Ushanan
“Diosman marcäcoqcuna cawayanqannolla [...] cawacoqcunaqa llapantsicpis änimashqantsiccunata chasquishunmi.” (HEBRËUS 6:12)
1, 2. ¿Imanirtaq raslla kallpachakunantsik alli markäkïyoq kanapaq? Juk igualatsikïwan willakaramï.
MARKÄKÏ (yärakuy) palabraqa, ¡më tsëchö reqishqam! Wiyarirqa rasllam yarpärintsik alläpa precisaq kanqanta. Tsënö kaptimpis, allim kanman ras nishqan palabramampis pensanantsik. ¿Imanir? Tantiyarinapaq, markäkïnintsik mana kaptinqa, precisanmi markäkïyoq këta raslla procuranantsik; y kapamashqanaqa, alläpam precisan mana ushakänampaq y jatunyätsinapaq ras kallpachakunantsik. ¿Y imanirtaq tsëkunataqa raslla ruranantsik?
2 Këman pensari, mana imapis kaq desiertupa pasëpa yakunar ëwëkankiman. Tsëna yakuta taririnkiman, tsëqa imëkanöpachi cuidankiman Intiwan (Rupaywan) mana tsakiranampaq. Peru manam tsëllatatsu rurankiman, ëwëkanqëkiman chanqëkiyaqqa jina wallkanqanmannöchi yakutaqa imëkanöpapis masta tarita procurankiman. Tsënöllam kanan witsampis, imëka desiertuchö yaku mana kaqnö rasumpa markäkïpis alläpaqa kantsu, y karpis rasllam ushakärin, tsëmi alläpa precisan markäkïnintsikta cuidanantsik y jatunyätsinantsik. Y tsëtaqa rasmi ruranantsik, porqui imanömi mana yakuwanqa raslla ushakärishwan, tsënöllam markäkïnintsik mana kaptinqa Dioswan amïgu kënintsikpis raslla ushakärinman (Rom. 1:17).
3. ¿Imatataq Jehovä rurashqa markäkïnintsikta mas jatunyätsinapaq, y ima ishkë precisaq cösaskunatataq ruranantsik?
3 Jehoväqa musyanmi pëman markäkïta (yärakuyta) alläpa wananqantsikta, y kanan witsankuna markäkïyoq kanantsik y imëpis markäkunantsikqa mana fäcil kanqanta. Tsëmi unë witsan sirweqninkunapa markäkïninkunapita yachakunapaq, llapan pasayanqankunata Palabran Bibliaman Diosqa qellqatsishqa. Awmi, apostul Pablu qellqanqannöpis, Diosqa nimantsik pëman ‘marcäcoqcuna cawayanqannolla [...] marcäcur cawacunapaqmi’ (Heb. 6:12). Tsëmi Diospa markanqa nimantsik kë libruchö rikanqantsiknö ollqukunapa y warmikunapa markäkïnimpita yachakunapaq. ¿Y imatataq nïkurqa ruranantsik? Puntataqa, markäkïnintsiktam mas jatunyätsinantsik, nïkurnam, Dios awnimanqantsikkunata imëpis shuyaränantsik.
4. ¿Imatataq Satanas ruran Diosman markäkunqantsikta ushakätsinampaq, peru imanirtaq alläpaqa mantashwantsu?
4 Diosman markäkïnintsikta mas jatunyätsishun. Entëru Patsata makinchö këkätseq Satanasmi markäkïnintsikta imëkanöpapis ushakätsita munan. Pëmi kë tiempukunata imëka desiertumannö tikratsishqa, tsëmi Diosman markäkïqa kannatsu, y karpis sasaran mana ushakänampaq cuidanan. Awmi, Satanasqa noqantsikpita mas puëdeqmi, peru manam alläpaqa mantsashwantsu. Puëdintsikmi markäkïnintsikta mas jatunyätsita y mana ushakänampaq kallpachakïta. Yarpäshun, Jehoväqa listum këkan pëman rasumpa markäkïta munaqkunapa amïgun kanampaq. Jina clärum willamantsik pëman witirqa, Diablupa makinman mana ishkinapaq kaqta, y hasta läduntsikpita wititsinapaq kaqta (Sant. 4:7). Peru tsëta logranapaqqa alläpam precisan Diosman markäkïnintsikta cuidanapaq y jatunyätsinapaq llapan junaqkuna tiempuntsikta rakinantsik. ¿Imanö?
5. ¿Imatataq Biblia willakunqan nunakuna rurayarqan Diosman markäkïninkunata mas jatunyätsiyänampaq?
5 Rikanqantsiknöpis, Biblia willakunqan Diospa sirweqninkunaqa manam markäkïkarllanatsu yuriyarqan. Llapan pasayanqankunam rikätsikun markäkïyoq kayänampaqqa santu espïrituraq yanapanqanta (Gäl. 5:22, 23). Pëkunaqa yanapanampaqmi Diosman mañakuyaq, y pënam markäkïninkunata jatunyätsir yanapaq. Tsënölla noqantsikpis rurashun: ama imëpis qonqashuntsu santu espïritunta qomänapaq Jehoväta mañakushqa, y mañakunqantsiknölla rurashqaqa, wiyamänapaq kaqta (Lüc. 11:13). Peru ¿ima mastataq ruranantsik?
6. ¿Imatataq ruranantsik Biblia willakunqan nunakunapita yachakunqantsik mas yanapamänapaq?
6 Kë libruchöqa yachakurquntsik wakin markäkoq (yärakoq) nunakunapa kawëninkunallapitam. Peru masran kan (leyi Hebrëus 11:32). Alläpam precisan Bibliapita japallantsik yachakunqantsikchö pëkunapita alli y shumaq yachakïta tïranantsik. ¡Cada ünupitam mëtsikata yachakïta puëdintsik! Janan jananlla leyipärishqaqa manam markäkïnintsik jatunyanqatsu. Alli yachakunapaq y yachakunqantsik yanapamänapaqqa, masta musyanapaqmi mëchö, imanö y imanir pasanqankunata publicacionkunachö ashinantsik. Tsë nunakunapa kawëninkunaqa mas yanapamäshun, “noqantsicno nunalla quecar” tsë llapankunachö tsarakuyanqanta mana qonqashqam (Sant. 5:17). Tsë llapan pasayanqankunata pasëkämanqantsiktanö rikarqa, kanan witsan pasanqantsik problëmakunapanö pasar imanö sientikuyanqantam cuentata qokushun.
7-9. a) ¿Ima niyanmanraq Diosta unë witsan sirweqkuna kanan witsan ruranqantsiknö Diosta sirwiyänampaq niyaptin? b) ¿Imanirtaq rurënintsikwan Diosman markäkïnintsikta jatunyätsinantsik?
7 Jina markäkïnintsiktaqa mas jatunyätsishun Jehovä mañamanqantsikta rurarmi. Musyanqantsiknöpis, “meqan nunapis allicunata mana ruraptenqa, Dios Yayaman marcäconqan [manam] ni imapaq sirwintsu” (Sant. 2:26). Këman pensarishun, Diosta unë witsan sirweqkunaqa alläpa kushishqachi rurayanman karqan Jehovä kanan witsan mandamanqantsikkunata.
8 Pensarishun Abrahanman, ¿ima ninmanraq karqan mana pï täranqanchö y rumiwan perqashqa altarchö Jehoväta adoranampa rantin, Yachatsikuyänan Wayikunachö y jatun asamblëakunachö mëtsikaq cristiänu mayinkunawan ëllukar Jehoväta adoranampaq niyaptin? Jina, ¡imaraq kushikïkunman karqan ‘carupita ricanqan’ awnikïkuna kanan witsan entiendikanqanta rikar! (Leyi Hebrëus 11:13.) O këman pensarishun, ¿imanöraq Elïas sientikunman karqan Baalpa mana alli profëtankunata wanutsinampa rantin, o Diospa contran churakashqa chiki reypa tiempunchö Diosta sirwinampa rantin, nunakunata wayinkunaman watukar, kushitsikoq y shoqakoq willakïkunata yachatsinampaq niyaptin? Clärum këkan: Diosta unë witsan sirweq nunakunaqa kushishqachi rurayanman karqan Diospaq kanan witsan rurëkanqantsikkunata.
9 Tsëmi markäkïnintsikta mas jatunyätsinantsik, Biblia willakunqan nunakunapa markäkïninkunapita yachakunqantsikta rurënintsikkunawan rikätsikurnin. Tsëta rurarqa, kë librupa qallananchö ninqannömi tsë nunakunata amïguntsikkunatanö rikäshun. Y manam tsëllatsu, pëkunawanqa ichikllachönam rasumpa amïgu kashun.
10. ¿Mushoq Patsachö ima pasakunqantaq alläpa kushikïpaq kanqa?
10 Dios awnimanqantsikkunata imëpis shuyaräshun. Diosta unë witsan sirweqkunataqa Dios awnikunqankunata imëpis shuyaräyanqanmi yanaparqan. ¿Tsëtaku noqantsikpis rurantsik? Pensari, alli kaqta rurashqakuna kawariyämunan witsan chäramuptinqa, ¡imanö kushikïpaqraq kanqa Biblia willakunqan nunakunata chaski! (Leyi Hëchus 24:15). ¿Pensashqankinaku imakunata tapunëkipaq kaqta?
11, 12. ¿Imataraq mushoq Patsachö tapïta munankiman a) Abelta. b) Noëta. c) Abrahanta. d) Rutta. e) Abigailta. f) Esterta?
11 Abeltaqa itsachi tapïta munankiman teytankuna imanö kayanqanta o Eden huertapa yëkunanta täpaq querubinkunawan imëllapis parlanqanta. Noëtaqa itsachi tapïta munankiman nefilimkunata mantsanqanta o mana mantsanqanta, o juk wata entëru arcachö këkaq animalkunata imanö cuidanqanta. Y Abrahantaqa itsachi tapurinkiman Ur markata jaqi sasa o mana sasa kanqanta, o Jehoväpita yachatseqnin Sem o juk kanqanta.
12 Jina Biblia willakunqan warmikunata imata tapunëkipaq kaqtapis itsachi pensashqankina. Këllaman pensari, Ruttaqa itsachi tapïta munanki imanir Jehoväta sirwita akranqanta, Abigailtana Davidrëkur ruranqanta nunan Nabalta willëta mantsanqanta o mana mantsanqanta, y Estertawan Mardoqueutana, pëkunapaq Biblia willakunqampita witsëpa kawëninkuna imanö kanqanta.
13. a) ¿Imakunataraq itsa kawarimoqkuna tapumäshun? b) ¿Imanötaq sientikunki Diosta unë witsan sirweqkunawan reqinakunëkipaq kaqta musyar?
13 Jina pëkunapis mëraq imëkata tapumënintsikta munayanqa. ¡Imanö kushikïpaqraq kanqa ushanan witsankuna imanö kanqanta y sasa tiempukunachö Jehovä markanta imanö yanapanqanta willëqa! Alläpachi kushikuyanqa llapan awnikïninkunata Dios imanö cumplishqa kanqanta rikärir. Jina noqantsikpaqpis ¡alläpa kushikïpaqchi kanqa tsë nunakunawan reqinakïqa! Tsë tiempukuna chämunqanyaqqa, pëkunata imëka kawëkaqtanö pensënintsikchö rikäshun. Diosman markäkuyanqampita yachakushun, tsëta rurarqa manana wanurmi tsë kuyashqa amïguntsikkunawan juntu Jehoväta imëyaqpis sirwishun.
