunkuna niyäman?
Jehoväqa, pëpita llapan yachatsikoqkunapaq y adoraqninkunapaqmi Testïgunkuna kayanqanta nin (Hebrëus 11:4–12:1). Tsëmi Jehoväqa unë witsan sirweqninkunata nirqan: “Qamkunam noqapa testïgükuna kayanki” (leyi Isaïas 43:10). Jesuspaqpis Bibliachöqa nin “Confiakuypaq Testïgu” kanqantam (Apocalipsis 1:5). Tsëmi Jehoväpa testïgunkuna nirna reqiyämänampaq 1931 watachö decidiyarqä. Y alläpam kushikuyä Jehoväpa testïgun kayanqäta.
3 KAQ: ¿Imanötan Jehoväpa testïgunkunaqa rikätsikuyan Jesusnö kuyakoq kayanqanta?
Jesusqa alläpam kuyarqan qateqnin discïpulunkunata, y familiantanömi rikarqan (leyi Marcus 3:35). Jehoväpa testïgunkunapis juk familianöllam llapäkuna kayä. Llapäkunam “wawqi”, “pani”, “turi, “nana” o “ñañay” nir reqinakuyä (Filemon 1, 2). Bibliachö kënö ninqantam cäsukuyä: “Llapan wawqikunata y panikunata kuyayë” (1 Pëdru 2:17). Jehoväpa testïgunkunaqa imëkanöpam kuyakoq kayanqäta rikätsikuyä. Juknöpaqa wawqi panïkuna sufriyaptin o problëmakunapa pasayaptin yanaparmi.
MASLLA YACHAKUSHUN
Jehoväpa testïgunkunatam maslla reqishun, y imanir alli kaq religion kayanqantam yachakushun.
Rasumpa cristiänukunaqa Bibliachö ninqantam creiyan y yachakuyanqantam jukkunata parlapäyan.
4 KAQ: Bibliachö ninqantam creiyä
Unëpitanam Jehoväqa willakurqan Bibliachö ninqankunaqa tiempuwan mas entiendikänampaq kaqta. Leyiyë Daniel 12:4 ima ninqanta y këpaq parlayë:
-
Bibliata mas estudiayaptin, ¿ima pasanampaq kaqtataq kë textuchö willakun?
Charles Russell y yanapaqninkuna Diosnintsikpa Palabranta imanö estudiayanqanta VIDEUCHÖ rikäyë y këpaq parlayë:
-
Kë videuchö rikanqantsiknöpis, Charles Russell y yanapaqninkunaqa, ¿imanötan Bibliata estudiayaq?
¿Musyarqëkiku?
Patsa waränampaqqa ichikllapa ichikllapam atsikyar qallan, tsënöllam Diosnintsikpis Palabran Bibliata mas cläru entiendiyänäpaq ichikllapa ichikllapa yanapayämashqa (leyi Proverbius 4:18). Tsëmi hörataqa imata creiyanqäkunata o yachatsikuyanqäkunata cambiayarqö. Bibliachö willakunqankunaqa manam imëpis cambiantsu, peru maslla entiendiyanqämi yanapayämashqa creiyanqäkunata cambiayänäpaq.
5 KAQ: Jehoväpitam rasumpa kaqta yachatsikuyä
¿Imanirtan Jehoväpa testïgunkuna kayanqäta niyä? VIDEUTA rikäyë y këkunapaq parlayë:
-
¿Imanirtan Jehoväpa testïgun kayanqäta niyä?
Jehoväpaq mana rasumpa kaqta yachatsikushqa kayaptinmi, Jehoväqa testïgunkuna kayänampaq y pëpita yachatsikuyänampaq nunakunata akrashqa. Jehoväpaq mana rasumpa kaqta yachatsikuyanqanta rikärishun.
Wakin religionkunachöqa niyan santukunaman rezakuyänampaqmi, peru Bibliachöqa, ¿imatataq nin? Leyiyë Levïticu 26:1 ima ninqanta y këpaq parlayë:
-
¿Diosnintsikqa imatataq nin santukuna katsipaq?
Wakin religionkunachöqa yachatsikuyan Jesuspis Dios kanqantam, peru Bibliachöqa, ¿imatataq nin? Leyiyë Juan 20:17 ima ninqanta y këkunapaq parlayë:
-
¿Jesuspis Dios kanqantaku kë textuchö nin?
-
¿Ima ninkitan rasumpa kaqta yachatsikuyänampaq Testïgunkunata Jehovä mandanqampaq?
6 KAQ: Llapäkunam kuyanakuyä
Bibliachöqa nin Jehoväpa sirweqninkunaqa juknölla kayanqanta y kuyanakuyanqantam. Leyiyë 1 Corintius 12:25, 26 ima ninqanta y këkunapaq parlayë:
-
Jehoväpa sirweqninkunaqa, ¿imatataq rurayan wawqi paninkuna sufriyaptin?
-
¿Jehoväpa testïgunkuna kuyakoq kayanqanta rikarqunkiku?
Jehoväpa testïgunkunaqa ima desgraciapa pasarpis llapankunam yanapanakuyan. VIDEUTA rikäyë y këpaq parlayë:
-
Haitïchö desgracia pasaptin, ¿imanötan Jehoväpa testïgunkuna kuyakoq kayanqanta rikätsikuyarqan?
Jehoväpa sirweqninkunaqa kuyakoq karmi sufreqkunata yanapayan.
WAKIN IMA NIYANQAN: “Jehoväpa testïgunkunaqa manam unëpitatsu kayashqa”.
-
¿Imëpitataq Jehoväqa adoraqninkunapaq “Testïgunkuna” kayanqanta nishqa?
KËTAM YACHAKURQUNKI
Jehoväpa testïgunkunam alli kaq religion kayan, tsëmi juk familianölla Jehoväta adorayan. Bibliachö ninqantam creiyan y Jehoväpitam rasun kaqta yachatsikuyan.
¿Yarpankiku?
-
¿Imanirtan Jehoväpa testïgunkuna kayanqäta niyä?
-
¿Imanötan kuyakoq kayanqäta rikätsikuyä?
-
¿Jehoväpa testïgunkunatsuraq alli kaq religion kayan? ¿Ima ninkitan?
MASTA YACHAKUY
Jehoväpa testïgunkuna pikuna kayanqanta maslla musyanëkipaq rikë.
Wakin religionkunachö mana rasumpa kaqta yachatsikuyanqanta, y Jehoväpa testïgunkunaqa Bibliawan rasumpa kaqta yachatsikuyanqäta rikë.
Jehoväpa testïgunkuna rurayanqankunata maslla musyanëkipaq leyi.
“Jehoväpa testïgunkunapaq musyëta munayanqan” (jw.org päginachö yarqamoq)
Stephen jutiyoq nunaqa chikikoq karmi imëka mana allikunata rurarqan. Jehoväpa testïgunkunapa reunionninkunaman ëwanqan imanö yanapanqanta leyi.
“Kawënïqa mas mana allimanmi chäkïkarqan” (Täpakoq, 1 de septiembri 2015)
a Testïgukunaqa Täpakoq revistawanmi Bibliapita rasumpa kaqta yachatsikuyan. Tsë revistaqa 1879 watapitanam cada killa yarqamun.
